1 ‘Ua maliu ane o Iesu, ‘ua silafia le tagata ‘ua tauaso talu ‘ina fānau mai.
2 ‘Ona fesili mai lea o ona so‘o ‘iā te ia, ‘ua fa‘apea mai, “Rapi e, po o ai ‘ea ‘ua agasala, po o ia nei, po o ona mātua, ‘ina ‘ua fānau mai o ia e tauaso?”
3 ‘Ua tali atu Iesu, “E le‘i agasala lenei tagata, po o ona mātua; ‘ae peita‘i ‘ina ‘ia fa‘aalia ai o galuega a le Atua ‘iā te ia.
4 E tatau ‘ona ‘ou faia galuega a lē ‘ua ‘auina mai a‘u, manū o ao; a o‘o i le po, e lē mafaia e se tasi ‘ona galue ai.
5 Manū ‘ou i ai i le lalolagi, o a‘u o le malamalama o le lalolagi.”
6 ‘Ua fetalai atu nei ‘upu, ‘ona feanu ifo lea o ia i le ‘ele‘ele; ‘ona faia lea o le palapala i le feanuga, ‘ua nini mata o le tauaso i le palapala;
7 ‘ona fa‘apea atu lea o Iesu ‘iā te ia, “Alu ia, ‘inā mulumulu i le tā‘elega i Seloa,” (o lona uiga pe a fa‘amatalaina, o le ‘auina.) ‘Ona alu lea o ia, ‘ua mulumulu, ‘ua toe fo‘i mai, ‘ua va‘ai.
8 ‘Ona fai ane lea o ē na tuā‘oi ma ia, ma ē na mua‘i iloa o ia ‘ina o tauaso, “E lē o ia ‘ea lenei sa nofo ma ‘aisi atu i mea?”
9 ‘Ua fa‘apea isi, “O ia lenei;” a ‘ua fa‘apea isi, “‘Ua foliga ‘iā te ia;” a o ia ‘ua fai mai, “O a‘u lava lenei.”
10 ‘Ona fai atu lea o i latou ‘iā te ia, “Pe na fa‘apefea ‘ona fa‘apupulaina ou mata?”
11 ‘Ua tali mai o ia, ‘ua fa‘apea mai, “O le tasi tagata e igoa ‘iā Iesu ‘ua na faia le palapala, ‘ua nini ai o‘u mata; ‘ua fai mai fo‘i ‘iā te a‘u, ‘Alu ia i le tā‘elega i Seloa, ma ia mulumulu ai.’ ‘Ona ‘ou alu ai lea, ma ‘ou mulumuluina, ‘ona ‘ou va‘ai ai lea.”
12 ‘Ona fai atu lea o i latou ‘iā te ia, “Po o fea o i ai o ia?”‘Ua fa‘apea mai o ia, “‘Ou te lē iloa.”
13 ‘Ua latou ta‘ita‘iina lē sa tauaso i le ‘au faresaio.
14 O le sapati fo‘i na fai ai e Iesu le palapala, ma fa‘apupulaina ona mata.
15 ‘Ona toe fesili lea o le ‘au faresaio ‘iā te ia, pe na fa‘apefea ‘ona va‘ai o ia. ‘Ua fa‘apea mai o ia ‘iā te i latou, “Na tu‘u mai e ia le palapala i o‘u mata, na ou mulumuluina, o lenei ‘ua ‘ou va‘ai.”
16 ‘Ona fai ane lea o isi o le ‘au faresaio, “E lē mai le Atua lenei tagata, auā ‘ua lē tausi e ia le sapati.”‘Ua fa‘apea isi, “Pe mafai fa‘apefea e se tagata agasala ‘ona fai o fa‘ailoga fa‘apenā?” O lea ‘ua vaeluaina ai i latou.
17 ‘Ona toe fa‘apea atu lea o i latou i le tauaso, “Pe se a lau ‘upu ‘iā te ia, auā ‘ua fa‘apupula e ia i ou mata?”‘Ua fa‘apea mai o ia, “O ia o le perofeta.”
18 ‘Ae le‘i talitonu Iutaia o ia sa tauaso, ma ‘ua va‘ai, se‘ia vala‘auina e i latou o mātua o lē na fa‘apupulaina ona mata.
19 ‘Ona latou fesili atu lea ‘iā te i lā‘ua, ‘ua fa‘apea atu, “Po o la ‘oulua tama lenei, sa ‘oulua fai mai ai, sa fānau mai o ia o tauaso? Pe na fa‘apefea ‘ona va‘ai nei?”
20 ‘Ua tali mai ona mātua ‘iā te i latou, ‘ua fa‘apea mai, “‘Ua mā iloa o la ma tama lenei, na fānau mai o tauaso.
21 ‘Ae ma te le‘i iloa pe na fa‘apefea ‘ona va‘ai nei; ma te le‘i iloa fo‘i po o ai lē na fa‘apupulaina ona mata. ‘Ua matua o ia; ‘ia ‘outou fesili atu ‘iā te ia, ‘ona tali mai ai lea o ia.”
22 ‘Ua fa‘apea ‘ona fai atu ona mātua, auā ‘ua la fefefe ‘iā Iutaia, auā fo‘i ‘ua i‘u le filifiliga a Iutaia ‘āfai e ta‘ua e se tasi, o le Keriso o ia, ‘ona tulia ai lea o ia i le sunako.
23 O le mea lea ‘ua fa‘apea atu ai ona mātua, “‘Ua matua o ia, ‘ia ‘outou fesili atu ‘iā te ia.”
24 ‘Ona latou toe vala‘au lea i le tagata sa tauaso, ma fa‘apea atu ‘iā te ia, “Avatu ia le vi‘iga i le Atua; ‘ua matou iloa o le tagata agasala lenā.”
25 ‘Ona tali mai ai lea o ia, ‘ua fa‘apea mai, “‘Ou te lē iloa pe se tagata agasala o ia; o le mea e tasi ‘ua ‘ou iloa o a‘u le tauaso, ‘ua ‘ou va‘ai nei.”
26 ‘Ona toe fa‘apea atu lea o i latou ‘iā te ia, “Pe se a se mea na ia faia ‘iā te oe? Pe na fa‘apefea ‘ea ‘ona fa‘apupulaina e ia ou mata?”
27 ‘Ua tali mai o ia ‘iā te i latou, “‘Ua uma ‘ona ‘ou ta‘u atu ‘iā te ‘outou, ‘ae tou te le‘i fa‘alogo mai lava. Pe se a le mea tou te toe fia fa‘alogo mai ai? Tou te manana‘o ‘ea ‘ia fai ‘outou mōna so‘o?”
28 ‘Ona ‘upu leaga lea o i latou ‘iā te ia, ‘ua fa‘apea atu, “O oe lona so‘o; a o i matou nei, o so‘o o Mose i matou.
29 ‘Ua matou iloa, na fetalai mai le Atua ‘iā Mose; a o lenā tagata matou te lē iloa pe maifea ia.”
30 ‘Ua tali mai le tagata, ‘ua fa‘apea mai ‘iā te i latou, “O le mea e ofo ai lenei, ‘ina ‘ua lē iloa e ‘outou pe maifea o ia, a ‘ua fa‘apupula mai e ia o‘u mata.
31 ‘Ua tatou iloa e lē fa‘afofoga le Atua i ē agasala; ‘ae peita‘i a mata‘u se tasi i le Atua, ma fai lona finagalo, ‘ona fa‘afofoga mai lea o le Atua ‘iā te ia.
32 E le‘i fa‘alogo lava talu mai le vavau, ‘ona fa‘apupulaina e se tasi o mata o lē na fānau mai o tauaso.
33 ‘Ana lē mai le Atua lenā tagata, na te lē mafaia ‘ona fai se mea e tasi.”
34 ‘Ua latou tali atu, ‘ua fa‘apea atu ‘iā te ia, “‘Ua fānau mai oe ‘ua tumu i le agasala, ‘e te a‘oa‘o mai ‘ea ‘iā te i matou?” ‘Ona latou tulia lea o ia i tua.
35 ‘Ua fa‘afofoga Iesu na latou tulia o ia i tua; ‘ua ia silafia o ia, ‘ona fa‘apea atu lea ‘iā te ia, “Po ‘ua e fa‘atuatua i le Atali‘i o le tagata?”
36 ‘Ua tali mai o ia, ‘ua fa‘apea mai, “Le Ali‘i e, o ai ‘ea o ia, ‘ina ‘ia ‘ou fa‘atuatua ‘iā te ia?”
37 ‘Ua fetalai atu Iesu ‘iā te ia, “‘Ua e va‘ai ‘iā te ia, o ia fo‘i lenei ‘ua tautala ma oe.”
38 ‘Ona fa‘apea mai lea o ia, “Le Ali‘i e, ‘ua ‘ou fa‘atuatua lava;” ‘Ona ifo lea o ia ‘iā Iesu.
39 ‘Ona fa‘apea ane ai lea o Iesu, “O le fa‘amasinoga, o le mea lea na ‘ou sau ai i le lalolagi nei; ‘ina ‘ia latou va‘ai o ē lē va‘ava‘ai, ‘ia fa‘atauasoina fo‘i i latou o ē va‘ai.”
40 ‘Ua fa‘alogo mai i ia mea nisi o le ‘au faresaio sa latou i ai ma ia, ‘ona fa‘apea mai lea o i latou ‘iā te ia, “O matou ‘ea o ni tauaso?”
41 ‘Ua fa‘apea atu Iesu ‘iā te i latou, “‘Āfai ‘ana ‘outou tauaso, e leai sa ‘outou agasala; o lenei, ‘ua ‘outou fai mai, ‘Matou te va‘ai;’ o lea e tumau ai pea la ‘outou agasala.#