9 ingon nga mga bihag. Didto mahinumdoman nila ako, ug makaamgo sila nga gipasubo nila ako sa ilang pagluib ug pagpasulabi sa mga dios-dios. Kangil-aran nila ang ilang kaugalingon tungod sa ilang daotan ug mangil-ad nga mga buhat.
10 Ug mahibaloan nila nga ako mao ang Ginoo, ug tinud-on ko ang akong giingon nga ipahamtang ko kini kanila nga katalagman.”
11 Unya miingon ang Ginoong Dios kanako, “Isumbag ang imong kumo sa imong palad, ug ibundak ang imong tiil, ug singgit, ‘Gaba!’ sa katawhan sa Israel, tungod sa tanan nilang daotan ug mangil-ad nga mga buhat. Mao kini ang hinungdan nga mangamatay sila pinaagi sa gira, kagutom, ug balatian.
12 Kadtong atua sa layo mamatay sa balatian. Ang anaa sa duol mamatay sa gira. Ug ang mahibilin mamatay sa kagutom. Niining paagiha ipahamtang ko ang akong kapungot kanila.
13 Ug mahibaloan nila nga ako mao ang Ginoo kon ang mga patayng lawas sa ilang mga katagilungsod magkatag uban sa ilang mga dios-dios diha palibot sa mga halaran, sa taas nga mga bungtod, sa kinatumyan sa mga bukid, sa ilalom sa labong nga kahoy, ug sa punoan sa labong nga mga kahoyng terebinto, diin sila nagahalad ug insenso ngadto sa ilang mga dios-dios.
14 Silotan ko sila bisan asa sila magpuyo. Himuon kong awaaw ang ilang yuta gikan sa disyerto sa habagatan paingon sa Diblah sa amihan, ug mahibaloan nila nga ako mao ang Ginoo.”