7 E lē mafai e le lalolagi ‘ona ‘ino‘ino ‘iā te ‘outou; ‘ae ‘ino‘ino mai ‘iā te a‘u, auā ‘ou te molimau i ai ‘ua leaga ana amio.
8 Ō a‘e ia ‘outou i lea tausamiga; ‘ou te lē alu a‘e nei i lea tausamiga, auā e le‘i o‘o mai lo‘u taimi.”
9 ‘Ua ia fetalai atu ia mea ‘iā te i latou, a ‘ua nofo pea o ia i Kalilaia.
10 ‘Ua ō a‘e ona uso, ‘ona maliu a‘e lea o ia i le tausamiga, e le‘i fa‘aali, ‘ae peiseaī ‘ua fa‘alilolilo.
11 ‘Ona tausā‘ili ai lea o Iutaia ‘iā te ia i le tausamiga, ‘ua fa‘apea ane, “O ifea o i ai o ia?”
12 ‘Ua tele fo‘i le femusua‘i o le motu o tagata ‘iā te ia; ‘ua fa‘apea isi, “O le tagata lelei o ia;” a ‘ua fa‘apea isi, “E leai, a ‘ua ia fa‘asesē i le nu‘u.”
13 ‘Ae le‘i tautala fa‘aali se tasi ‘iā te ia, ‘ona o le mata‘u ‘iā Iutaia.