1 ‘Ua fa‘apotopoto mai le nu‘u uma e pei o se tagata e to‘atasi i le malae o i luma o le faitoto‘a o le vai, ‘ona latou fai atu lea ‘iā Esera le tusi‘upu e ‘aumai le tusi o le tulafono a Mose, na poloa‘i mai ai le ALI‘I ‘iā Isaraelu.
2 ‘Ona ‘aumai ai lea e Esera le ositaulaga le tulafono i luma o le fa‘apotopotoga o tane ‘atoa ma fafine, ma i latou uma o ē atamamai i fa‘alogo, i le aso muamua i le masina e fitu.
3 ‘Ona ia faitau ai lea i le malae o i luma o le faitoto‘a o le vai, e āfua i le malama a‘e o le taeao ‘ua o‘o i le aoauli, i luma o tane ma fafine, ma ē atamamai; ‘ua ua‘i mai fo‘i taliga o le nu‘u uma i le tusi o le tulafono.
4 ‘Ua tu fo‘i Esera le tusi‘upu i luga i le tulaga la‘au, na latou fausia i lea lava mea; ‘ua tutū fa‘atasi fo‘i ma ia i lona itū taumatau o Matatia, ma Sema, ma Anaia, ma Uria, ma Hilikia, ma Maaseia; a o i lona itū tauagavale, o Petaia, ma Mesaelu, ma Malekia, ma Hasumu, ma Hasepatana, o Sakaria ma Mesulama.
5 ‘Ona fofola lea e Esera le tusi i luma o le nu‘u uma; (auā sa maualuga o ia i le nu‘u uma;) ‘ua ia fofola ai, ‘ona tutū lea i luga o le nu‘u uma.
6 ‘Ona fa‘afetai atu lea o Esera i le ALI‘I le Atua silisili; ‘ona tali mai lea o le nu‘u uma, “Amene, Amene,” ‘ua sisi‘i i luga o latou lima ma ‘ua latou punonou ma ifo to‘ele i le ALI‘I.
7 O Iosua fo‘i ma Pani, ma Serepeia, o Iaminu, o Akupa, o Sapetai, o Hotia, o Maaseia, o Kelita, o Asaria, o Iosapata, o Hanana, o Pelaia, ma sa Levī, ‘ua latou fa‘amatalaina atu le tulafono i le nu‘u, o lo‘o tutū mai fo‘i le nu‘u.
8 ‘Ua latou faitau māe‘a i le tusi i le tulafono a le Atua, ma ‘ua latou folafola atu le uiga, ma fa‘amatalaina atu ‘iā te i latou le mea ‘ua faitauina.
9 O Neemia, o le ali‘i e pule lea, ma Esera le ositaulaga, le tusi‘upu, ma sa Levī o ē na a‘oa‘o i le nu‘u, ‘ua latou fai atu i le nu‘u uma, “O le aso pa‘ia lenei i le ALI‘I lo ‘outou Atua, ‘aua ne‘i ‘outou fa‘anoanoa, ‘aua fo‘i le fētāgisi.” Auā ‘ua fētāgisi le nu‘u uma, ‘ina ‘ua latou fa‘alogologo i ‘upu o le tulafono.
10 ‘Ua ia fai atu fo‘i ‘iā te i latou, “‘Inā ō ia ‘outou, ‘inā ‘a‘ai mea lololo, ma inu mea suamalie ma ‘ia ‘outou ‘ave tufa‘aga ‘iā te i latou e le‘i saunia se mea ma latou; auā o le aso pa‘ia lenei i lo tatou Ali‘i; ‘aua ne‘i tigā fo‘i ‘outou; auā o le fiafia i le ALI‘I o lo ‘outou malosi lea.”
11 ‘Ua fa‘afilemū atu fo‘i e sa Levī, i le nu‘u uma, ‘ua fa‘apea atu, “Fīfīlemū ia ‘outou auā o le aso pa‘ia lenei, ‘aua ne‘i tigā fo‘i ‘outou.”
12 ‘Ona ō atu lea o le nu‘u uma e ‘a‘ai, ma inu, ma ‘ave tufa‘aga, ma taufai‘oli‘oli tele, auā ‘ua latou malamalama i ‘upu na fa‘ailoa atu ‘iā te i latou.
13 O le aso lua fo‘i na fa‘apotopotoina ai o matai sili o le nu‘u uma, o ositaulaga, ma sa Levī, ‘iā Esera le tusi‘upu, ‘ia a‘oa‘oina ai i latou i ‘upu o le tulafono.
14 ‘Ona latou iloa lea ‘ua tusia i le tulafono na poloa‘i mai ai le ALI‘I ‘iā Mose, ‘ia nonofo le fānauga a Isaraelu i fale apitaga i le tausamiga i le masina e fitu;
15 ma ‘ia latou logologoa‘i atu ma tala‘i atu ‘iā latou ‘a‘ai uma, ma Ierusalema, e fa‘apea atu, “‘Inā ō atu ia i le mauga, ma ‘aumai la o le olive, ma la o le la‘au o le olive vao, ma la o le atasi, ma lau pama, ma la o la‘au lauolaola, e fai a‘i fale apitaga e pei ‘ona tusia.”
16 ‘Ona ō atu lea o le nu‘u, ma ‘ua latou ‘aumaia, ma fai mo latou o fale apitaga, ta‘ito‘atasi i luga o lona fale, i o latou lotoā fo‘i, ma lotoā o le fale o le Atua, ma le malae o le faitoto‘a o le vai, ma le malae o le faitoto‘a o Efaraima.
17 O le fa‘apotopotoga uma fo‘i o ē na ō mai mai le tāfeaga, ‘ua latou faia fale apitaga, ma ‘ua latou nonofo i fale apitaga; auā talu ona po o Iosua le atali‘i o Nuno ‘ua o‘o i lea aso, e le‘i fa‘apea ‘ona fai e le fānauga a Isaraelu. Sa matuā tele lava le fiafia.
18 ‘Ua ia faitau fo‘i i le tusi o le tulafono a le Atua i lea aso ma lea aso, e āfua i le aso muamua ‘ua o‘o i le aso e i‘u ai. O aso e fitu fo‘i ‘ua latou fai ai le tausamiga, ‘ua faia fo‘i le fa‘apotopotoga i aso e valu, e tusa ma le tu.#