1 Die bose vlug wanneer niemand hulle agtervolg nie, maar die regverdige is versekerd soos ’n leeu.
2 As gevolg van die oortreding van ’n land het hy baie prinse, maar deur manne van insig wat regverdige oordeel ken, sal die stabiliteit daarvan verleng word.
3 ’n Arm man wat die armes onderdruk, is soos ’n swiepende reën wat tot geen voordeel is nie.
4 Hulle wat die wet opgee, prys boosheid, maar hulle wat die wet onderhou, word versterk.
5 Bose mense verstaan nie die regverdige oordeel nie, maar hulle wat יהוה soek, verstaan alle goeie dinge.
6 Die arm man wat in sy opregtheid lewe, is beter as ’n ryk man wie se lewenswyse pervers is.
7 Hy wat die wet onderhou, is ’n wyse seun, maar hy wat besig is met sinnelose boosheid, beskaam sy vader.Yes 23:18; Iyov 21:17
8 Hy wat sy rykdom vermeerder deur rente en onregverdige wins, sal dit nalaat vir die een wat goed is vir die armes.
9 Hy wat sy oor toedruk om nie na die wet te luister en dit te doen nie, selfs sy gebed is ’n verwerplikheid.
10 Hy wat die regverdiges op ’n bose pad laat afdwaal, sal self in die put val, maar die opregtes sal goeie dinge erf.
11 Die ryk man is wys in sy eie oë, maar ’n arm man met insig sal hom teregwys.
12 Wanneer die regverdige sterk is, is daar groot lof en eer, maar as die bose tot krag kom, verdwyn die lof en eer.Num 5:7
13 Hy wat sy oortredinge wegsteek, sal nie voorspoedig wees nie, maar hy wat sy sonde erken, bely en laat staan, sal liefdevolle omgee ontvang.
14 Gelukkig is die man wat gedurigdeur respekvol vrees, maar hy wat sy verstand, wil en emosie verhard, sal in die boosheid verval.
15 Soos ’n brullende leeu en ’n honger beer, so is ’n bose heerser oor die armes.
16 ’n Heerser wat ’n gebrek het aan insig, is ook ’n groot onderdrukker, maar hy wat bedrog haat, sal sy lewe verleng.
17 ’n Mens wat betrokke is by bloedvergieting sal selfs na die put toe vlug en niemand sal hom help nie.
18 Hy wat opreg lewe, sal gered word, maar hy wat pervers is in sy lewenswyse, sal in ’n put val.
19 Hy wat die land omploeg, sal ’n oorvloed van brood hê, maar hy wat agter nietighede aanjaag, sal volop armoede hê.
20 ’n Betroubare man het uitermatige seëninge, maar ’n bose man sal nie onskuldig wees nie.
21 ’n Man wat partydigheid wys, is nie goed nie; vir ’n stukkie brood sal ’n man ’n verraaier word.
22 Hy wat hom haas om ryk te word het ’n bose oog (suinig) en dink nie daaraan dat armoede oor hom sal kom nie.
23 Hy wat ’n mens teregwys, sal agterna meer guns vind, as hy wat vlei met sy tong.
24 Hy wat sy vader of sy moeder beroof en sê: “Dit is geen oortreding nie,” hy is die metgesel van ’n bose man.
25 Die hebsugtige verwek twis, maar hy wat sy vertroue op יהוה plaas, sal verryk word.
26 Hy wat op sy eie verstand, wil en emosie vertrou, is ’n dwaas, maar hy wat in integriteit leef, sal bevry word.
27 Hy wat aan die arme gee, sal nie gebrek ly nie, maar hy wat sy oë wegdraai van die behoeftige, sal baie vloeke ontvang.
28 Wanneer die bose opstaan, kruip mense weg, maar as hulle vergaan, vermeerder die regverdiges.