1 A ‘ua uma lana tagi atu i le Ali‘i, ‘ona tula‘i lea o ia a‘i le mea na pa‘ū faō ai i luma o le Ali‘i.
2 Ma ‘ua vala‘au mai i lana ‘au‘auna, ‘ua fa‘aifo i lona fale, ‘ua ia tō‘ese lona ‘ofu talatala ma ‘ua tatala ‘ese ona ‘ofu o le fafine ‘ua oti lana tane.
3 ‘Ona tā‘ele ai lea ma ‘ua fa‘au‘u lona tino i le pulu muro aupito lelei ma ‘ua selu lona foga ma ‘ua fa‘ae‘e le pulou i lona ulu ma ‘ua ‘ofu o ia i ona ‘ofu matagofie, ‘ua fai se‘e i ona vae; ‘ua fai fo‘i ona taulima ma lona asoa, mōna tautaliga, mana mama, ma ‘ua teuina o ia i ona teuga uma lava.
4 ‘Ua fa‘apupula fo‘i e le Atua lona ‘aulelei, auā e lē o le tu‘inanau leaga a o le amioatua sa ala ai ‘ona fai uma nei teuga; o le mea fo‘i lea na fa‘ateleina ai e le Ali‘i le ‘aulelei o lona tino, ‘ina ‘ia aliali ai o ia i mata o tagata uma ma le lālelei e le āusilia.
5 ‘Ona ia tu‘u atu lea i lana ‘au‘auna le fagu pa‘u tumu i le uaina ma le fagu suāu‘u, sina falaoa, nai fuāla‘au ma nai areto, ma le tufa‘aga o suāsusu ma‘a‘a, ‘ona alu lea o ia.
6 ‘Ua o‘o atu i lā‘ua i le faitoto‘a o le ‘a‘ai, ‘ua la maua ai o Usia ma toeaina o le ‘a‘ai o fa‘atalitali ai.
7 ‘Ua latou iloa atu o ia, ‘ona segia lea o latou loto i le ofo i lona lālelei.
8 ‘Ae le‘i fesili atu i ai i se mea e tasi, a ‘ua latou tu‘u atu e ulufafo o ia, o fa‘apea atu i ai: “‘Ia alofagia oe e le Atua o o tatou tamā ma ‘ia fa‘amausalī i lona mana o manatuga uma o lou loto, ‘ina ‘ia fa‘amamaluina Ierusalema ‘iā te oe, ‘ia ta‘ua fo‘i lou igoa i le ‘au pa‘ia ma le ‘au amiotonu.”
9 Ma ‘ua fai ane e i latou uma sa i lea mea ma le leo gatasitasi: “Amene! Amene!”
10 A o Iutita, ‘ua tatalo ia i le Ali‘i, ‘ua ulufafo i le faitoto‘a, o i lā‘ua ma lana ‘au‘auna.
11 A ‘ua o‘o ‘ina alu ifo i le mauga i le tafa mai o ata, ‘ona fa‘afetaia‘i lea ‘iā te ia o tagata leoleo o Asuria ma ‘ua latou pupu‘e ‘iā te ia o fa‘apea mai: “Po o fea ‘e te sau ai, po o fea fo‘i ‘e te alu i ai?”
12 ‘Ua ia tali atu: “O a‘u o le afafine o tagata Eperu; ‘ua ‘ou sola ‘ese i o latou luma, auā ‘ua ‘ou iloa e o‘o ‘ina tu‘uina mai i latou ‘iā te ‘outou tou te vetea, ‘ona ‘ua latou tauemu ‘iā te ‘outou ma ‘ua latou le fia ifo ‘iā te ‘outou ma le loto malie, ‘ia maua ai e i latou le agaalofa i o ‘outou luma.
13 O le mea lava lea na ‘ou mafaufau ifo ai o fa‘apea ifo: ‘Ou te alu atu i luma o le ta‘ita‘i o Holofene, ‘ou te fa‘ailoa atu ai ‘iā te ia a latou mea nanā, ma fa‘asino atu ‘iā te ia le ala o le a mafai ai ‘ona ia maua i latou, ‘ae lē fasia ai se tagata e to‘atasi o lana vaega ‘au.”
14 Ma ‘ua fa‘alogo tagata nei i ana ‘upu ma ‘ua latou va‘ava‘ai mai i ona mata, i lo ‘ua tēte‘i lava o latou mata ‘ona o lo latou matuā ofo i lona lālelei.
15 Ma ‘ua latou fai mai ‘iā te ia: “‘Ua e fa‘asaoina lou ola ‘ona ‘ua e faia lea tonu, ‘ua e sau ai i lo matou ali‘i.
16 A ‘ia e iloa lenei mea; a e tu i ona luma, e agalelei lava ia ‘iā te oe, e matuā fiafia fo‘i lona loto ‘iā te oe.” Ma ‘ua latou ta‘ita‘iina o ia i le fale o Holofene ma tala‘i atu i ai lona sau.
17 A ‘ua ulu atu o ia i ona luma, ‘ona maileia loa lea o Holofene i ona mata.
18 Ma ‘ua fai atu ana fa‘afeao ‘iā te ia: “Po o ai na te tauemu i le nu‘u o tagata Eperu ‘ua i ai o latou fafine e matuā ‘aulelei; ‘ae lē matuā tatau ‘ea ‘ona ta‘u ma i latou ‘ina ‘ia maua mai ai o fafine ia.”
19 O lenei ‘ua iloa e Iutita o Holofene o nofo i le nofoāli‘i sa teuina i le ‘ofu pauli ma le auro ma le samaraki ma ma‘a tāua,
20 ma ‘ua va‘ava‘ai atu i ona mata, ‘ona ifo atu lea ‘iā te ia o pa‘ū faō i le ‘ele‘ele; a ‘ua fa‘atū ‘iā te ia i luga e ‘au‘auna a Holofene i le poloa‘iga a lo latou ali‘i.