1 ‘Ua mavae ia mea, ‘ona femaliua‘i ai lea o Iesu i Kalilaia; auā e le‘i finagalo o ia e femaliua‘i i Iutaia, auā ‘ua manana‘o tagata Iutaia e fia fasioti ‘iā te ia.
2 ‘Ua latalata le tausamiga o Iutaia, o le tausamiga o fale apitaga.
3 O le mea lea ‘ua fai mai ai ona uso ‘iā te ia, “‘Ia e tu‘ua lenei mea ma e alu ane i Iutaia, ‘ina ‘ia va‘ava‘ai atu fo‘i ou so‘o i au galuega ‘e te faia.
4 Auā e leai se tasi e fai fa‘alilolilo se mea pe a mana‘o o ia e fia fa‘aalia o ia; ‘āfai ‘ua e faia ia mea, ‘ia e fa‘aalia oe e oe i le lalolagi.”
5 Auā o ona uso fo‘i, latou te le‘i talitonu ‘iā te ia.
6 ‘Ona fetalai atu ai lea o Iesu ‘iā te i latou, “E le‘i o‘o mai o‘u aso; a o aso uma lava e tatau mo ‘outou.
7 E lē mafai e le lalolagi ‘ona ‘ino‘ino ‘iā te ‘outou; ‘ae ‘ino‘ino mai ‘iā te a‘u, auā ‘ou te molimau i ai ‘ua leaga ana amio.
8 Ō a‘e ia ‘outou i lea tausamiga; ‘ou te lē alu a‘e nei i lea tausamiga, auā e le‘i o‘o mai lo‘u taimi.”
9 ‘Ua ia fetalai atu ia mea ‘iā te i latou, a ‘ua nofo pea o ia i Kalilaia.
10 ‘Ua ō a‘e ona uso, ‘ona maliu a‘e lea o ia i le tausamiga, e le‘i fa‘aali, ‘ae peiseaī ‘ua fa‘alilolilo.
11 ‘Ona tausā‘ili ai lea o Iutaia ‘iā te ia i le tausamiga, ‘ua fa‘apea ane, “O ifea o i ai o ia?”
12 ‘Ua tele fo‘i le femusua‘i o le motu o tagata ‘iā te ia; ‘ua fa‘apea isi, “O le tagata lelei o ia;” a ‘ua fa‘apea isi, “E leai, a ‘ua ia fa‘asesē i le nu‘u.”
13 ‘Ae le‘i tautala fa‘aali se tasi ‘iā te ia, ‘ona o le mata‘u ‘iā Iutaia.
14 ‘Ua o‘o i le aso tuloto o le tausamiga, ‘ua maliu a‘e ai Iesu i le malumalu, ‘ua a‘oa‘o ai.
15 ‘Ona ofo ai lea o Iutaia, ‘ua fa‘apea ane, “Pe fa‘apefea ‘ea ‘ona poto o lenei tagata, ‘ae le‘i a‘oa‘oina o ia?”
16 ‘Ua fetalai atu Iesu ‘iā te i latou, ‘ua fa‘apea atu, “O la‘u a‘oa‘oga, e lē o sa‘u lava, a o lana na ‘auina mai a‘u.
17 ‘Ai se tasi e fia fai lona finagalo, e iloa ai e ia le a‘oa‘oga, pe mai le Atua, pe ‘ou te tautala fua lava a‘u.
18 O lē tautala fua ‘iā te ia, ‘ua sā‘ili e ia lona lava vi‘iga; a o lē sā‘ili ‘ia vi‘ia lē na ‘auina mai o ia, e fa‘amaoni lea, e leai fo‘i sana amioletonu.
19 “E le‘i tu‘uina atu ‘ea e Mose le tulafono ‘iā te ‘outou, ‘ae leai se tasi o ‘outou e fia fa‘alogo i le tulafono; pe se a le mea tou te fia fasioti ai ‘iā te a‘u?”
20 ‘Ona tali mai lea o le motu o tagata, ‘ua fa‘apea mai, “‘Ua ‘iā te oe le temoni. O ai ‘ea e fia fasioti ‘iā te oe?”
21 ‘Ua tali atu Iesu ‘iā te i latou, ‘ua fa‘apea atu, “‘Ua ‘ou faia le galuega e tasi, na ‘outou ofo ai uma lava.
22 O lea na tu‘u atu ai e Mose le peritome ‘iā te ‘outou, (e lē ‘ona ‘ua mafua ‘iā Mose, a o ‘outou tamā sa amataina,) o le sapati fo‘i tou te fa‘aperitomeina ai tagata.
23 Pe ‘āfai e peritomeina se tagata i le sapati, ne‘i solia le tulafono a Mose, pe se a le mea tou te ita mai ai ‘iā te a‘u, auā na ‘ou fa‘amālōlōina le tino ‘atoa o le tagata i le sapati?
24 ‘Aua le so‘ona fa‘amasino, a ‘ia fa‘amasino i le fa‘amasinoga tonu.”
25 ‘Ona fa‘apea ane lea o isi tagata o Ierusalema, “E lē o ia ‘ea lenei latou te fia fasiotia?
26 Fa‘auta fo‘i, o lo‘o tautala fa‘aali lava o ia, ‘ae lē fai atu sa latou ‘upu ‘iā te ia; po ‘ua iloa lava e le ‘au faipule o le Keriso moni lava lenei?
27 Peita‘i ‘ua tatou iloa le mea ‘ua sau ai lenei tagata; a o le Keriso, pe a maliu mai o ia, e leai se tasi na te iloa pe maifea o ia.”
28 ‘Ona ‘alaga lea o Iesu, a o a‘oa‘o o ia i le malumalu, ‘ua fa‘apea atu, “‘Ua ‘outou iloa a‘u, ‘ua iloa fo‘i e ‘outou le mea ‘ua ‘ou sau ai; ‘ou te le‘i sau fua lava a‘u, ‘ae ‘ua moni lava o ia ‘ua ‘auina mai a‘u, e le‘i iloa o ia e ‘outou;
29 a o a‘u, ‘ua ‘ou iloa o ia, auā mai ‘iā te ia lava a‘u; o ia fo‘i ‘ua ‘auina mai a‘u.”
30 ‘Ona latou fia pu‘e lea ‘iā te ia; ‘ae le‘i o‘o se lima o se tasi ‘iā te ia, auā e le‘i o‘o mai lona taimi.
31 ‘Ae to‘atele ‘ua fa‘atuatua ‘iā te ia nai le motu o tagata, ma latou fa‘apea ane, “Pe ā maliu mai le Keriso, e tele ‘ea fa‘ailoga e faia e ia i fa‘ailoga ‘ua faia e lenei tagata?”
32 ‘Ua fa‘alogo le ‘au faresaio i le femusua‘i o le motu o tagata ‘iā te ia i ia mea; ‘ona ‘a‘auina lea e le ‘au faresaio ma le ‘au ositaulaga sili o ‘au‘auna e pu‘e ‘iā te ia.
33 ‘Ona fa‘apea atu lea o Iesu ‘iā te i latou, “Toe itiiti nai aso ‘ou te i ai ‘iā te ‘outou, ‘ona ‘ou alu atu ai lea ‘iā te ia ‘ua ‘auina mai a‘u.
34 E sā‘ili ‘outou ‘iā te a‘u, ‘ae tou te lē iloaina a‘u; auā o le mea ‘ou te alu i ai, tou te lē mafai ‘ona ‘outou ō mai i ai.”
35 ‘Ona fa‘apea ane lea o Iutaia o le tasi i le tasi, “Po o fea a alu i ai o ia, e lē mafai ai ‘ona tatou iloa o ia? Pe alu o ia i ē ‘ua ta‘ape‘ape i Eleni, e a‘oa‘o ai fo‘i i Eleni?
36 O le a lenā ‘upu na ia fai mai ai, ‘E sā‘ili ‘outou ‘iā te a‘u, ‘ae tou te lē iloaina a‘u;’ ma ‘o le mea fo‘i ‘ou te i ai, tou te lē mafai ‘ona ō i ai?’”
37 O le toe aso, o le aso tele o le tausamiga, ‘ua tula‘i ai Iesu, ma ‘alaga, ‘ua fa‘apea atu, “‘Āfai e fia inu se tasi, ‘inā sau ia ‘iā te a‘u e inu ai.
38 O sē fa‘atuatua ‘iā te a‘u, e fa‘apei ‘ona fai mai o le Tusi, ‘E tafe mai o vaitafe mai totonu ‘iā te ia, o le vai ola lava.’”
39 ‘Ua fetalai atu o ia lenā ‘upu i le Agaga, e maua e i latou ‘ua fa‘atuatua ‘iā te ia; auā o ona po ia e le‘i maua ai le Agaga Pa‘ia, auā e le‘i o‘o Iesu i lona mamalu.
40 E to‘atele le motu o tagata ‘ua fa‘alogo i lea ‘upu, ‘ona fa‘apea ai lea o i latou, “O le tagata lenei o le perofeta lava o ia.”
41 ‘Ua fa‘apea fo‘i isi, “O le Keriso lenei;” a ‘ua fa‘apea isi, “Pe tupu mai le Keriso mai Kalilaia?
42 ‘Ua lē fai mai ‘ea le Tusi, e tupu mai le Keriso mai le fānauga a Tavita, mai Peteleema fo‘i, o le ‘a‘ai sa i ai Tavita?”
43 ‘Ua vaeluaina ai le motu o tagata ‘iā te ia,
44 ‘ua fia pu‘e atu ‘iā te ia nisi o i latou, ‘ae le‘i tago atu se lima o se tasi ‘iā te ia.
45 ‘Ua fo‘i atu ‘au‘auna i le ‘au ositaulaga sili ma le ‘au faresaio; ‘ona fa‘apea mai ai lea o i latou ‘iā te i latou, “Pe se a le mea ‘ua ‘outou lē ta‘ita‘i mai ai ‘iā te ia?”
46 ‘Ona tali atu lea o ‘au‘auna, “‘Ua leai lava se tagata e tautala pei o lenā tagata.”
47 ‘Ona tali mai lea o le ‘au faresaio ‘iā te i latou, “Po ‘ua fa‘asesēina fo‘i ‘outou?
48 Po ‘ua talia o ia e se tasi o le ‘au faipule, po o se tasi o le ‘au faresaio?
49 A o nei tagata ‘ua lē iloa le tulafono, ‘ua fetu‘uina lava i latou.”
50 ‘Ua fai atu Nikotemo ‘iā te i latou, o ia na alu ‘iā Iesu i le po, o le isi fo‘i o i latou,
51 “Pe fa‘asalaina ‘ea se tagata i la tatou tulafono, a o le‘i mua‘i fa‘alogologo ‘iā te ia, ma iloa ana mea ‘ua faia?”
52 ‘Ona tali mai lea o i latou, ‘ua fa‘apea mai ‘iā te ia, “Pe o oe ‘ea o se Kalilaia? ‘Ia e sā‘ili ma ia ē iloa, e lē tu mai lava se perofeta mai Kalilaia.”
53 ‘Ona ta‘itasi lea ma alu i lona fale.