1 ‘Ia e fa‘aeteete i ou vae pe a e alu i le fale o le Atua; ‘ia e fa‘alatalata atu fo‘i e fa‘alogologo, ‘ae ‘aua le fa‘alatalata atu o avatu le taulaga a ē vālelea; auā latou te lē iloa ‘ua latou faia le mea leaga.
2 ‘Aua le fa‘avave lou gutu, ‘aua fo‘i le fa‘ata‘alise lou loto e fai atu se ‘upu i luma o le Atua; auā o i le lagi le Atua, a ‘ua e i le lalolagi; o le mea lea ‘ia itiiti ai au ‘upu.
3 Auā o le tele o mea e fai e tupu ai le miti; o le tele fo‘i o ‘upu e iloa ai le leo o le vale.
4 Pe a e tautō i se tautoga i le Atua, ‘aua ‘e te fa‘atuai ‘ona avatua; auā e lē fiafia lava o ia i ē ‘ua vālelea; ‘inā e faia le mea ‘ua e tautō ai.
5 E sili ‘ona lelei ‘ona e lē tautō, i lou tautō ‘ae lē avatua.
6 ‘Aua ne‘i e agasala i lou gutu; ‘aua fo‘i ‘e te fai atu i luma o le agelu, o le mea sesē lea. Se a le mea e to‘asā mai ai le Atua i lou leo ma fa‘alēaogāina e ia le galuega a ou lima?
7 Auā o le tele o moemiti ma le tele o ‘upu, o i ai mea fa‘atauva‘a; a ‘ia e mata‘u i le Atua.
8 ‘Āfai ‘ua e iloa atu ‘ona sauāina o lē ‘ua mativa ma le fao mea i le fa‘amasinoga ma le fa‘atonuga i se itū mālō, ‘aua ‘e te ofo i lea mea; auā o lo‘o va‘ai o lē ‘ua sili i lea tagata sili; o lo‘o silasila fo‘i lē ‘ua silisili ‘iā te i lā‘ua.
9 O mea e tutupu i le lau‘ele‘ele mo tagata uma ia; o le tupu fo‘i e maua e ia ana mea mai le fanua.
10 O lē ‘ua mana‘o i le ario, e le malie o ia i le ario; o lē ‘ua mana‘o fo‘i i le ‘oloa tele, e leai sana mea e maua ai; o le mea fa‘atauva‘a fo‘i lea.
11 Pe a fa‘ateleina mea lelei, e fa‘ato‘ateleina fo‘i o ē ‘a‘ai ai; se a fo‘i se mea ‘ua maua ai e i latou e a latou ia mea, ‘ua na ‘ona va‘ai i ai latou mata?
12 E lelei le moe o lē faigaluega, pe itiiti pe tele ana mea e ‘ai; a o lē mā‘ona o le mau‘oa e lē mafai ai ‘ona moe o ia.
13 ‘Ua i ai le mea leaga e tigā ai ‘ua ‘ou iloa i lalo o le lā, o le ‘oloa tele ‘ua tausia mo latou e a latou le ‘oloa e leaga ai i latou.
14 Auā e fa‘aumatia ia ‘oloa i le galuega leaga; ‘ua fānaua fo‘i e ia sona atali‘i, ‘ua lē ‘iā te ia fo‘i se mea.
15 E pei ‘ona sau o ia e lē lavalavā mai le manava o lona tinā; e toe fo‘i atu lava o ia e fa‘apei ‘ona ia sau; e lē ‘ave fo‘i e ia se mea a‘i lana galuega e alu ma ia.
16 O le mea leaga fo‘i lenei e tigā ai, e pei ‘ona sau o ia, e fa‘apea lava ‘ona fo‘i atu o ia; se a fo‘i se mea ‘ua maua e le tagata ‘ua galue mo le matagi?
17 O lo‘o ‘ai fo‘i o ia i ona aso uma i le pouliuli ma le tigā tele ma le ma‘i ma le ita.
18 Fa‘auta i le mea ‘ua ‘ou iloa, o le mea lelei ma le matagofie i le tagata e ‘ai ma inu ma fiafia i le lelei mai ana galuega uma na te faia i lalo o le lā i aso uma o lona ola ‘ua foa‘iina e le Atua ‘iā te ia; auā o mea ia e fai māna.
19 E ta‘itasi fo‘i le tagata ‘ua foa‘iina e le Atua ‘iā te ia le tamao‘āiga ma le ‘oloa tele ma ‘ua foa‘i e ia ‘iā te ia ‘ia mafai ‘ona ‘ai ai; ‘ia fai lona tofi ma ‘oli‘oli i lana galuega; o le mea foa‘iina e le Atua lea.
20 Auā e lē manatua tele e ia o aso o lona ola, auā ‘ua foa‘i mai e le Atua le ‘oli‘oli i lona loto.