1 “‘Aua le atuatuvale o ‘outou loto; ‘ia ‘outou fa‘atuatua i le Atua, ‘ia fa‘atuatua mai fo‘i ‘iā te a‘u.
2 E tele mea e nonofo ai i le maota o lo‘u Tamā; ‘ana leai, ‘ua ‘ou fai atu ‘iā te ‘outou; ‘ou te alu e sauni se mea e nonofo ai ‘outou.
3 ‘Āfai fo‘i ‘ou te alu ma sauni se mea e nonofo ai ‘outou, ‘ou te toe sau, ‘ou te talia fo‘i ‘outou ‘ia fa‘atasi ma a‘u; ‘ina ‘ia i ai ‘outou i le mea ‘ou te i ai a‘u.
4 ‘Ua ‘outou iloa le mea ‘ou te alu i ai, ‘ua ‘outou iloa fo‘i le ala.”
5 ‘Ua fai mai Toma ‘iā te ia, “Le Ali‘i e, matou te lē iloa le mea ‘e te maliu atu i ai, matou te mafaia fa‘apefea ‘ona iloa o le ala?”
6 ‘Ua fetalai atu Iesu ‘iā te ia, “O a‘u nei le ala, ma le ‘upu moni, ma le ola; e lē alu atu lava se tasi i le Tamā, pe a lē ui mai ‘iā te a‘u.
7 ‘Ana iloa e ‘outou o a‘u, po ‘ua iloa fo‘i e ‘outou lo‘u Tamā; e amata nei fo‘i ‘ona iloa o ia e ‘outou; tou te va‘ai fo‘i ‘iā te ia.”
8 ‘Ua fai mai Filipo ‘iā te ia, “Le Ali‘i e, ‘ia e fa‘ailoa mai le Tamā ‘iā te i matou, ‘ona gata ai lea o matou mana‘o.”
9 ‘Ua fetalai atu Iesu ‘iā te ia, “Filipo e, ‘ua leva ‘ona ‘ou i ai ‘iā te ‘outou, ‘ae tou le‘i iloa ‘ea a‘u? O lē ‘ua va‘ai mai ‘iā te a‘u, ‘ua va‘ai o ia i le Tamā, se a fo‘i ‘e te fai mai ai, ‘Fa‘ailoa mai le Tamā ‘iā te i matou?’
10 ‘E te lē talitonu ‘ea, o a‘u o i totonu o le Tamā, o le Tamā fo‘i o i totonu ‘iā te a‘u? O ‘upu ‘ou te tautala atu ai ‘iā te ‘outou, ‘ou te lē tautala fua na o a‘u; a o le Tamā o lo‘o nofo i totonu ‘iā te a‘u, o ia lava na te faia ana galuega.
11 ‘Ia ‘outou talitonu mai ‘iā te a‘u, o a‘u o i totonu o le Tamā, o le Tamā fo‘i o i totonu ‘iā te a‘u; a lē o lea ‘ia ‘outou talitonu mai ‘iā te a‘u ‘ona o ia galuega.
12 E moni, e moni, ‘ou te fai atu ‘iā te ‘outou, o lē talitonu mai ‘iā te a‘u, e faia lava e ia o galuega ‘ou te faia; e fai fo‘i e ia mea e sili i ia mea, auā ‘ou te alu i lo‘u Tamā.
13 O mea uma fo‘i tou te ole atu ai i lo‘u igoa, ‘ou te faia lava; ‘ina ‘ia vi‘ia le Tamā ‘ona o le Atali‘i.
14 ‘Āfai tou te ole atu i se mea i lo‘u igoa, ‘ou te faia lava.
15 “‘Āfai tou te alofa mai ‘iā te a‘u, ‘ia ‘outou tausi mai i a‘u poloa‘iga.
16 ‘Ou te fai atu fo‘i i le Tamā, ‘ona foa‘i mai ai lea e ia ‘iā te ‘outou le tasi Fesoasoani, ‘ina ‘ia tumau pea o ia ‘iā te ‘outou e fa‘avavau;
17 o ia o le Agaga o le ‘upu moni, e lē mafai e le lalolagi ‘ona talia o ia, auā ‘ua lē va‘aia o ia, ‘ua lē iloa fo‘i o ia; a o ‘outou, ‘ua ‘outou iloa o ia, auā e tumau pea ia ‘iā te ‘outou, e i ai fo‘i o ia i totonu ‘iā te ‘outou.
18 “‘Ou te lē tu‘ua ‘outou o mātuaoti, ‘ou te sau ‘iā te ‘outou.
19 E toe itiiti ‘ona lē va‘ai mai lea o le lalolagi ‘iā te a‘u, ‘ae va‘ai mai pea ‘outou ‘iā te a‘u; ‘ou te ola a‘u, o le mea lea e ola ai fo‘i ‘outou.
20 O lea aso e iloa ai e ‘outou, ‘ou te i totonu o lo‘u Tamā; o ‘outou fo‘i o i totonu ‘iā te a‘u, o a‘u fo‘i o i totonu ‘iā te ‘outou.
21 “O lē ‘ua ‘iā te ia a‘u poloa‘iga ma tausi i ai, o ia lea e alofa mai ‘iā te a‘u; o lē alofa mai fo‘i ‘iā te a‘u, e alofaina o ia e lo‘u Tamā; ‘ou te alofa fo‘i ‘iā te ia, ma ‘ou fa‘aali ‘iā te ia.”
22 ‘Ua fai mai ‘iā te ia o Iuta, (e lē o le Sekara lea,) “Le Ali‘i e, pe se a le mea o le a e fa‘aali mai ai oe ‘iā te i matou, ‘ae lē o le lalolagi?”
23 ‘Ona tali atu lea o Iesu, ‘ua fa‘apea atu ‘iā te ia, “‘Āfai e alofa mai se tasi ‘iā te a‘u, e tausia e ia la‘u ‘upu; e alofa fo‘i lo‘u Tamā ‘iā te ia; e ō mai fo‘i i mā‘ua ‘iā te ia, matou te nonofo ma ia.
24 O lē lē alofa ‘iā te a‘u, e lē tausia e ia a‘u ‘upu, o le ‘upu fo‘i tou te fa‘alogologo i ai, e lē sa‘u lea, a o le ‘upu a le Tamā ‘ua ‘auina mai a‘u.
25 “O mea ia ‘ua ‘ou fai atu ‘iā te ‘outou, manū o tatou nonofo ma ‘outou.
26 A o le Fesoasoani, o le Agaga Pa‘ia lea, e ‘auina mai e le Tamā i lo‘u igoa o ia lava na te a‘oa‘o ‘iā te ‘outou i mea uma lava; e fa‘amanatu mai fo‘i e ia ‘iā te ‘outou i mea uma na ‘ou fai atu ai ‘iā te ‘outou.
27 “‘Ou te tu‘uina atu ‘iā te ‘outou le manuia; o lo‘u manuia ‘ou te avatu ai ‘iā te ‘outou; ‘ou te lē avatu ‘iā te ‘outou fa‘apei ‘ona avatu e le lalolagi. ‘Aua le atuatuvale o ‘outou loto, ‘aua fo‘i tou te matata‘u.
28 ‘Ua ‘outou fa‘alogo mai, ‘ua ‘ou fai atu ‘iā te ‘outou, ‘‘Ou te alu ma ‘ou toe sau ‘iā te ‘outou.’ ‘Ana ‘outou alofa mai ‘iā te a‘u, po ‘ua ‘outou ‘oli‘oli i lo‘u fai atu, ‘ou te alu atu i le Tamā; auā e sili lo‘u Tamā ‘iā te a‘u.
29 ‘Ua ‘ou fai atu nei fo‘i ‘iā te ‘outou a o le‘i taunu‘u; ‘ina ‘ia ‘outou talitonu mai pe a taunu‘u.
30 ‘Ou te lē toe tautala atu ‘iā te ‘outou i ni ‘upu e tele; auā o le a sau le ali‘i o lenei lalolagi, ‘ae lē maua e ia se mea ‘iā te a‘u.
31 Peita‘i ‘ina ‘ia iloa e le lalolagi, ‘ou te alofa i le Tamā fa‘apei ‘ona poloa‘i mai fo‘i o le Tamā ‘iā te a‘u, e fa‘apea lava ‘ona ‘ou faia.Tutū ia i luga, ‘inā tatou ō ‘ese ia.#