3 O mga bukid sa Israel, mga bungtod, mga agianan sa tubig, ug mga kapatagan, pamatia ninyo ang ginaingon sa Ginoong Dios: Padad-an ko kamog gira, ug panggub-on ko ang inyong mga simbahanan diha sa habog nga mga dapit.
4 Mangaguba ang inyong mga halaran apil na ang mga halaran nga sunoganan sa mga insenso, ug pamatyon ko ang inyong mga lumulupyo atubangan sa inyong mga dios-dios.
5 Ibutang ko ang inyong mga patayng lawas atubangan sa inyong mga dios-dios ug katagon ko ang inyong mga bukog palibot sa inyong mga halaran.
6 Ang inyong matag lungsod panglaglagon. Mangadugmok ang inyong mga simbahanan diha sa habog nga mga dapit, mga dios-dios, mga halaran, apil na ang mga halaran nga sunoganan sa mga insenso, ug ang uban pang sama niini nga inyong mga hinimo.
7 Mangamatay ang inyong mga lumulupyo, ug mahibaloan ninyo nga ako mao ang Ginoo.
8 “Apan dili ko kamo hutdon ug pamatay. Ang uban kaninyo makaikyas sa gira ug magkatag kamo ngadto sa ubang mga nasod
9 ingon nga mga bihag. Didto mahinumdoman nila ako, ug makaamgo sila nga gipasubo nila ako sa ilang pagluib ug pagpasulabi sa mga dios-dios. Kangil-aran nila ang ilang kaugalingon tungod sa ilang daotan ug mangil-ad nga mga buhat.