1 ‘Ua silafia e le Ali‘i ‘ua fa‘alogo le ‘au faresaio, e to‘atele so‘o ‘ua faia e Iesu ma papatisoina, ‘ae to‘aitiiti a Ioane;
2 (peita‘i o Iesu, e le‘i papatiso e ia, na o ona so‘o,)
3 ‘ona tu‘ua lea e ia o Iutaia, a ‘ua toe maliu atu i Kalilaia.
4 E ao ‘ina ui atu o ia i Samaria.
5 ‘Ua o‘o atu o ia i le tasi ‘a‘ai o Samaria, o Sukara le igoa, e latalata ane i le fanua na avatu e Iakopo i lona atali‘i o Iosefa.
6 ‘Ua i ai le vaipuna o Iakopo. ‘Ua lē lavā fo‘i Iesu i lana malaga, ‘ona nofo ai lea o ia i luga o le vai, ‘ua o‘o po o le tu tonu o le lā.