1 Ke ana marena a lefatshe la Kanana, ao bana ba Iseraele ba a hlotseng, ba ruileng naha tsa wona mose wane wa Jordane, ka nqa botjhabatsatsi, ho tloha nokeng ya Arnone, ho isa thabeng ya Hermone, hammoho le lehwatata lohle nqa botjhabatsatsi.
2 Ke Sihone, morena wa Baamore, ya neng a ahile Heshbone; o ne a busa naha ho tloha Aroere, o lebopong la noka ya Arnone, mahareng a sekgutlo, le sekoto se seng sa Gileade, ho isa molapong wa Jabboke, e leng moedi wa bana ba Ammone.
3 O ne a buse le lehwatata ho isa letsheng la Kinnerethe, ka nqa botjhabatsatsi, le ho isa Lewatleng la Lehwatata, e leng Lewatle la Letswai, nqa botjhabela, tseleng e yang Bethe-Jeshimothe, le nqa borwa, ho isa tlasa matswapo a Pisga.
4 Ba rua le naha ya Oge morena wa Bashane, ya neng a setse wa Baefraime ba ahileng Ashtarothe le Edrei;
5 o ne a busa thaba ya Hermone, le Salka, le Bashane kaofela, ho isa naheng ya Bageshure, le Bamaakathe, le sekoto se seng sa Gileade, moedi wa Sihone, morena wa Heshbone.
6 Ke bona bao Moshe, mohlanka wa Jehova, le bana ba Iseraele ba neng ba ba hlotse; Moshe, mohlanka wa Jehova, a nea fatshe leo ho Barubene, le ho Bagade, le ho ba mothapo o mong wa leloko la Manasse, hore ba le rue.
7 Ke ana marena a hlotsweng ke Joshua le bana ba Iseraele mose o kwano wa Jordane, nqa bophirimela, ho tloha Baale-Gade, sekgutlong sa Lebanone, ho isa thabeng e phollatsi e nyolosetsang Seire; fatshe leo Joshua a le nea meloko ya Baiseraele hore e be lefa la bona ka methapo ya bona;
8 dithaba, le dikgutlo, le mahwatata, le maralla, le lefeela, le naha e ka nqa borwa; e leng lefatshe la Bahethe, le la Baamore, le la Bakanana, le la Baferese, le la Baheve, le la Bajebuse.
9 Morena wa Jeriko ke e mong; e mong, ke morena wa Ai, o haufi le Bethele;
10 morena wa Jerusalema ke e mong; e mong hape, ke morena wa Hebrone;
11 e mong, ke morena wa Jarmuthe; e mong, ke morena wa Lakishe;
12 e mong, ke morena wa Eglone; e mong, ke morena wa Gesere;
13 morena wa Debire ke e mong; e mong, ke morena wa Gedere;
14 e mong, ke morena wa Horma; e mong hape, ke morena wa Arade;
15 e mong ke morena wa Libna; e mong, ke morena wa Adullame;
16 e mong, ke morena wa Makkeda; e mong, ke morena wa Bethele;
17 morena wa Tappua ke e mong; e mong, ke morena wa Hefere;
18 morena wa Afeke ke e mong; e mong, ke morena wa Lasharone;
19 e mong, ke morena wa Madone; e mong, ke morena wa Hatsore;
20 e mong, ke morena wa Shimrone-Merone; e mong, ke morena wa Aksafe;
21 e mong, ke morena wa Taanake; e mong, ke morena wa Megiddo;
22 e mong hape, ke morena wa Jokneame, wa Karmele;
23 e mong, ke morena wa Dore, naheng ya Dore; e mong hape, ke morena wa Gojime, pela Gilgale;
24 e mong, ke morena wa Thirtsa; marena ao wohle a mashome a mararo a motso o mong.