1 ‘Ona poloa‘i lea o Holofene ‘ia ulu atu o Iutita i le mea sa teuina ai ana ‘oloa tāua, ma ‘ua poloa‘i ‘ia nofo lava ia i lea mea; ma ‘ua fa‘atonuina o mea e laulau atu ‘iā te ia mai lona la‘o‘ai.
2 A ‘ua tali mai o Iutita ‘iā te ia, ‘ua fa‘apea mai: “‘Ou te lē mafaia ‘ona ‘ou ‘ai nei i mea ‘ua e poloa‘iina e tu‘u mai ‘iā te a‘u, ne‘i ‘avea ma agasala ‘iā te a‘u; ‘ae ‘ou te ‘ai i mea na ‘ou sau ma a‘u.”
3 ‘Ua fai atu o Holofene ‘iā te ia: “‘Ae a uma ‘iā te oe o mea ia na e sau ma oe, se ā sa matou mea e fai ‘iā te oe?”
4 A ‘ua fai mai o Iutita: “‘Ua soifua lava oe, lo‘u ali‘i e, e lē fa‘aumaina mea nei e lau ‘au‘auna, a ‘ua faia e le Atua i lo‘u lima o mea ‘ua ‘ou manatu i ai. Ma ‘ua ta‘ita‘iina o ia e ana ‘au‘auna i le fale ‘ie na ia fa‘atonuina.”
5 Ma ‘ua tagi mai o Iutita ‘iā Holofene, ‘ina ‘ua ulufale mai, ‘ia fa‘atagaina o ia ‘ia ulufafo i le po ma le vave ao, ‘ina ‘ia tatalo ai ma ‘ai‘oi atu ai i le Ali‘i.
6 Ma ‘ua poloa‘i atu o Holofene i ana ‘au‘auna ‘ia tu‘u lava ia e ulufale ma ulufafo e tusa ma lona faitalia, e ifo atu ai i lona Atua i aso e tolu.
7 I lo ‘ua alu atu lava ia i po uma i le vaimauga o Paitulia, ‘ua tā‘ele ai o ia i le punāvai.
8 ‘Ona toe fo‘i mai lea o ia, o tatalo atu i le Ali‘i, le Atua o Isaraelu, ‘ina ‘ia fa‘atonuina e ia lona ala i le lavea‘iina o lona nu‘u.
9 ‘Ua toe ulufale o ia, ‘ona nofo mamā ai lea o ia i le fale ‘ie se‘ia o‘o ‘ina talisua o ia i le afiafi.
10 ‘Ua o‘o i lona fa o aso, ‘ona fai lea e Holofene o se faigā‘ai ma ana ‘au‘auna, ma ‘ua fai atu ‘iā Pakoa, o lona eunuka: “‘Inā alu ia ma fa‘aoleole i lea fafine Eperu ‘ina ‘ia loto malie ai o ia e nofo ‘iā te a‘u.
11 Auā e matagā i le fa‘a-Asuria pe a ula le fafine i le tane, ma te‘a ‘iā te ia a o le‘i talia lona mana‘o.”
12 ‘Ona alu atu lea o Pakoa ‘iā Iutita ma ‘ua fai atu: “‘Aua ne‘i e fefe, le teine lelei e, ‘ona alu atu i lo‘u ali‘i, ‘ina ‘ia fa‘amamaluina oe i ona luma, ‘ina ‘ia e ‘ai fa‘atasi ma ia ma inu uaina ai ma le fiafia.”
13 A ‘ua tali mai o Iutita ‘iā te ia: “O ai ‘ea a‘u ‘ou te finau atu i lo‘u ali‘i?
14 ‘Ou te faia mea uma lava ‘ua lelei ma ‘ua malie i lona manatu; o mea uma fo‘i e loto malie ai o ia, o mea fo‘i ia e sili ‘ona lelei ‘iā te a‘u i aso uma o lo‘u ola.”
15 ‘Ona tula‘i lea o ia, ‘ua ‘ofu o ia i ona ‘ofu lelei, ‘ona ulufale ai lea ma tu i ona luma.
16 A ‘ua tetemū le loto o Holofene, auā sa mū lona loto i le tu‘inanau ‘iā te ia.
17 Ma ‘ua fai atu o Holofene ‘iā te ia: “‘Ia e inu nei ma e ta‘oto ma le fiafia, auā ‘ua alofaina lava oe i lo‘u loto.”
18 Ma ‘ua fai mai o Iutita ‘iā te ia: “‘Ou te inu lava, lo‘u ali‘i e, auā e ui i aso uma o lo‘u ola, a o le aso nei lava ‘ua sili ‘ona fa‘amamaluina ai o lo‘u agaga.”
19 ‘Ona ia tago lea i mea na saunia mo ia e lana ‘au‘auna ma ‘ua ia ‘ai ma inu i ona luma.
20 Ma ‘ua fiafia tele o Holofene ‘iā te ia ma ‘ua matuā inu tele na‘uā i le uaina, e le‘i fa‘apenā lava ‘ona inu talu mai ‘ona ola o ia.