1 O lo‘o i ai le mea leaga ‘ua ‘ou iloa i lalo o le lā, e to‘atele fo‘i lea i tagata;
2 o le tagata ‘ua foa‘iina i ai e le Atua le tamao‘āiga ma le ‘oloa tele, ma le mamalu, e le mativa fo‘i o ia i se mea o mea uma e mana‘o i ai o ia, a ‘ua lē foa‘iina e le Atua ‘iā te ia ‘ia mafai ‘ona ‘ai ai, ‘ae ‘aina e le tagata ‘ese. O le mea fa‘atauva‘a lea, o le ma‘i leaga lea.
3 ‘Āfai e fānaua e se tagata le to‘aselau, e tele fo‘i tausaga e ola ai o ia, e tele fo‘i aso o ona tausaga, ‘ae lē malie lona loto i le lelei ma ‘ua leai fo‘i sona tu‘ugamau; ‘ou te fa‘apea ifo: E sili ‘iā te ia lē ‘ua fānau le au.
4 Auā ‘ua sau o ia o fa‘atauva‘a ‘ua alu atu fo‘i o ia ma le pouliuli, ‘ua ufitia fo‘i lona igoa i le pouliuli;
5 ‘ua lē iloa fo‘i e ia le lā, ‘ua lē iloa lava se mea; ‘ua sili le filemū o lenā i lo le tasi.
6 ‘Āfai fo‘i e ola o ia i tausaga e lua afe, e lē iloa lava e ia se manuia; e lē ō atu ‘ea tagata uma i le mea e tasi?
7 O galuega uma a le tagata mo lona gutu lea, ‘ae lē malie lava le mana‘o.
8 Se a fo‘i le mea ‘ua i ai i le tagata poto e sili i la le vale? se a le mea ‘ua i ai i le mativa, ‘ua iloa e savali i luma o tagata ola?
9 E sili ‘ona lelei o le mea ‘ua maua mai, i le mea ‘ua mana‘o i ai le loto; o le mea fa‘atauva‘a fo‘i lea ma le ‘ai i le matagi.
10 O lē ‘ua i ai nei, ‘ua uma ‘ona fa‘aigoaina o ia i lona igoa, ‘ua iloa fo‘i o ia o le tagata; e lē mafai fo‘i ‘ona finau o ia ma lē ‘ua sili lona malosi i lona.
11 E tele lava mea e fa‘ateleina ai mea fa‘atauva‘a, se a le mea ‘ua maua ai e le tagata?
12 Auā o ai sē na te iloa le mea e lelei ai le tagata i lenei olaga, i nai aso uma o lona ola fa‘atauva‘a, e mavae ‘ese ‘iā te ia e pei o se ata? po o ai fo‘i sē na te fa‘ailoa atu i le tagata le mea e tupu i lalo o le lā pe a mavae atu o ia?#