1 Jwale, Joshua, mora Nune, ha a le Shittime, a roma banna ba babedi sephiring, ho ya bohlwela, a re: Eyang le lekole lefatshe le Jeriko.Yaba ba ya, mme ba kena tlung ya mosadi oa sehlola, bitso la hae e le Rahaba, ba robala teng.
2 Ha sebelwa morena wa Jeriko, ha thwe: Bona, ho tlile kwano, bosiung bona, banna ba bana ba Iseraele, ho hlwela lefatshe.
3 Ebile morena wa Jeriko o romela ho Rahaba, a re: Ntsha banna ba tlileng ha hao, ba keneng tlung ya hao; hobane ba tlile ho qamakisisa lefatshe lohle.
4 Empa mosadi a nka banna ba babedi bao, a ba pata, mme a re: Efela ho tlile banna ha ka, mme ha ke a ka ka ba tseba hobane ke ba tswang kae.
5 Etsware, ha ho kwalwa monyako wa motse ka shwalane, banna bao ba tswile; ha ke tsebe moo banna bao ba ileng teng. Ba phalleleng kapele, hobane le tla ba tshwara.
6 Athe o ba hlweseditse kahodima ntlo, o ba patile katlasa dithupa tsa matakwane, tseo a di anehileng ka-hodima ntlo.
7 Banna ba motse ba ba phallela ka tsela ya Jordane, ho ya fihla madibohong; mme ha kwalwa monyako wa motse, ha ba ba phalletseng ba tswile.
8 Yare ba eso ho robale, a hlwella ho bona kahodima ntlo,
9 a re ho banna bao: Ke a tseba hobane Jehova o le neile lefatshe, mme letsoso la lona le re wetse hodimo, mme bohle ba ahileng lefatsheng lena, ba tepeletse pela lona.
10 Hobane re utlwile kamoo Jehova a omisitseng metsi a Lewatle le Lefubedu pela lona kateng, mohla le tswang Egepeta, le kamoo le entseng ho marena a mabedi a Baamore kateng, ba mose wane wa Jordane, e leng Sihone le Oge, bao le ba timeditseng.
11 Eitse hobane re utlwe, ra nyahama dipelo; meya ya rona kaofela ya kgathala pela lona, hobane Jehova, Modimo wa lona, ke Modimo hodi-mo lehodimong, le tlase lefatsheng.
12 Jwale, ha le ke le ntlhapanyetse ka Jehova hore, jwalokaha ke le entse hantle, le lona le tla etsa ntlo ya ntate hantle. Le nnee pontsho ya nnete,
13 ya hore le tla pholosa ntate, le mme, le banabeso, le dikgaitsedi, le tsohle tsa bona, le namolele ho phela ha rona lefung.
14 Banna bao ba re ho yena: Ho phela ha rona, ho ke ho neelwe lefu bakeng sa lona! Ha le sa hlahise taba ena ya rona, etlare ha Jehova a se a re neile lefatshe, ruri re tla o etsa ka botle le ka nnete.
15 Ebile o ba theosetsa ka fensetere, ka mohala, hobane ntlo ya hae e be e le hodima lerako la motse; o ne a ahile hodima lerako.
16 A re ho bona: Ikeleng thabeng, esere mohlomong ba phaletseng ba kgahlana le lona; le ipate teng matsatsi a mararo, ba phaletseng ba be ba boye, le ntoo ya ka tsela ya lona.
17 Yaba banna ba re ho yena: Re tla lokoloha kanong ena ya hao eo o re antshitseng ka yona.
18 Bona mohla re kenang lefatsheng la lona, o ke o hokele kgwele ena ya lesika le lefubedu fensetereng eo o re theositseng ka sona; hape, o ke o bokelle ka ha hao ntatao, le mmao, le banabeno, le bohle ba ntlo ya ntatao.
19 Leha e le mang le mang ya tla tswela kantle ho menyako ya ntlo ya hao, madi a hae a tla ba hodima hlooho ya hae; moo etlaba ha re na molato; mme leha e le mang le mang ya tla ba le wena ka tlung, madi a hae a tla ba hodima dihlooho tsa rona, ha a ka tswa kotsi.
20 Empa ha o ka tumisa taba ena ya rona, etlaba re lokolohile kanong ya hao eo o re antshitseng ka yona.
21 A re: Ho be jwalokaha le boletse. Yaba o a ba kgutlisa, ba ikela. Mme a hokela kgwele e kgubedu fensetereng.
22 Ba tloha jwalo, ba fihla thabeng, mme ba hlola teng matsatsi a mararo, ba ba phalletseng ba ba ba kgutla; etswe ba ba phalletseng ba ne ba ba batlile tseleng yohle ba se ke ba ba bona.
23 Banna bao ba babedi ba kgutla, ba theoha thabeng, mme ba tshela noka, ba fihla ho Joshua, mora Nune, ba mo phetela tsohle tse ba hlahetseng;
24 ba re ho Joshua: Ruri, Jehova o neetse fatshe lohle matsohong a rona, le bohle ba ahileng lefatsheng leo ba nyahame dipelo ke ho re tshaba.