1 Monna wa Benjamine o ne a le teng, lebitso la hae e le Kishe, mora Abiele, mora Tserore, mora Bakorathe, mora Afia, mora wa Mobenjamine e mong; e ne e le monna ya matla, ya bohale.
2 O ne a na le mora ya bitswang Saule, e le mohlankana e motle, ho se monna hara bana ba Iseraele ya mo fetang ka botle; o ne a feta le bohle ba setjhaba ka bolelele, a tswile ka mahetla.
3 Mohlang oo, diesele tsa Kishe, ntata Saule, tsa lahleha. Kishe a re ho Saule, mora hae: Ako ye le e mong wa bahlanka, o yo batla diesele.
4 Ebile o ya le thaba ya Efraime, a ntoo ya le naha ya Shalisha, ba mpa ba se ke ba di fumana; ba ntoo ya le naha ya Shaalime; le teng tsa eba siyo; hape ba ya le naha ya Benjamine, ba se ke ba di bona.
5 Ha ba fihla naheng ya Tsufe, Saule a re ho mohlanka wa hae eo ba nang le yena: A re kgutle, e se be ntate a lebala diesele, mme a belaela bakeng sa rona.
6 Eo a mpa a re ho Saule: Bona hle, monna wa Modimo o teng motseng wane; ke monna ya hlomphuwang; tsohle tseo a di buang di ye di etsahale; a re ye teng jwale; ekaba o tla re bolella tsela ya rona eo re ka tsamayang ka yona.
7 Ebile Saule o re ho mohlanka wa hae: Empa, ha o bona, leha re ka ya, monna eo re ka mo isetsang? Hobane bohobe bo neng bo le mekotleng ya rona bo fedile, mme ha re na mpho eo re ka e neang monna wa Modimo; re na le eng?
8 Teng, mohlanka a boela a arabela Saule, a re: Ho sa setse ho nna karolo ya bone ya shekele ya silefera; ke tla e nea monna wa Modimo, hore a tle a re bolelle tsela ya rona.
9 [Haele pele, mokgwa Iseraeleng e be e le hore, motho ha a ya botsa Modimo, o ne a re: Tloong, re yeng senoheng; etswe eo kajeno ho thweng ke moporofeta, a ne a bitswa senohe mehleng ya kgale.]
10 Ebile Saule o re ho mohlanka wa hae: O boletse taba ya sebele; tloo, re ye. Yaba ba ya motseng moo monna wa Modimo a leng teng.
11 Ha ba ntse ba nyolohela motseng, ba kgahlana le barwetsana ba etswa teng ho ya kga metsi. Ba re ho bona: Ana senohe se teng hae na?
12 Ba ba fetola, ba re: Se teng; bona, ke sona seo, se pela hao; phakisa hle, hobane kajeno se tlile motseng, hobane kajeno ho hlabelwa setjhaba nqalong e phahameng.
13 Etlare le sa kena motseng, le tla mo fihlela a eso ho nyolohele nqalong e phahameng ho ya ja teng; hobane le setjhaba se ke ke sa eja, a eso ho fihle, etswe e le yena ya tla hlohonolofatsa sehlabelo, ho ntoo jewa ke ba memilweng. Nyolohang jwale, hobane le tla mo fihlela ka nako ena.
14 Yaba ba kena motseng, mme ha ba fihla hara motse, ba bona Samuele a tla ba kgahlanyetsa, a se a nyolohela nqalong e phahameng.
15 Jehova o ne a se a tsebisitse Samuele, tsatsing le kapele ho leo Saule a fihlileng ka lona, a re:
16 Hosasane, ha ho le jwalo, ke tla o romela monna ya tswang naheng ya Benjamine; o ke o mo tlotse, e be mong a setjhaba sa ka sa Iseraele; o tla namolela setjhaba sa ka matsohong a Bafilesta, etswe ke hopotse setjhaba sa ka, kahobane dillo tsa sona di fihlile ho nna.
17 Samuele ha a bona Saule, Jehova a eketsa a re: O a mmona, mnna elwa ke neng ke o bolella yena; ke yena ya tla busa setjhaba sa ka.
18 Saule a atamela pela Samuele kgorong, a re: Ako ntshupise ntlo ya senohe hore na ke efe?
19 Samuele a araba Saule, a re: Ke nna senohe seo; o ke o nyolohele pela ka nqalong e phahameng; le tla ja le nna kajeno, mme hosasa ke tla o fa tsela; mme tsohle tse ka pelong ya hao ke tla o tsebisa tsona.
20 Diesele tse o lahlehetseng, kajeno e seng e le la boraro, o se ke wa belaela ka tsona, hobane di se di bonwe; mme tsohle tse lakatsehang tsa Iseraele di boloketswe mang? Ana ha di a bolokelwa wena le ntlo yohle ya ntatao na?
21 Saule a araba, a re: Ha ke re, ke Mobenjamine, wa leloko le lenyenyane ho meloko ya Iseraele, mme mothapo wa ka ke o monyenyane ho methapo yohle ya leloko la Benjamine na? O rialo jwang ho nna?
22 Ebile Samuele ba ya le Saule le mohlanka wa hae, a ba isa moo ho jewang, mme a ba dudisa setulong se kapele ho ba memilweng, e leng batho ba batlileng ho ba mashome a mararo.
23 Jwale, Samuele a bitsa maopehi, a re: Hlahisa sekoto seo ke o fileng sona, ka re ho wena: Se bolokele kathoko ka ho wena.
24 Moapehi a lata letsoho le se leng ho lona, a le bea pela Saule, mme Samuele a re: Bona, ke hona ho neng ho bolokilwe; ho bee pela hao, o je; hobane ho bo ho ntse ho boloketswe wena le jwale, haesale ke re, ke tla mema setjhaba. Yaba Saule ba ja le Samuele tsatsing leo.
25 Ba ntoo theoha nqalong e phahameng, ba boela hae, ba ba ba buisana le Saule, ba le hodima ntlo.
26 Ha ba tsoha e sa le ka meso, Samuele a biletsa Saule hodima ntlo, a re: Tsoha, ke o fe tsela. Saule a tsoha, mme ba tswela ntle ba ena le Samuele, e le bona ba babedi.
27 Ha ba se ba ya fihla pheletsong ya motse, Samuele a re ho Saule: Laela mohlanka, a ke a re etelle pele — mme a ba etella pele — wena, o eme motsotso, ke tle ke o utlwise lentswe la Modimo.