1 ‘Ona ‘ave lea e Pilato ‘iā Iesu, ‘ua sasa fo‘i ‘iā te ia.
2 ‘Ua ta‘ata‘ai fo‘i e fitafita o la‘au tuitui, ‘ua fai ai le pale, ‘ua fa‘ae‘e i lona ao, ‘ua fa‘a‘ofu fo‘i ‘iā te ia i le ‘ofu pāuli.
3 ‘Ona latou fai atu lea, “Talofa! le tupu o tagata Iutaia.” ‘Ua latou pō atu fo‘i ‘iā te ia.
4 ‘Ona toe alu lea o Pilato i fafo, ma fai atu ‘iā te i latou, “Fa‘auta, ‘ou te ta‘ita‘iina atu o ia i fafo ‘iā te ‘outou, ‘ina ‘ia ‘outou iloa ‘ou te le‘i iloa se mea e sala ai o ia.”
5 ‘Ona maliu atu lea o Iesu i fafo, ‘ua pale i le pale tuitui, ma ‘ofu i le ‘ofu pāuli. ‘Ua fai atu fo‘i Pilato ‘iā te i latou, “Fa‘auta i le tagata”
6 ‘Ua va‘ai atu ‘iā te ia le ‘au ositaulaga sili ma ‘au‘auna, ‘ona ‘alalaga lea o i latou, ‘ua fa‘apea, “‘Inā fa‘asatauro ia, fa‘asatauro ia.”‘Ua fai atu Pilato ‘iā te i latou, “‘Inā ‘ave ia e ‘outou ‘iā te ia, ma ‘ia ‘outou fa‘asatauroina; auā ‘ou te le‘i iloa se mea e sala ai o ia.”
7 ‘Ua tali mai Iutaia ‘iā te ia, “O ‘iā te i matou le tulafono, e tusa fo‘i i la matou tulafono ‘ona oti o ia, auā ‘ua fai o ia e ia ma Alo o le Atua.”
8 ‘Ua fa‘alogo atu Pilato i lea ‘upu, ‘ua atili ai lona mata‘u;
9 ‘ona toe ulu atu lea o ia i le maota o le kovana, ‘ua fai mai ‘iā Iesu, “Se fea ‘ea oe?”A o Iesu, e le‘i tali atu lava ‘iā te ia.
10 ‘Ona fa‘apea mai lea o Pilato ‘iā te ia, “‘E te lē gagana mai ‘ea ‘iā te a‘u? Po ‘ua e lē iloa, o ‘iā te a‘u le pule e fa‘asatauro ‘iā te oe, o ‘iā te a‘u fo‘i le pule e tatala ‘iā te oe?”
11 ‘Ua tali atu Iesu, “E leai sau pule ‘iā te a‘u, ‘ana lē tu‘uina mai ‘iā te oe mai lugā; o le mea lea e tele ai le leaga o lē na tu‘uina mai a‘u ‘iā te oe.”
12 Talu ai ‘ona sā‘ili e Pilato e tatala ‘iā te ia; a ‘ua ‘alalaga Iutaia, ‘ua fa‘apea atu, “‘Āfai ‘e te tatalaina lenā tagata, ‘e te lē alofa ‘iā Kaisara; o sē fia fai ma tupu, e tete‘e o ia ‘iā Kaisara.”
13 ‘Ua fa‘alogo atu Pilato i lea ‘upu, ‘ona ta‘ita‘i lea o ia ‘iā Iesu i fafo; ‘ua nofo fo‘i o ia i le nofoa fa‘amasino i le mea e ta‘ua, o le Paepae, a o le ‘upu Eperu, o Kapata.
14 O le aso o le sauniga o le paseka lea aso, ‘ua o‘o fo‘i i le tutonu o le lā, ‘ua fai mai o ia ‘iā Iutaia, “Fa‘auta i lo ‘outou tupu.”
15 A ‘ua ‘alalaga i latou, “‘Ave ‘ese ia, ‘ave ‘ese ia; ‘inā fa‘asatauro ‘iā te ia.”‘Ua fa‘apea mai Pilato ‘iā te i latou, “‘Ou te fa‘asatauro ‘ea i lo ‘outou tupu?”‘Ua tali atu le ‘au ositaulaga ‘iā te ia, “E leai so matou tupu, ‘ua nā o Kaisara.”
16 ‘Ona ia tu‘uina atu lea o ia ‘iā te i latou, ‘ina ‘ia fa‘asatauroina.
17 ‘Ona ‘ave lea o Iesu e i latou, ‘ua ta‘ita‘iina atu; ‘ua ‘ave e ia lona satauro, ‘ua maliu atu fo‘i i le mea e ta‘ua, o le mea o i ai le ulupo‘o, ‘ua igoa i le ‘upu Eperu, o Kolokota.
18 ‘Ua latou fa‘asatauro ‘iā te ia i lea mea, ‘atoa ma isi tagata e to‘alua fa‘atasi ma ia, o le tasi i le tasi itū, ma le isi i le isi itū, a o i totonu Iesu.
19 ‘Ua tusia fo‘i e Pilato o le tusi fa‘ailoga, ma tu‘u i luga i le satauro; o le ‘upu lenei ‘ua tusia, “O IESU LE NASARETA O LE TUPU O TAGATA IUTAIA.”
20 ‘Ona faitau lea o lea fa‘ailoga e Iutaia e to‘atele, auā o le mea na fa‘asatauroina ai Iesu, e lata ane lea i le ‘a‘ai; ‘ua tusia fo‘i i le gagana Eperu, ma le gagana Roma ma le gagana Eleni.
21 ‘Ona fa‘apea atu lea o le ‘au ositaulaga o Iutaia ‘iā Pilato, “‘Aua ‘e te tusi, ‘O le tupu o tagata Iutaia;’ a ‘ia fa‘apea, ‘‘Ua fai mai o ia, o a‘u o le tupu o tagata Iutaia.’”
22 ‘Ua tali atu Pilato, “O le mea ‘ua ‘ou tusia, ‘ua ‘ou tusia lava.”
23 ‘Ua fa‘asatauroina Iesu e tagata tau, ‘ona latou ‘ave lea o ona ‘ofu, ‘ua vaefāina, ta‘itasi le tagata tau ma lana mea; i le ma le ‘ofu tino; ‘ae leai se su‘iga i le ‘ofu tino, ‘ua lalaga ‘ato‘atoa, e āfua mai i le pito i luga.
24 ‘Ona fetautalatala‘i lea o i latou, “‘Aua tatou te saeia, ‘ae se‘i tatou fai ai le vili, po o ai lē fai mōna;” ‘ina ‘ia taunu‘u ai le Tusi:‘Ua fa‘apea mai, “‘Ua latou tufatufaina o‘u ‘ofu ‘iā te i latou,‘ua latou faia fo‘i le vili i lo‘u ‘ofu tino.”O mea lava ia na faia e tagata tau.
25 Sa tutū latalata ane i le satauro o Iesu lona tinā, ma le uso o lona tinā, o Maria le avā a Kalopa, ma Maria le Makatala.
26 ‘Ua silasila atu Iesu i lona tinā, ma le so‘o ‘ua alofaina e ia, ‘ua tutū mai, ‘ona fetalai atu lea o ia i lona tinā, “Sena e, fa‘auta, o lau tama.”
27 ‘Ua fa‘apea atu fo‘i o ia i lea so‘o, “Fa‘auta, o lou tinā,” Talu fo‘i lea itū aso ‘ua ‘ave o ia e lea so‘o i lona ‘āiga.
28 Mulimuli ane ‘ua silafia e Iesu ‘ua uma ‘ona taunu‘u o mea uma, ‘ua ia fetalai ane (‘ina ‘ia taunu‘u ai le Tusi), “‘Ua ‘ou fia inu.”
29 Sa i ai fo‘i le fagu ‘ua tumu i le vineka; ‘ua latou fufui le omomi i le vineka, ‘ua tu‘u i luga i le isopo, ma tu‘u atu ai i lona fofoga.
30 ‘Ua talia le vineka e Iesu, ‘ona fetalai ane lea o ia, “‘Ua taunu‘u;” ‘ua fa‘agaugau lona ao, ‘ona tu‘uina atu lea o lona agaga.
31 ‘Ona fa‘atoga atu lea o Iutaia ‘iā Pilato ‘ia gauia o latou vae, ‘ia ‘ave‘eseina fo‘i i latou, ‘ina ‘ia lē tumau pea o tino i luga o satauro i le sapati auā o le aso o le sauniuniga lea, (o le aso sili fo‘i lea sapati.)
32 ‘Ona ō ane lea o tagata tau, ‘ua gaui i vae o le tasi ma le tasi o ē na fa‘asatauroina fa‘atasi ma ia.
33 A ‘ua o‘o i latou ‘iā Iesu, ‘ua latou iloa ‘ua maliu lava o ia, ‘ona lē gauia ai lea o ona vae;
34 a o le tasi tagata tau ‘ua tutu‘i lona itū i le tao; ‘ona sisina loa mai lea o le toto ma le vai.
35 O ia na matamata i ai, ‘ua molimau ai, e moni fo‘i lana mau; ‘ua iloa lava e ia e moni lava lana ‘upu, ‘ina ‘ia ‘outou talitonu ai.
36 Auā ‘ua faia ia mea ‘ia taunu‘u ai le Tusi, “E lē gauia sona ivi.”
37 ‘Ua toe fa‘apea fo‘i le tasi Tusi, “E va‘ai atu i latou ‘iā te ia na latou tuia.”
38 ‘Ua mavae ia mea, ‘ona fa‘anoi atu lea o Iosefa le Arimataia ‘iā Pilato, ‘ina ‘ia ‘ave ‘ese o ia le tino o Iesu; (o ia o le so‘o o Iesu, ‘ae fa‘alilolilo ‘ona o le fefe ‘iā Iutaia;) ‘ua tu‘uina mai fo‘i e Pilato. ‘Ona alu ane lea o ia, ‘ua ‘ave le tino o Iesu.
39 ‘Ua alu ane fo‘i Nikotemo, o lē na mua‘i alu ‘iā Iesu i le po, ‘ua na ‘ave fo‘i le muro fefiloi ma le aloe, po ‘ua selau pauna.
40 ‘Ona la ‘ave lea o le tino o Iesu, ‘ua teuteu i le ‘ie e tanuma‘i ‘atoa ma mea manogi, fa‘apei o le tu a Iutaia i le fa‘ata‘imū‘aga o le tanuga.
41 Sa i ai i le mea na fa‘asatauroina ai o ia le fanua; ‘ua i lea fanua fo‘i le tu‘ugamau fou, e le‘i tu‘uina ai lava se tasi.
42 ‘Ona la tu‘uina ai lea o Iesu i lea mea, ‘ona o le sauniga a tagata Iutaia; auā ‘ua latalata mai le tu‘ugamau.