1 Joshua ha a se a tsofetse, a hodile, Jehova a re ho yena: O tsofetse, o hodile, mme ho sa setse fatshe le leholo le esong ho ruuwe.
2 Fatshe le sa setseng, ke naha yohle ya Bafilesta le naha yohle ya Bageshure;
3 ho tloha nokeng ya Shikore, e mathang pela Egepeta, ho isa moeding wa Ekrone, nqa leboya, moo ho thweng, ke ha Bakanana; teng ho na le kgosana tse hlano tsa Bafilesta, ya Gasa, le ya Ashdode, le ya Ashkelone, le ya Gathe, le ya Ekrone.
4 Hape ke naha ya Baavve ka nqa borwa, le lefatshe lohle la Bakanana, le Meara eo e leng wa Basidone, ho isa Afeke, le moeding wa Baamore.
5 Hape, ke fatshe la Bagible le Lebanone kaofela nqa botjhabatsatsi, ho tloha Baale-Gade tlasa thaba ya Hermone, ho isa haufi le Hamathe.
6 Bohle ba ahileng sehlabeng, ho tloha Lebanone ho isa Misrefothe-Maime, Basidone kaofela,
7 ke tla ba leleka pela bana ba Iseraele; feela, o nne o abe dinaha tseo ka ho di laola ka lotho, e be lefa la Baiseraele, jwalokaha ke o laetse. O abe naha eo, e be lefa la meloko e robileng mono o le mong hammoho le la mothapo o mong wa leloko la Manasse.
8 Haele Barubene, le Bagade, le mothapo o mong wa Manasse, ba nkile lefa leo Moshe a neng a ba neile lona mose wane wa Jordane, nqa botjhabela, jwalokaha Moshe, mohlanka wa Jehova, a ne a ba neile;
9 ho tloha Aroere o lebopong la sekgutlo sa Arnone, le motseng o hara sekgutlo, sehlaba sohle sa Medeba ho isa Dibone;
10 le metse yohle ya Sihone, morena wa Baamore, ya neng a busa Heshbone, ho isa moeding wa bana ba Ammone,
11 le Gileade, le naha ya Bageshure, le ya Bamaakathe, le thaba yohle ya Hermone, le Bashane kaofela, ho isa Salka;
12 le mmuso wohle wa Oge, Bashane, ya neng a busa Ashtarothe le Edrei, ya neng a setse wa Barefaime; Moshe o ne a ba hlole, a ba a ba leleka.
13 Leha ho le jwalo, bana ba Iseraele ha ba ka ba leleka Bageshure, leha e le Bamaakathe; Bageshure le Bamaakathe ba ahile Iseraeleng ho fihlela kajeno.
14 Haele leloko la Balevi ha a ka a le nea lefa; mahlabelo a beelwang Jehova, Modimo wa Iseraele, ke wona e leng lefa la bona, jwalokaha a ne a ba boleletse.
15 Moshe o ne a se a abetse leloko la bana ba Rubene lefa, ka matlo a bona.
16 Moedi wa bona o ne o tloha Aroere, o lebopong la noka ya Arnone le motseng o hara sekgutlo sa yona, le sehlabeng sohle se pela Medeba;
17 ke Heshbone le metse yohle ya teng e ka sehlabeng; Dibone le Bamothe-Baale, le Bethe-Baale-Meone
18 le Jaatse, le Kedemothe, le Mefaathe;
19 le Kiryathaime, le Sibma, le Tserethe-Hashahare, thabeng ya lehwatata;
20 le Bethe-Peore, le matswapo a Pisga, le Bethe-Jeshimothe;
21 le metse yohle e ka lehwatateng, le mmuso wohle wa Sihone, morena wa Baamore, ya neng a busa Heshbone, eo Moshe a neng a mo hlotse, yena le dikgosana tsa Midiane e e leng Evi, le Rekeme, le Tsure, le Hure, le Reba, bao e neng e le batho ba Sihone, ha ba ntse ba ahile fatsheng leo.
22 Baalame, mora Beore, senohe, le yena o ne a bolailwe ka lerumo ke bana ba Iseraele, hara ba bang ba bolailweng.
23 Moedi wa bana ba Rubene e ne e le Jordane, lebopong la yona. Ke lona lefa la bana ba Rubene, ka matlo a bona; ke yona metse le metsana ya bona.
24 Moshe o ne a neile leloko la Gade lefa, e leng bana ba Gade, ka matlo a bona.
25 Naha ya bona e ne e le Jaesere, le metse yohle ya Gileade, le sekoto sa naha ya bana ba Ammone, ho isa Aroere, o maloka le Rabba;
26 le ho tloha Heshbone ho isa Ramathe-Mitspa le Bethonime; le ho tloha Mahanaime, ho isa moeding wa Debire.
27 Lehwatateng ke Bethe-Arame, le Bethe-Nimra, le Sukkothe, le Tsafone, e leng ho setseng ha mmuso wa Sihone, morena wa Heshbone; Jordane ke moedi wa teng, ho isa phellong ya letsha la Kinnerethe, mose wane wa Jordane, nqa botjhabela.
28 Ke lona lefa la bana ba Gade, ka matlo a bona, le metse le metsana ya teng.
29 Hape, Moshe o ne a neile ba mothapo wa leloko la Manasse lefa; lefa la mothapo o mong wa bana ba Manasse la dula jwana:
30 Naha ya bona ke ho tloha Mahanaime, Bashane kaofela, mmuso wohle wa Oge, morena wa Bashane, le metsana yohle ya Jaire, e Bashane; ke metse e mashome a tsheletseng;
31 le sekoto sa Gileade, le Ashtarothe, le Edrei, metse ya mmuso wa Oge, Bashane, ya eba ya bana ba Makire, mora Manasse, ke ho re, ya mothapo wa bana ba Makire ka matlo a bona.
32 Ke wona mafa ao Moshe a neng a a abile a le mahwatateng a Moabe, mose wane wa Jordane, ka nqa botjhabela ho Jeriko.
33 Empa Moshe ha a ka a nea leloko la Balevi lefa; Jehova, Modimo wa Iseraele, ke yena e leng lefa la bona, jwalokaha a ne a ba boleletse.