1 O Hakai le perofeta ma Sakaria le atali‘i o Ito, o perofeta ia sa perofeta ane i le suafa o le Atua o Isaraelu i tagata o Iuta, o i latou lava o ē na i Iuta ma Ierusalema.
2 ‘Ona tutū ai lea o Serupapelu le atali‘i o Salatielu ma Iosua le atali‘i o Iosataka ma amataina ‘ona fai o le fale o le Atua o i Ierusalema; sa ‘iā te i lā‘ua fo‘i perofeta a le Atua e lagolago ‘iā te i lā‘ua.
3 O ona po lava ia na ō mai ai ‘iā te i latou o Tatenai le ali‘i e pule i ona tala mai o le vaitafe ma Setaraposenai ma ē na pule fa‘atasi ma i lā‘ua, ‘ua fai mai ‘iā te i latou, ‘ua fa‘apea mai, “Po o ai na na poloa‘i atu ‘iā te ‘outou tou te faia lenei fale ma fa‘aumaina lenei pā?”
4 ‘Ona matou fai atu lea ‘iā te i latou, ‘ua fa‘apea atu, “O igoa lava ia o tagata o faia lenei fale.”
5 A ‘ua silasila lo latou Atua i toeaina o Iuta, ‘ua latou lē mavaoia i latou, se‘ia o‘o atu le mea ‘iā Tariu; ‘ona latou tali mai lea i lea mea i le tusi.
6 O le ata lenei o le tusi a Tatenai le ali‘i e pule i ona tala mai o le vaitafe ma Setaraposenai ma ē na pule fa‘atasi ma ia, o tagata o Afareseka, o i ona tala mai o le vaitafe, na latou avatua ‘iā Tariu le tupu.
7 ‘Ua latou avatua le tusi ‘iā te ia, ‘ua tusia fa‘apea fo‘i i totonu:“‘Ia ‘iā Tariu le tupu le manuia uma.
8 ‘Ia silafia e le tupu na matou ō atu i le itū mālō o Iuta, i le fale o le Atua silisili, o lo‘o faia i ma‘a tetele ma la‘au ‘ua tu‘u i ona pā; o lenei galuega fo‘i ‘ua faia ma le fa‘amalosi ma ‘ua manuia i o latou lima.
9 ‘Ona matou fesili atu lea i na toeaina, ‘ua fa‘apea atu ‘iā te i latou, ‘Po o ai na fai atu ‘iā te ‘outou tou te faia lenei fale ma fa‘aumaina nei pā?’
10 Na matou fesili atu fo‘i ‘iā te i latou i o latou igoa e fa‘ailoa atu ‘iā te oe, ‘ina ‘ia tusi atu ai igoa o tagata e sili ‘iā te i latou.
11 ‘Ua fa‘apea fo‘i ‘ona latou tali mai ‘iā te i matou, ‘ua fai mai: ‘O i matou o ‘au‘auna a le Atua o le lagi ma le lalolagi, ‘ua matou fai fo‘i le fale sa faia i ona tausaga anamua ‘ua tele; o le tupu tele i Isaraelu sa na faia ma fa‘aumaina ai.
12 Peita‘i na fa‘atupuina e o matou tamā le to‘asā o le Atua o le lagi, ‘ona ia tu‘uina atu ai lea o i latou i le lima o Nepukanesa le tupu o Papelonia, le Kaletaia, na ia fa‘aumatia fo‘i lenei fale ma tāfea le nu‘u i Papelonia.
13 A o le tausaga muamua o Kuresa le tupu o Papelonia na poloa‘i mai ai Kuresa le tupu ‘ia faia lenei fale o le Atua.
14 O mea fo‘i o auro ma ario sa i le fale o le Atua, na ‘avea e Nepukanesa a‘i le malumalu na i Ierusalema, ‘ua ia ‘aveina atu i le malumalu i Papelonia ‘ua ‘aumai e Kuresa le tupu o ia mea ai le malumalu i Papelonia ma ia tu‘uina atu ai ‘iā Sesepasara, o le igoa lea o le ali‘i e pule na tofia e ia;
15 ma ‘ua fa‘apea atu ‘iā te ia, “‘Inā ‘ave ia e oe o nei mea, ‘inā alu ia ma avatu ai i le malumalu o i Ierusalema ma ‘ia faia le fale o le Atua i lona tulafale.”
16 ‘Ona sau lea o Sesepasara ma amata le fa‘avae o le fale o le Atua o i Ierusalema; talu fo‘i ia ona po, ‘ua o‘o mai i ona po nei, ‘ua fai ai pea le fale ‘ae le‘i uma.’
17 O lenei, ‘āfai e lelei i le tupu, ‘ia su‘esu‘ea i le fale ‘oloa o le tupu o ‘i‘inā i Papelonia pe moni na poloa‘i Kuresa le tupu ‘ia faia lenei fale o le Atua i Ierusalema ma ‘ia tusia mai ‘iā te i matou le finagalo o le tupu i lenei mea.”