1 Na ‘ou mānatunatu lava i lo‘u loto i na mea uma, na ‘ou matuā su‘esu‘e fo‘i na mea uma; ‘ua i le ‘a‘ao o le Atua le ‘ua amiotonu ma ē ‘ua popoto, ‘atoa ma a latou galuega; e lē iloa fo‘i e tagata le alofa po o le ita i mea uma i o latou luma.
2 E tutusa ‘ona o‘o o mea uma i tagata uma e tasi lava le mea e o‘o i lē ‘ua amiotonu ma lē ‘ua amio leaga, i lē ‘ua lelei ma lē ‘ua mamā ma lē ‘ua lē mamā, o lē na te faia taulaga ma lē na te lē faia taulaga; e pei ‘ona o‘o i le tagata amio lelei, e fa‘apea fo‘i ‘ona o‘o i le tagata agasala; e pei ‘ona o‘o i lē na te tautō, e fa‘apea fo‘i ‘ona o‘o i lē ‘ua mata‘u i le tautō.
3 ‘Ua i ai lenei mea leaga i mea uma ‘ua faia i lalo o le lā, e o‘o le mea e tasi i tagata uma; ‘ua tumu fo‘i loto o tagata i le leaga, ‘ua i ai fo‘i le valea i o latou loto i o latou olaga nei, mulimuli ane ‘ua latou ō atu i ē ‘ua oti.
4 Auā o lē ‘ua fa‘atasi i ē ‘ua ola uma, ‘ua ‘iā te ia le fa‘amoemoe; auā e sili ‘ona lelei o le ulī ‘ua ola i le leona ‘ua mate.
5 Auā o ē ‘ua ola, ‘ua latou iloa e oti i latou; a o ē ‘ua oti, latou te lē iloa se mea; ‘ua leai fo‘i se toe totogi ‘iā te i latou; auā ‘ua fa‘agalogaloina i latou.
6 O lo latou alofa fo‘i ma lo latou ita ma lo latou matau‘a, ‘ua mavae lava ia; ‘ua lē toe ‘aiā i latou e fa‘avavau i mea uma ‘ua faia i lalo o le lā.
7 ‘Inā alu ia, ‘ina ‘ai i lau mea e ‘ai ma le ‘oli‘oli, ‘inā inu fo‘i ia i lau uaina ma le loto fiafia; auā o lo‘o fiafia nei le Atua i au galuega.
8 ‘Ia sinasina ou ‘ofu e lē aunoa; ‘aua fo‘i le aunoa le suāu‘u i lou ulu.
9 ‘Ia e fiafia i lou ola fa‘atasi ma le avā ‘ua e alofa i ai, i aso uma o lou ola fa‘atauva‘a, ‘ua foa‘iina e le Atua ‘iā te oe i lalo o le lā, o ou aso fa‘atauva‘a uma; auā o lou tofi lea i lenei olaga ma lau galuega ‘ua e galue ai i lalo o le lā.
10 O mea uma ‘ua e iloa e faia e ou lima, ‘inā faia ia ma lou malosi; auā e leai se galuega, po o se mafaufau, po o se iloa, po o se poto i le tu‘ugamau, o lo‘o e alu atu i ai.
11 ‘Ua ‘ou toe iloa fo‘i i lalo o le lā ‘ua lē sini i le tausinioga ē ‘ua tele vavave, ‘ua lē mālō i le tau‘a ē ‘ua malosi, ‘ua lē i ai fo‘i i ē ‘ua popoto le mea e ‘ai, ‘ua lē i ai i ē ‘ua fa‘autauta le ‘oloa tele, ‘ua lē i ai fo‘i i ē ‘ua atamamai le alofaina mai; a o le tausaga ma le mea e tupu ai e o‘o ‘iā te i latou uma.
12 Auā fo‘i e lē iloa e le tagata lona tausaga; e pei ‘ona maua o i‘a i le ‘upega e leaga ai, e pei ‘ona maua fo‘i o manu felelei i le mailei; e fa‘apea fo‘i ‘ona maileia o tagata i le tausaga leaga, pe a o‘o fa‘afuase‘i mai ai ‘iā te i latou.
13 ‘Ua ‘ou iloa fo‘i lenei poto i lalo o le lā, ‘ua tele fo‘i lea i lo‘u manatu;
14 o si ‘a‘ai itiiti, e to‘aitiiti fo‘i tagata na i ai; na alu atu fo‘i i ai le tupu tele, na ia vagaia, na ia fai fo‘i ‘olo tetele e fa‘afeagai i ai;
15 na iloa ai fo‘i le tasi tagata mativa, ‘ae poto; na ia fa‘asaoina fo‘i le ‘a‘ai i lona poto; a ‘ua leai se tagata na ia manatua lea tagata mativa.
16 ‘Ona ‘ou fa‘apea ifo lea, “E sili ‘ona lelei o le poto i le malosi; ‘ae ‘inosia le poto o le mativa, ‘ua lē fa‘alogoina fo‘i ana ‘upu.”
17 E sili ‘ona fa‘alogoina ‘upu filemū a ē popoto,i le ‘alaga a le faipule valea.
18 E sili ‘ona lelei o le poto i ‘au‘upega o le tau‘a;‘ae māumau i le tagata agasala e to‘atasi mea lelei e tele.#