1 ‘Ua fa‘alogo e Sanepalata ‘ua matou atia le pā, ‘ona ita lea o ia, ‘ua matuā tigā lava, ‘ua ia tauemu fo‘i i sa Iutā,
2 ma fai atu i luma o ona uso ma le itūtau‘a a Samaria, ‘ua fa‘apea atu, “Se a le mea o faia e ia tagata vaivai o sa Iutā? Pe tu‘u ai pea ‘ea i latou? Latou te fai taulaga ‘ea? Latou te fa‘auma ‘ea i le aso e tasi? Latou te toe atiina a‘e ‘ea ma‘a ai faupuega otaota ‘ua susunuina?”
3 Sa i ai ma ia o Tovia o lo sa Amonī, ‘ua fai mai fo‘i o ia, “O le mea lava ‘ua latou atia, a alu a‘e i ai se alope, na te sōloia lo latou pā ma‘a.”
4 Lo matou Atua e, ‘ia e fa‘afofoga mai; auā o lo‘o ‘inosia i matou; ‘ina ‘ia e fa‘afo‘i atu lo latou fa‘aluma mai i luga o latou ulu, ‘ia tu‘uina atu i latou ‘ia vetea i le nu‘u na tāfea i ai;
5 ‘aua ne‘i ufiufitia fo‘i lo latou agaleaga ‘aua fo‘i ne‘i sōloi‘esea i ou luma la latou agasala; auā ‘ua latou fa‘alili mai i luma o ē atia le pā.
6 ‘Ua matou atia le pā; ‘ua feso‘ota‘i fo‘i le pā uma e o‘o i lona vaeluagalemū; auā sa loto lava le nu‘u i le galuega.
7 ‘Ua fa‘alogo e Sanepalata, ma Tovia, ma tagata Arapi, ma sa Amonī, ma tagata Asetota, ‘ua saga ati a‘e pea pā o Ierusalema, auā ‘ua amata ‘ona malu o mea na sōloia, ‘ona tupu tele ai lea o lo latou ita,
8 ma taupulepule fa‘atasi i latou uma e si‘i mai le tau‘a i Ierusalema, ma fa‘ao‘o i ai se malaia.
9 A ‘ua matou tatalo atu i lo matou Atua, ma matou tofia nisi e leoleo ‘iā te i latou i le ao ‘atoa ma le po, ‘ona o i latou.
10 ‘Ua fai mai fo‘i Iuta,“‘Ua itiiti le malosi o ē ‘ave avega,ma ‘ua tele le otaota;tatou te lē lavā ai ona ati o le pā.”
11 ‘Ua fa‘apea ane fo‘i o ē na fai i matou mo latou fili, “Latou te lē iloa, latou te lē va‘aia, se‘ia matou o‘o atu i totonu ‘iā te i latou, ma fafasi ‘iā te i latou, ma fa‘agataina le galuega.”
12 ‘Ua ō mai fo‘i sa Iutā o ē na nonofo felāta‘i ma i latou, ‘ona latou fai fa‘asefulu mai lea ‘iā te i matou, “O mea uma lava o lo‘o latou nonofo ai, latou te feosofi mai ai ‘iā te ‘outou.”
13 ‘Ona ‘ou tofia ai lea i mea maulalo i tua o le pā, ma mea maualuga na ‘ou tofia i ai lava le nu‘u i o latou ‘āiga, ma a latou pelu, ma o latou tao, ma a latou ‘aufana.
14 ‘Ua ‘ou va‘ava‘ai, ma tula‘i, ma fai atu i ali‘i, ma faipule, ma le nu‘u uma, “‘Aua ne‘i fefefe ‘outou ‘ona o i latou; ‘ia ‘outou mānatunatu i le Ali‘i silisili ma le mata‘utia, ma ‘ia ‘outou tau mo ‘outou uso, o ‘outou atali‘i, ma o ‘outou afafine, o a ‘outou avā, ma o ‘outou fale.”
15 ‘Ua fa‘alogo ē na ita ‘iā te i matou, ‘ua iloa e i matou, ma ‘ua fa‘alēaogāina e le Atua la latou filifiliga, ‘ona toe fa‘asaga atu ai lea o i matou uma i le pā, ta‘ito‘atasi i lana galuega.
16 Talu lea aso, na vaeluaina ai a‘u ‘au‘auna, sa fai galuega le tasi vaega, a o le tasi vaega ‘ua latou u‘u i tao, ma talitā, ma ‘aufana, ma ‘ofutau; o ali‘i fo‘i na i tua o le ‘āiga uma o Iuta.
17 O i latou na atia le pā, ma i latou na ‘ave avega, ma i latou na tautu‘u mea, ‘ua ta‘itasi ma galue i lona lima e tasi, ‘ae u‘u le tao i le tasi lima.
18 O ē na atia fo‘i ‘ua ta‘ito‘atasi ma fusi lana pelu i lona itū, ma latou atia; na i o‘u tafatafa fo‘i o lē na ili le pū.
19 ‘Ua ‘ou fai atu fo‘i i ali‘i, ma faipule, ma tagata uma o le nu‘u, “‘Ua matuā tele lava le galuega, ‘ua ta‘ape‘ape fo‘i i tatou i le pā, ‘ua vāvā mamao le tasi i le tasi.
20 O lenei, o le mea tou te fa‘alogo i ai le leo o le pū, ‘ia ‘outou fa‘apotopoto mai ai ‘iā te i matou; e tau lo tatou Atua mo i tatou.”
21 ‘Ua galulue fo‘i i matou i le galuega, na u‘u tao le tasi vaega o i latou e āfua i le malama a‘e o le taeao e o‘o ‘ina fepulafi mai o fetū.
22 ‘Ua ‘ou fai atu fo‘i i na ona po i le nu‘u, “‘Ia ta‘ito‘atasi ma lana ‘au‘auna ma nofo i totonu o Ierusalema, ‘ia latou fai ma leoleo ‘iā te i tatou i le po, ‘ae galulue i le ao.”
23 O a‘u fo‘i, ma o‘u uso, ma a‘u ‘au‘auna, ma tagata leoleo o ē na mulimuli mai ‘iā te a‘u, ‘ua matou lē tō ‘ese o matou ‘ofu, ‘ua ta‘itasi ma ‘ave lana ‘au‘upega i le vai.