1 Sa tele le ‘alalaga o le nu‘u ma a latou avā i o latou uso o sa Iutā.
2 Auā sa i ai o ē ‘ua fa‘apea mai, “O matou atali‘i ma o matou afafine, ‘ua matou to‘atele; o le mea lea ‘ua tatau ai ‘ona maua ni a matou saito, ‘ia matou ‘a‘ai ma ola ai.”
3 Sa i ai fo‘i nisi o ē na fa‘apea mai, “‘Ua tu‘ufa‘afa‘atau e i matou o matou fanua, ma o matou tōvine, ma o matou fale, e maua ai saito, auā o le oge.”
4 Sa i ai fo‘i nisi o ē na fai mai, “‘Ua matou ‘aitalafu tupe e fai ma taulaga i le tupu, ‘ua tu‘ufa‘afa‘atau ai o matou fanua ma o matou tōvine.
5 A o lenei, e tusa o matou tino ma tino o matou uso, e tusa a matou fānau ma a latou fānau; fa‘auta fo‘i, ‘ua matou fa‘apologa i o matou atali‘i ma o matou afafine e fai ma pologa; o lo‘o nofo pologa nei lava nisi o matou afafine; matou te lē mafaia ‘ona toe fa‘atau mai ‘iā te i latou; auā o matou fanua ma o matou tōvine ‘ua fai mo tagata ‘ese.”
6 ‘Ona ‘ou matuā ita lava lea ‘ina ‘ua ‘ou fa‘alogo i lo latou ‘alaga mai i ia ‘upu.
7 ‘Ona ‘ou filifili ifo ai lea i lo‘u loto, ma ‘ou finau atu i ali‘i ma faipule, ma ‘ou fa‘apea atu ‘iā te i latou. “‘Ua ‘outou talia taui fa‘asili ta‘ito‘atasi i lona uso.”‘Ona ‘ou tala‘iina lea o le fa‘apotopotoga tele ‘ona o i latou.
8 ‘Ona ‘ou fai atu lea ‘iā te i latou, “‘Ua matou fa‘atauina mai o tatou uso o sa Iutā, sa fa‘atauina atu i nu‘u ‘ese e tusa ma mea na ‘iā te i matou; a o ‘outou tou te fa‘atauina atu ‘ea o ‘outou uso? pe tou te fa‘atauina mai ‘ea o i latou ‘iā te i tatou.” ‘Ona latou fa‘alologo lea, ‘ua lē mau tali lava.
9 ‘Ua ‘ou fai atu fo‘i, “E lē tatau le mea ‘ua ‘outou faia; tou te lē sāvavali ‘ea ma le mata‘u i lo tatou Atua ‘ona o le fa‘aluma mai o nu‘u ‘ese ‘ua ita mai ‘iā te i tatou?
10 O a‘u fo‘i, ma o‘u uso, ma a‘u ‘au‘auna, matou te mafaia ‘ona avatu ‘iā te i latou o tupe, ma saito. Se‘i tatou tu‘u ia lenā taui fa‘asili.
11 Se‘i ‘outou toe tu‘u atu ia ‘iā te i latou i lenei lava aso o latou fanua, o latou tōvine, o latou tōolive, ma o latou fale, ma le ta‘itasi i selau tupe, ma le saito, ma le uaina, ma le u‘u, ‘ua ‘outou fai fa‘afa‘atau ‘iā te i latou.”
12 ‘Ona fai mai lea o i latou, “Matou te toe tu‘uina atu lava matou te lē toe sā‘ili atu se mea ‘iā te i latou; e pei ‘ona e fetalai mai, e fa‘apea ‘ona matou faia.”‘Ona ‘ou vala‘au atu lea i le ‘au ositaulaga, ma ‘ou fai atu ‘ia tautō i latou, ‘ia latou fai e tusa ma lenei ‘upu.
13 ‘Ua ‘ou lūlū fo‘i le fatafata o lo‘u ‘ofu, ma ‘ou fai atu, “‘Ia fa‘apea ‘ona lūlūina e le Atua tagata uma o ē lē fa‘ataunu‘uina lenei ‘upu, a‘i lona fale ma lana galuega, ‘ia fa‘apea lava ‘ona lūlūina ma fa‘amativaina o ia.”‘Ona fai mai lea o le fa‘apotopotoga uma, “Amene;” ma latou vivi‘i atu i le ALI‘I. ‘Ua fai fo‘i e le nu‘u e tusa ma lenei ‘upu.
14 Talu lava le aso na tofia ai a‘u e fai ma ali‘i e pule i le nu‘u o Iuta, e āfua i le tausaga e luafulu ‘ua o‘o lava i le tausaga e tolugafulu ma le lua o Aretaseta le tupu, o tausaga e sefulu ma le lua ia, ‘ua matou lē ‘a‘ai, o a‘u ma o‘u uso, i le mea e ‘ai a le ali‘i e pule.
15 A o ali‘i na mua‘i pule o ē na muamua ‘iā te a‘u, na mafatia le nu‘u ‘iā i latou, ma ‘ua latou talia mai ‘iā te i latou o areto ma uaina, ‘atoa ma sekeli ario e fagafulu; o a latou lava ‘au‘auna fo‘i na latou pule i le nu‘u; a o a‘u, ‘ou te le‘i faia fa‘apea, ‘ona o le mata‘u i le Atua.
16 ‘Ua ‘ou fa‘amalosi fo‘i i le galuega o lenei pā, matou te le‘i fa‘atau fo‘i ni fanua; na fa‘apotopotoina ai fo‘i i le galuega o a‘u ‘au‘auna uma lava.
17 Sa ‘a‘ai, fo‘i i la‘u laulau o sa Iutā ma faipule e to‘aselau ma le to‘alimagafulu o tagata, i le ma i latou na ō mai ‘iā te i matou a‘i nu‘u ‘ese e vagavagai ‘iā i matou.
18 O mea fo‘i nei na saunia i lea aso ma lea aso, o le povi e tasi ma mamoe lelei e ono; na saunia fo‘i ma a‘u o manu felelei; e ta‘i sefulu fo‘i aso ma uaina ‘ese‘ese uma e tele; e ui fo‘i i lea ‘ou te le‘i fai atu ‘ia ‘aumaia le mea e ‘ai a le ali‘i e pule, auā sa mamafa le galuega i lenei nu‘u.
19 Lo‘u Atua e, ‘ia e manatua mai a‘u ‘ia ‘ou manuia ai, e tusa ma mea uma ‘ua ‘ou faia i lenei nu‘u.#