1 A o talotalo Esera, ma ta‘uta‘u atu a latou agasala, o lo‘o tagi, ma fa‘apa‘ū i luma o le fale o le Atua, ‘ua fa‘apotopoto mai ‘iā te ia mai ‘iā Isaraelu o le fa‘apotopotoga tele lava, o tane ma fafine ma tamaiti; auā sa fētāgisi le nu‘u i le tagi tele.
2 ‘Ona tali mai lea o Sekania le atali‘i o Ieielu o lo le fānauga a Elama, ‘ua fa‘apea mai ‘iā Esera, “‘Ua agasala i matou i lo matou Atua, ‘ina ‘ua matou fai avā i fafine ‘ese mai tagata o le nu‘u; a o lenei, ‘ua i ai se fa‘atuatuaga mo Isaraelu i lenei mea.
3 O lenei, ‘ia tatou osia le feagaiga ma lo tatou Atua, ‘ia tatou ‘a‘auina atu o avā uma, ma ē ‘ua fānanau mai ‘iā te i latou, e tusa ma le pule a oe lo‘u ali‘i, ma ē ‘ua matata‘u i poloa‘iga a lo tatou Atua; ma ‘ia faia e tusa ma le tulafono.
4 ‘Inā tula‘i ia, auā ‘ua ‘iā te oe lenei mea; matou te fa‘atasi fo‘i ma oe; ‘ia e fa‘amalosi ma ‘ia e faia.”
5 ‘Ona tula‘i ai lea o Esera ma fai atu ‘ia tautō ali‘i o le ‘au ositaulaga ma sa Levī ma Isaraelu uma ‘ia faia e tusa ma lenei ‘upu. ‘Ona latou tautō ai lea.
6 ‘Ona tula‘i lea o Esera a‘i luma o le fale o le Atua, ma ‘ua alu atu i le potu o Ioanana le atali‘i o Eliasipa, ‘ua o‘o fo‘i o ia i ai, ‘ua ia lē ‘ai se areto, ‘ua lē inu fo‘i se vai, auā sa fa‘anoanoa ‘ona o le agasala a le tāfeaga.
7 ‘Ona latou tala‘i lea o le ‘upu i Iuta ma Ierusalema i tagata uma o le tāfeaga, ‘ia potopoto mai i Ierusalema;
8 o i latou uma fo‘i e lē ō mai i le tolu o aso, e tusa ma le pule a ali‘i ma toeaina, e fa‘atoina ana ‘oloa uma, ma vavae‘eseina o ia a‘i le fa‘apotopotoga o le tāfeaga.
9 ‘Ona fa‘apotopoto mai ai lea o tagata uma o Iuta ma Peniamina i Ierusalema i le aso tolu. O le iva lea o masina, o le aso e luafulu o le masina; sa nonofo le nu‘u uma i le malae i luma o le fale o le Atua, ‘ua tetemū ‘ona o lenā mea, ‘atoa ma timuga.
10 ‘Ona tula‘i lea o Esera le ositaulaga, ‘ua fa‘apea atu ‘iā te i latou, “O ‘outou na ‘ua agasala ‘outou, ‘ina ‘ua ‘outou fai avā i fafine ‘ese e fa‘aopoopo ai i le agasala a Isaraelu.
11 O lenei, ‘ia ‘outou ta‘uta‘u atu a ‘outou agasala i le ALI‘I le Atua o ‘outou tamā, ma ‘ia ‘outou faia lona finagalo, ma ‘ia ‘outou vavae ‘ese i tagata o le nu‘u, ma fafine ‘ese.”
12 ‘Ona tali mai lea o le fa‘apotopotoga uma, ‘ua latou fa‘apea mai ma le leo tele, “E pei ‘ona e fetalai mai ‘iā te i matou, e fa‘apea ‘ona matou faia.
13 A ‘ua to‘atele le nu‘u, ma ‘ua tele timuga i ona po nei, ma ‘ua lē lavā ai i matou ‘ona tutū i fafo; e lē mafai fo‘i lenei mea i le aso e tasi, po o aso e lua; auā ‘ua to‘atele i matou ‘ua soli tulafono i lenei mea.
14 ‘Ia tofia o matou ali‘i o le fa‘apotopotoga uma, o i latou uma fo‘i o ‘iā matou ‘a‘ai o ē ‘ua fai avā i fafine ‘ese, ‘ia ō mai i latou i ona po a tu‘u, ma ‘ia fa‘atasi mai ma i latou o toeaina o lea ‘a‘ai ma lea ‘a‘ai, ‘atoa ma fa‘amasino o i ai, se‘ia liliu ‘ese ai ‘iā te i matou le to‘asā tele o lo matou Atua ‘ona o lenei mea.”
15 Na tofia i lenei mea na o Ionatana le atali‘i o Asaelu, ma Iekasia le atali‘i o Tikeva; o Mesulama fo‘i ma Sapetai le sa Levī ‘ua fesoasoani ‘iā te i lā‘ua.
16 ‘Ua faia fa‘apea fo‘i e tagata o le tāfeaga. Sa vavae‘eseina e Esera le ositaulaga, ma matai sili e tusa ma ‘āiga o latou tamā, o i latou uma fo‘i ‘ua ta‘ua o latou igoa, ‘ua latou nonofo i lalo fo‘i i le aso muamua o le masina e sefulu e su‘esu‘e i lenā mea.
17 ‘Ua latou fa‘ai‘uina ‘ona su‘esu‘e i tagata uma ē na fai avā i fafine ‘ese i le ulua‘i aso o le masina muamua.
18 O le lisi o tagata o ē na fai avā i fafine ‘ese:O isi atali‘i o Iosua le atali‘i o Iosataka ma ona uso, o Maaseia, ma Elisara, ma Iaripi, ma Ketalia.
19 ‘Ua latou tu‘uina atu o latou lima latou te ‘a‘auina atu a latou avā; ‘ona ‘ua nofo sala fo‘i i latou ‘ua ‘aumaia le mamoe po‘a mai le lafu ‘ona o la latou agasala.
20 O isi fo‘i atali‘i o Imere; o Hanani, ma Sepatia.
21 O isi atali‘i o Harima; o Maaseia, ma Elia, ma Semaia, ma Ikieli, ma Usia.
22 O isi atali‘i o Pasura; o Elioenai, o Maaseia, o Isamaeli, o Natanielu, o Iosapata, ma Eliasa.o Iosapata, ma Semi, ma Kilaia, o Kelita lea, o Petakia, o Iuta, ma Elisara.o Eliasipa. O isi fo‘i o le ‘au leoleo faitoto‘a; o Saluma, ma Telema, ma Auri.O isi atali‘i o Parose; o Ramea, ma Iesia, ma Malekia, ma Meamina, ma Eleasaro, ma Malekia, ma Penaia.
26 O isi atali‘i o Elama; o Matania, o Sakaria, ma Ieielu, ma Opeti, ma Ieremota, ma Elia.
27 O isi atali‘i o Satu; o Elioenai, o Eliasipa, o Matania, ma Ieremota, ma Sapata, ma Asesa.
28 O isi atali‘i o Pepai; o Ioanana, o Hanania, o Sapai, ma Atalai.
29 O isi atali‘i o Pani; o Mesulama, o Maluka, ma Ataia, o Iasuvi, ma Seala, ma Ramota.
30 O isi atali‘i o Pakamoapi; o Atena, ma Kila, o Penaia, o Maaseia, o Matania, o Pesaleli, ma Pinui, ma Manase.
31-32 O atali‘i fo‘i o Harima, o Elisara, o Isea, o Malekia, o Semaia, ma Simeona, o Peniamina, o Maluka, ma Semaria.
33 O isi atali‘i o Hasumu; o Matenai, o Matata, o Sapata, o Elipelete, o Ieremai, o Manase, ma Semi.
34-37 O isi atali‘i o Pani; o Maatai, o Amaramo, ma Ueli, o Penaia, o Petia, o Kilui, o Vania, o Meremota, o Eliasipa, o Matania, o Matenai ma Iaasau.
38-42 O isi atali‘i o Pinui, o Semi, Selemia, Natano, Ataia, o Makenatipai, o Sasai, o Sarai, o Asareelu, Selemia, o Semaria, o Saluma, o Amaria, ma Iosefa.
43 O isi atali‘i o Nepo; o Ieielu, o Matatia, o Sapata, o Sapina, o Iatau, ma Ioelu, ma Penaia.
44 O i latou uma ia na fai avā i fafine ‘ese; na i ai fo‘i i nisi o i latou o avā na latou fānaua tama.#