1 Jwale, Samuele ha a se a hodile, a bea bara ba hae baahlodi ba Iseraele.
2 Lebitso la mora wa hae wa letsibolo e ne e le Joele, lebitso la wa bobedi e le Abia; ba ne ba ahlolela Beerseba.
3 Bara ba hae ba mpa ba se ke ba tsamaya ka mehlala ya hae; ba kgelohela leruong le sa lokang, ba amohela dimpho, ba kgelosa le kahlolo.
4 Ebile baholo bohle ba Iseraele ba phutheha, ba tla ho Samuele, Rama;
5 ba re ho yena: O ka bona, o se o hodile, mme bara ba hao ha ba tsamaye ka mehlala ya hao; jwale, re beele morena, a tle a re ahlolele, jwalokaha ho etswa ditjhabeng tsohle.
6 Taba ena ya mpa ya swabisa Samuele kamoo ba buang, kateng, ba reng: Re beele morena, hore a re ahlolele. Mme Samuele a rapela Jehova.
7 Jehova a re ho Samuele: Mamela puo ya setjhaba kahohle kamoo se buang le wena kateng; hobane ha ba lahle wena, ba lahlile nna, hore ke se ke ka nna ka ba morena wa bona.
8 E ntse e le ho etsa ka tsohle tseo ba di entseng, haesale ke ba ntsha Egepeta, ho tlisa tsatsing lena, ho mphuralla, le ho sebeletsa medimo esele; le wena ba o etsa jwalo.
9 Jwale, mamela mantswe a bona; leha ho le jwalo, o ba nyatse, o ba tsebise mokgwa wa morena ya tla busa hodima bona.
10 Ebile Samuele o beela setjhaba, se kopileng morena ho yena, mantswe wohle a Jehova.
11 A re: Ke wona mokgwa wa morena ya tla busa hodima lona: o tla nka bara ba lona, a ba bee makoloing a hae, a ba etse bapalami ba hae, ba bang ba mathe pela makoloi a hae.
12 O tla bea ba bang balaodi ba dikete, le balaodi ba mashome a mahlano; ba bang ba tla mo lemela, ba mo kotulele; ba bang ba tla mo etsetsa dibetsa tsa ntwa, le mesebetsi ya makoloi a hae.
13 O tla nka baradi ba lona, hore ba bang ba lokise ditlolo, ba bang ba apehe dinama, ba bang ba apehe mahobe.
14 O tla nka le masimo a lona, le merara ya lona, le mehlwaare ya lona e metle, a e nee bahlanka ba hae.
15 O tla nka karolo ya leshome ya dipeo tsa lona, le ya merara ya lona, a e nee matona a hae le bahlanka ba hae.
16 O tla nka bahlanka ba lona le makgabunyane a lona, le bahlankana ba lona ba batle, le diesele tsa lona, a itshebeletse ka tsona.
17 O tla nka karolo ya leshome ya mehlape ya lona, le be bahlanka ba hae.
18 Mohlang oo, le tla lla ka baka la morena wa lona eo le ikgethetseng yena, empa Jehova a ke ke a le utlwa mohlang oo.
19 Leha ho le jwalo, setjhaba sa hana ho utlwa lentswe la Samuele, sa re: Tjhe, empa re tla ba le morena ya re busang;
20 re tle re tshwane le ditjhaba tse ding, morena wa rona a tle a re ahlolele, a re etelle pele, a laole dintwa tsa rona.
21 Samuele a utlwa polelo tsohle tsa setjhaba, mme a di kgutlisetsa tsebeng tsa Jehova.
22 Mme Jehova a re ho Samuele: Utlwa mantswe a bona, o ba kgethele morena. Ebile Samuele o re ho banna ba Iseraele: E mong le e mong a kgutlele motseng wa habo.