1 O lenei, ‘ia e manatua lē na faia oe i ona po o lou taule‘ale‘a, a o le‘i o‘o mai aso leaga, a o le‘i o‘o mai fo‘i tausaga ‘e te fa‘apea ai, “E leai so‘u fiafia i ai.”
2 A o le‘i fa‘apouliuligia le lā ma le malamalama ma le masina ma fetū ma ‘ua lē fo‘i mai ao pe a mavae le timu;
3 o le aso e tete ai o ē leoleo i le fale ma fa‘ano‘uno‘u ai tagata malolosi, ma lē toe galulue ē ‘ua olo, auā ‘ua to‘aitiiti ma fa‘apouliuligia ē o va‘ai i fa‘amalama,
4 ma punitia ai faitoto‘a i le ala, ‘ina ‘ua itiiti le leo o le olo, e tula‘i ai fo‘i o ia ‘ina ‘ua tausani o manu, e vaivai ai fo‘i teine fai pesega uma;
5 e fefefe ai fo‘i i latou i mea maualuluga ma matata‘u ai i le ala; pe a fuga mai le sekati ma fai le sē ma mea mamafa, ma ‘ua leai lava se toe mana‘o; auā a alu le tagata i lona fale fa‘avavau, e feoa‘i fo‘i ē taufaitagitu‘i i le ala;
6 a o le‘i fa‘amalūina le maea ario, po o ta‘e le ipu auro po o nuti le kate i le vaipuna po o gausia le mea ta‘avili i le vai‘eli;
7 ma toe fo‘i atu le efuefu i le ‘ele‘ele e pei ‘ona i ai ia ma toe fo‘i atu le agaga i le Atua o lē na foa‘iina mai ai.
8 ‘Ua fa‘apea mai le Failauga: E matuā fa‘atauva‘a, e fa‘atauva‘a mea uma lava.
9 Na sili le poto o le Failauga, o le mea lea na sili ai lona a‘oa‘o atu i tagata ‘ia popoto; na ia mafaufau fo‘i, ma su‘esu‘e ma saunia fa‘ata‘oto e tele.
10 Na sā‘ilia e le Failauga ‘ia maua ‘upu e fa‘afiafia a‘i; o mea ‘ua tusia fo‘i e tonu ia, o ‘upu moni lava.
11 O ‘upu a ē popoto e pei o tui ia, po o fao ‘ua fa‘amauina, o matai o fa‘apotopotoga ‘ua tofia ia e le leoleo e to‘atasi.
12 O lenei fo‘i, lo‘u atali‘i e, ‘ia a‘oa‘oina oe e i latou; e leai se i‘uga i tusi o tusi e tele; o lē su‘esu‘e tele fo‘i i ‘upu, e vaivai ai le tino.
13 Se‘i tatou fa‘alogo ia i le i‘uga o ia mea uma, ‘ia e mata‘u i le Atua ma e ‘ana‘ana i ana poloa‘iga; auā o mea ia e tatau i tagata uma.
14 Auā e fa‘amasinoina e le Atua galuega uma, ‘atoa ma mea lilo uma lava, o mea lelei ‘atoa ma mea leaga.#