1 O ‘upu a Neemia le atali‘i o Hakalia o le lua o sefulu o tausaga, o le masina o Kiselu, na ‘ou i Susana i le maota.
2 ‘Ona o‘o mai lea o Hanani, o le tasi o o‘u uso, o ia ma nisi tagata mai Iuta; ‘ona ‘ou fesili atu ai lea ‘iā te i latou pe fa‘apefea sa Iutā na sao o ē nā totoe o le tāfeaga, i le ma Ierusalema.
3 ‘Ona fa‘apea mai lea o i latou ‘iā te a‘u, “O ē totoe o ē na totoe o le tāfeaga o i ai i le itū mālō, ‘ua tele le puapuagā ma le gaogaoina o i latou; ‘ua sōloia fo‘i le pā o Ierusalema, ma ‘ua mū ona puipui i le afi.”
4 ‘Ua ‘ou fa‘alogo i ia ‘upu, ‘ona ‘ou nofo ai lea i lalo, ma ‘ou tagi, ma fa‘anoanoa i nisi aso, ma anapogi, ma tatalo i luma o le Atua o le lagi,
5 ma ‘ou fa‘apea atu, “Le ALI‘I e, le Atua o le lagi, ‘ou te ‘ai‘oi atu ‘iā te oe, o le Atua silisili ma le mata‘utia, o lē tausia le feagaiga ma le alofa ‘iā te i latou o ē alofa atu ‘iā te ia, ma tausi i ana poloa‘iga;
6 ‘ia e fa‘afofoga mai, ma ‘ia silasila mai ou fofoga, ‘ina ‘ia e fa‘afofoga i le tatalo a lau ‘au‘auna, ‘ou te tatalo atu ai nei i ou luma i le ao ma le po mo le fānauga a Isaraelu o au ‘au‘auna, ma ta‘u atu i agasala a le fānauga a Isaraelu, ‘ua matou agasala ai ‘iā te oe; ‘ua agasala fo‘i a‘u ‘atoa ma le ‘āiga o lo‘u tamā.
7 ‘Ua matou agaleaga lava ‘iā te oe, ma ‘ua matou lē tausi poloa‘iga, ma tulafono, ma fa‘amasinoga, na e poloa‘i mai ai ‘iā Mose lau ‘au‘auna.
8 ‘Ou te ‘ai‘oi atu ‘iā te oe, ‘ia e manatua le afioga na e poloa‘i mai ai ‘iā Mose lau ‘au‘auna, ‘ua fa‘apea mai, ‘A ‘outou agasala, ‘ou te fa‘ata‘ape‘apeina ‘outou i nu‘u.
9 ‘Ae ‘āfai tou te liliu mai ‘iā te a‘u, ma tausi a‘u poloa‘iga, ma ‘outou faia, e ui lava ‘ina tulia ‘outou i le tulu‘iga o le lagi, ‘ou te fa‘apotopoto mai ai ‘iā te i latou, ma ‘aumaia i latou i le mea ‘ua filifilia e a‘u e tu‘u ai lo‘u igoa.’
10 O lenei, o au ‘au‘auna ia ma lou nu‘u, ‘ua e fa‘aolaina i lou mana tele, ma lou ‘a‘ao malosi.
11 Le Ali‘i e, ‘ou te ‘ai‘oi atu ‘iā te oe, ‘ia e fa‘afofoga mai i le tatalo a a‘u lau ‘au‘auna, ma tatalo a au ‘au‘auna, o ē fia matata‘u i lou suafa; ma ‘ia e fa‘amanuia lava i lau ‘au‘auna i le aso nei, ma ‘ia e tu‘u mai ‘iā te a‘u, ‘ia alofaina i luma o lenei tagata.”Auā sa fai a‘u ma tautū uaina i le tupu.#