1 ‘Ua fa‘alogo o ē na ita mai ‘iā Iuta ma Peniamina ‘ua faia e tagata o le tāfeaga le malumalu mo le ALI‘I le Atua o Isaraelu;
2 ‘ona latou ō mai lea ‘iā Serupapelu ma matai sili ma ‘ua latou fa‘apea mai ‘iā te i latou, “Se‘i tatou faia ia le fale fa‘atasi ma ‘outou; auā ‘ua matou sā‘ili atu i lo ‘outou Atua, pei o ‘outou; o i matou fo‘i ‘ua matou fai taulaga ‘iā te ia, talu ona po o Esarata le tupu o Asuria, o lē na ‘aveina a‘e i matou ‘i‘inei.”
3 ‘Ona fai atu lea o Serupapelu ma Iosua ma matai sili uma o Isaraelu ‘iā te i latou, “Tatou te lē faia le fale o lo matou Atua ma ‘outou; na o i matou nei lava matou te faia le fale o le ALI‘I le Atua o Isaraelu, pei ‘ona fetalai mai le tupu o Kuresa le tupu o Peresia ‘iā te i matou.”
4 ‘Ona fa‘avaivaia lea o tagata o Iuta e tagata o le nu‘u ma latou fa‘aatuatuvaleina i latou a o faia le fale;
5 ‘ua latou fa‘a‘oloaina fo‘i ni ē faulalo e fa‘alavelave ‘iā te i latou, ‘ina ‘ia fa‘alēaogāina ai la latou filifiligā, i aso uma o Kuresa le tupu o Peresia, e o‘o fo‘i i le nofoa‘iga a Tariu le tupu o Peresia.
6 O le nofoa‘iga a Asueru, o le amataga o lana nofoa‘iga, ‘ua tusi atu ai e i latou e momoli i ē ‘ua nonofo i Iuta ma Ierusalema.
7 O ona aso fo‘i o Aretaseta sa tusi atu ai Piselama, o Metereta, o Taveele, ma i latou uma o ē na pule fa‘atasi ma i latou, ‘iā Aretaseta le tupu o Peresia; o ‘upu fo‘i o le tusi sa tusi i le gagana a Arama, sa fa‘amatalaina fo‘i i le gagana a Arama.
8 ‘Ua tusi atu Rekumu le fa‘amasino ma Semesai le tusi‘upu, se tusi e momoli ai Ierusalema ‘iā Aretaseta le tupu, ‘ua fa‘apea:
9 ‘Ona tusi atu lea o Rekumu le fa‘amasino, ma Semesai le tusi‘upu, ma i latou uma o ē na pule fa‘atasi ma i lā‘ua; o tagata o Tinai ma tagata o Afareseka, o tagata o Tarepelai, o tagata o Afaresai, o tagata o Areka, o tagata o Papelonia, o tagata o Susana, o tagata o Tiavei, o tagata o Elama,
10 ma isi nu‘u uma na ‘aumaia e Asenapa, o le ali‘i tele ma le tāua, ma na fa‘anofoina i latou i ‘a‘ai o Samaria ma i latou uma o i ona tala mai o le vaitafe, o ona po fo‘i na tusi ai.
11 O le ata lenei o le tusi na avatu e i latou ‘iā te ia:“O le tupu o Aretaseta, o au ‘au‘auna o tagata o i ona tala mai o le vaitafe, ‘ua fa‘apea atu,
12 ‘Ia silafia e le tupu, o tagata o Iuta o ē na ō a‘e ‘iā te i matou mai ‘iā te oe, ‘ua o‘o mai i latou i Ierusalema le ‘a‘ai fouvale ma le matuā leaga, ‘ua toe faia mai ona pā ‘ua fa‘auma, ‘ua so‘o fo‘i ona fa‘avae.
13 ‘Ia silafia nei e le tupu, ‘āfai e toe faia lenei ‘a‘ai, a fa‘aumaina fo‘i ona pā, ‘ona lē avatu lea e i latou o taulaga ma taulaga i mea ‘ese‘ese ma taulaga o ala; ‘ona i‘u ai lea ‘ina fa‘aitiitiina mea a tupu.
14 O lenei, ‘ona ‘ua ‘a‘ai i matou i mea mai le maota o le tupu, e lē tatau ‘iā i matou ‘ona va‘ai i le fa‘amativaina o le tupu; o le mea lea ‘ua matou ‘a‘auina atu ai nisi ma matou fa‘ailoa atu ai i le tupu;
15 ‘ina ‘ia su‘esu‘ea i le tusi a ou tamā e fa‘amanatu a‘i, ‘ona e maua ai lea i le tusi e fa‘amanatu a‘i ma e silafia ai, o lenei ‘a‘ai o le ‘a‘ai fouvale ma le ‘ua leaga ai mea a tupu ma itū mālō ma latou fa‘atupuina ai le fouvale talu anamua lava; o lea na fa‘aumatia ai lenei ‘a‘ai.
16 ‘Ua matou fa‘ailoa atu i le tupu, ‘āfai e toe faia lenei ‘a‘ai, ma fa‘aumaina ona pā, ‘ona lē toe i ai lea o sou tofi i lenei itū o le vaitafe.”
17 ‘Ona ‘aumai lea e le tupu le tali o le tusi ‘iā Rekumu le fa‘amasino, ma Semesai le tusi‘upu ma i latou uma ‘ua pule fa‘atasi ma i lā‘ua o ē nonofo i Samaria ma ē o i le la itū o le vaitafe, “‘Ia manuia ‘outou, o ona po fo‘i na tusi ai.
18 O le tusi na ‘aumai e ‘outou ‘iā te i matou ‘ua faitauina lava i o‘u luma.
19 ‘Ona ‘ou fai atu ai lea, ‘ona su‘esu‘ea lea, ‘ua iloa ai fo‘i o lenā ‘a‘ai ‘ua fa‘amaualuga i tupu talu anamuā lava, ‘ua fa‘atupuina ai fo‘i le fouvale ma le fa‘atupu fa‘alavelave.
20 Sa i ai fo‘i i Ierusalema o tupu lima malolosi, o ē na pule i nu‘u uma i ona tala atu o le vaitafe, sa avatua fo‘i ‘iā te i latou o taulaga, ma taulaga i mea ‘ese‘ese ma taulaga o ala.
21 O lenei, ‘inā poloa‘i atu ia o ‘outou ‘ia vaoia ia tagata, ‘aua fo‘i ne‘i faia lenā ‘a‘ai, se‘ia ‘ou tu‘uina atu se tasi poloa‘iga.
22 ‘Ia ‘outou, ne‘i ‘outou fa‘atamala i lenei mea; pe se a ‘ea e tupu ai le leaga ‘ua fa‘aitiitiia ai le tamao‘āiga a le tupu?”
23 ‘Ua faitauina le ‘upu o le tusi a le tupu o Aretaseta i luma o Rekumu ma Semesai le tusi‘upu, ma ē na pule fa‘atasi ma i lā‘ua, ‘ona latou ō ai lea ‘ua tele vavave i Ierusalema, i tagata o Iuta ma latou vaoia i latou i le lima malosi.
24 ‘Ona tu‘ua ai lea o le galuega o le fale o le Atua o i Ierusalema. ‘Ua tu‘ua fo‘i ‘ua o‘o i le lua o tausaga o le nofoa‘iga a Tariu le tupu o Peresia.#