1 O le tausaga muamua o Kuresa le tupu o Peresia na fa‘aosoina ai e le ALI‘I le manatu o Kuresa le tupu o Peresia, ‘ina ‘ia taunu‘u ai le afioga a le ALI‘I na fai mai e Ieremia, ‘ona ia tala‘iina lea o le ‘upu i lona mālō uma ma na tusia i le tusi, ‘ua fa‘apea,
2 “O lo‘o fa‘apea ‘ona fai atu o Kuresa le tupu o Peresia, ‘Ua tu‘uina mai ‘iā te a‘u e le ALI‘I le Atua o le lagi o mālō uma o le lalolagi; o ia fo‘i ‘ua ia poloa‘i mai ‘iā te a‘u ‘ia ‘ou faia se fale mo ia i Ierusalema o lo‘o i Iuta.
3 O ai ‘ea o ‘iā te ‘outou ai lona nu‘u uma? ‘Ia ‘iā te ia lona Atua, ma ‘ia alu a‘e o ia i Ierusalema o lo‘o i Iuta ma fai le fale o le ALI‘I le Atua o Isaraelu, (o le Atua lava o ia,) o lo‘o i Ierusalema.
4 O i latou uma fo‘i o ē totoe i nu‘u uma ‘ua āumau ai o ia, ‘ia fesoasoani ‘iā te ia tagata o i le mea ‘ua mau ai o ia i ario ma auro, ma ‘oloa ma manu, ‘atoa ma taulaga ‘ua loto ‘ina fai mo le fale o le Atua o lo‘o i Ierusalema.”
5 ‘Ona tutū ai lea o matai sili o Iuta ma Peniamina ma le ‘au ositaulaga ma sa Levī, o i latou uma na fa‘aosoina o latou manatu e le Atua e ō a‘e e fai le fale o le ALI‘I o lo‘o i Ierusalema.
6 O i latou uma o vagavagai ‘iā te i latou na fesoasoani ‘iā te i latou i mea ario ma auro ma ‘oloa, ‘atoa ma manu, ma ‘oloa tāua e fa‘aopoopo i mea uma ‘ua loto ‘inā avatu.
7 ‘Ua ‘aumaia fo‘i e le tupu o Kuresa o mea o le fale o le ALI‘I, na ‘avea e Nepukanesa a‘i Ierusalema ma tu‘uina atu ai i le fale o ona atua;
8 ‘ua ‘aumaia fo‘i ia mea e Kuresa le tupu o Peresia i le lima o Metereta le tausi ‘oloa ma na faitauina mai ai ‘iā Sesepasara le ali‘i sili o Iuta.
9-10 O le faitau aofa‘i lenei o ia mea;o tanoa auro e tolu sefulu,o tanoa ario e afe,o polo e luafulu ma le iva,o ipu auro e tolu sefulu,o ipu ario e aupito ane i ipu sili e fa selau ma le sefulu,o isi mea e afe.
11 O mea uma o auro ma ario e lima o afe ma le fa o selau. Na ‘aveina a‘e e Sesepasara o ia mea uma fa‘atasi ma tagata o le tāfeaga na ‘aveina a‘e nai Papelonia i Ierusalema.