1 Ma ‘ua fai atu o Iutita i le nu‘u uma: “Uso e, fa‘alogo mai ia; ‘ia ‘outou fa‘atautau lenei ulu i luga o lo tatou pavali.
2 A o‘o ‘ina oso a‘e le lā, ‘ia ta‘ito‘atasi ma tago i lona ‘au‘upega ma ‘ia ‘outou feosofi i tuāpā, o taufetuli ‘ia iloa ai e lē so ‘outou ō fa‘ananā i lalō, a o lo ‘outou oso lava i le fili.
3 ‘Ona tatau ai lea i tagata Asuria ‘ona sōsōla, ‘ina ‘ia latou fafagu i lo latou ta‘ita‘i mo le tau‘a.
4 ‘Ae a taufetuli o latou ta‘ita‘i i le fale ‘ie o Holofene ma maua ai lona tino mutu o ta‘atia i lona toto, ‘ona maua lea i latou i le fefe.
5 A ‘outou iloa atu fo‘i o sōsōla i latou, ‘aua le fefefe ‘ona mulimuli atu ‘iā te i latou, auā e nutipalaina i latou e le Ali‘i i lalo o ‘outou vae.”
6 ‘Ua iloa e Akiora le vāvega na fai e le Atua o Isaraelu, ‘ona ia lafoa‘i lea o sauniga fa‘anu‘u‘ese, ‘ua ia fa‘atuatua i le Atua ma ‘ua ia peritomeina lona tino, ma ‘ua fa‘aopoopoina o ia i le nu‘u o Isaraelu, ‘atoa ma lana fānau ‘ua mulimuli mai ‘iā te ia e o‘o mai i lenei aso.
7 ‘Ua oso a‘e le lā, ‘ona latou fa‘atautau loa lea le ulu o Holofene i le pavali; ‘ona ta‘itasi lea o tagata ma tago i lona ‘au‘upega ma ‘ua latou ulufafo ma le pisapisaō tele ma le ‘alalaga.
8 ‘Ua iloa atu lea mea e tagata Asuria, ‘ona latou taufetuli ai lea i le fale ‘ie o Holofene.
9 A o i latou sa i le fale ‘ie ‘ua latou ō atu ma pisapisaō i luma o le faitoto‘a o le afeafe o Holofene i le fia fafagu ‘iā te ia, ‘ua latou saga fa‘atele le vāvāō, ‘ina ‘ia fāgua o Holofene i le pisapisaō ‘ae ‘aua le alu atu se tasi e fafagu ‘iā te ia.
10 Auā ‘ua fefefe uma i latou i tu‘itu‘i atu pe ulu atu i le afeafe o le ali‘i sili o le ‘au a Asuria.
11 A ‘ua ō mai o ona ta‘ita‘i mōna ofisa ma tagata tofia uma o le ‘au a le tupu o Asuria, ‘ua latou fai atu i ana ‘au‘auna:
12 “‘Ia ‘outou ulu atu ma fafagu ‘iā te ia, auā ‘ua ulufafo mai o isumu a‘i o latou ana ma ‘ua lē fefefe ‘ona lu‘i mai ‘iā te i tatou i le tau‘a.”
13 ‘Ona ulu atu lea o Pakoa i lona afeafe, ‘ua tu i luma o le ‘ie puipui ma ‘ua ia patilima ai; auā sa manatu o ia ‘ai o momoe i lā‘ua ma Iutita.
14 A ‘ua lē āu lagona e ona taliga sina gāoioi o se tagata ‘ua ta‘oto, ‘ona fa‘alatalata atu ai lea i le ‘ie puipui, ‘ua na si‘i a‘e i luga; a ‘ua iloa atu le tino oti o Holofene, ‘ua leai sona ulu, o ta‘atia i le ‘ele‘ele ma leaga uma i le toto, ‘ona ia ‘alaga atu lea ma le leo tele ma le auē ma ‘ua saei ona ‘ofu.
15 ‘Ua ulu atu fo‘i i le fale ‘ie o Iutita, ‘ua lē maua ai o ia, ‘ona ia ulufafo atu ai lea i luma o le nu‘u.
16 Ma ‘ua fa‘apea atu: “O le fafine Eperu e tasi ‘ua na fa‘amasiasi le ‘āiga o le tupu o Nepukanesa; auā o lenei o lo‘o ta‘atia Holofene i le ‘ele‘ele ma ‘ua lē o ‘iā te ia lona ulu.”
17 ‘Ua fa‘alogo i lea mea o ta‘ita‘i o le ‘au a Asuria, ‘ona latou saei uma lea o latou ‘ofu, ma ‘ua o‘o ‘iā te i latou le mata‘u ma le tetemū e lē ma fa‘amatalaina, ma ‘ua matuā atuatuvale o latou loto;
18 ma ‘ua pā le ‘alaga tele anoanoa‘i i totonu o lo latou togālauapi.