15 “‘Āfai tou te alofa mai ‘iā te a‘u, ‘ia ‘outou tausi mai i a‘u poloa‘iga.
16 ‘Ou te fai atu fo‘i i le Tamā, ‘ona foa‘i mai ai lea e ia ‘iā te ‘outou le tasi Fesoasoani, ‘ina ‘ia tumau pea o ia ‘iā te ‘outou e fa‘avavau;
17 o ia o le Agaga o le ‘upu moni, e lē mafai e le lalolagi ‘ona talia o ia, auā ‘ua lē va‘aia o ia, ‘ua lē iloa fo‘i o ia; a o ‘outou, ‘ua ‘outou iloa o ia, auā e tumau pea ia ‘iā te ‘outou, e i ai fo‘i o ia i totonu ‘iā te ‘outou.
18 “‘Ou te lē tu‘ua ‘outou o mātuaoti, ‘ou te sau ‘iā te ‘outou.
19 E toe itiiti ‘ona lē va‘ai mai lea o le lalolagi ‘iā te a‘u, ‘ae va‘ai mai pea ‘outou ‘iā te a‘u; ‘ou te ola a‘u, o le mea lea e ola ai fo‘i ‘outou.
20 O lea aso e iloa ai e ‘outou, ‘ou te i totonu o lo‘u Tamā; o ‘outou fo‘i o i totonu ‘iā te a‘u, o a‘u fo‘i o i totonu ‘iā te ‘outou.
21 “O lē ‘ua ‘iā te ia a‘u poloa‘iga ma tausi i ai, o ia lea e alofa mai ‘iā te a‘u; o lē alofa mai fo‘i ‘iā te a‘u, e alofaina o ia e lo‘u Tamā; ‘ou te alofa fo‘i ‘iā te ia, ma ‘ou fa‘aali ‘iā te ia.”