1 Miingon ang Ginoo kanako,
2 “Tawo, nagapuyo ka uban sa mga masinupakon nga katawhan. May mata sila apan dili sila makakita, may dalunggan sila apan dili sila makadungog, kay mga masinupakon sila.
3 Busa tawo, pagpakita nga mora ikaw ug binihag. Panghipos sa imong mga dad-onon ug lakaw ngadto sa laing dapit. Himoa kini sa adlaw aron makita sa mga tawo. Basin pag pinaagi niini makaamgo sila nga mga masinupakon sila.
4 Sa adlaw panghipos sa imong dad-onon aron makita nila. Pagkagabii, samtang nagatan-aw sila, molakaw ka nga daw sa usa ka binihag.
5 Busloti ang dingding sa imong balay samtang nagatan-aw sila, ug didto ipaagi ang imong dad-onon.
6 Samtang nagatan-aw sila, pas-ana ang imong dala ug lakaw sa kagabhion. Panabon sa imong nawong aron dili mo makita ang yuta. Kining imong himuon magpadayag sa usa ka pasidaan alang sa katawhan sa Israel.”
7 Busa gituman ko ang iyang gisugo. Sa adlaw pa, nanghipos ako sa akong dad-onon, ug pagkagabii gibuslotan ko ang dingding pinaagi sa akong mga kamot. Ug samtang nagatan-aw sila, gipas-an ko ang akong dala ug milakaw sa kagabhion.
8 Nianang pagkabuntag miingon ang Ginoo kanako,
9 “Tawo, karon nga nangutana ang mga masinupakon nga katawhan sa Israel mahitungod sa imong gihimo,
10 ingna sila nga ako, ang Ginoong Dios, may mensahe alang sa pangulo sa Jerusalem ug sa tanang katawhan sa Israel.
11 Ingna dayon sila nga ang imong gihimo usa ka pasidaan alang kanila nga pagabihagon sila.
12 Bisan ang ilang pangulo magaagi sa dingding nga gibangagan alang kaniya ug magapas-an sa iyang dala ug magalakaw sa kagabhion. Manabon siya sa iyang nawong aron dili niya makita ang yuta.
13 Lit-agon ko siya nga daw sa usa ka mananap ug dad-on sa Babilonia sa yuta sa mga Kaldeanhon. Apan dili niya kini makita, ug mamatay siya didto.
14 Katagon ko sa bisan asang dapit ang tanan niyang sakop — ang iyang mga alagad ug mga guwardya — ug bisan asa sila moadto ipapatay ko sila.
15 Ug kon makatag ko na sila ngadto sa mga nasod, mahibaloan nila nga ako mao ang Ginoo.
16 Apan tugotan ko ang pipila kanila nga makalingkawas sa gira, sa kagutom, ug sa mga balatian aron isugilon nila ngadto sa mga nasod nga ilang adtoan ang ilang mangil-ad nga mga buhat. Unya mahibaloan nila nga ako mao ang Ginoo.”
17 Miingon pa gayod ang Ginoo kanako,
18 “Tawo, kurog sa kahadlok samtang ikaw nagakaon ug nagainom.
19 Ug ingna ang mga lumulupyo sa Jerusalem ug sa tibuok Israel nga ako, ang Ginoong Dios, nag-ingon, ‘Mapuno sila sa kabalaka ug mangurog sa kahadlok samtang sila nagakaon ug nagainom, kay ilogon ang mga kabtangan sa ilang nasod tungod sa ilang kabangis.
20 Laglagon ang ilang mga lungsod ug maawaaw kini. Ug mahibaloan nila nga ako mao ang Ginoo.’ ”
21 Miingon na usab ang Ginoo kanako,
22 “Tawo, nganong may panultihon sa Israel nga nagaingon, ‘Daghan nang nanglabay nga mga panahon, apan wala man lagi matuman ang mga panagna’?
23 Ingna sila nga ako, ang Ginoong Dios, motapos niini nga panultihon ug dili na gayod nila kini hisgotan pa sa Israel. Ug ingna sila nga hapit na matuman ang mga panagna.
24 Kay mawala na gayod sa Israel ang dili tinuod nga mga panan-awon o bakak nga mga panagna.
25 Kay kon ako, ang Ginoo, maoy mosulti, matuman gayod. Sa dili madugay, matuman na ang akong giingon batok kaninyong mga masinupakon nga katawhan. Mahitabo kini sa inyong panahon. Ako, ang Ginoong Dios, ang nag-ingon niini.”
26 Miingon pa gayod ang Ginoo kanako,
27 “Tawo, nagaingon ang katawhan sa Israel nga ang imong mga panan-awon ug mga tagna dugay pang mahitabo.
28 Busa isulti kini kanila: ‘Ako, ang Ginoong Dios, nag-ingon nga sa dili madugay matuman na ang akong giingon. Oo, mahitabo na kini.’ ”