1 A ‘ua o‘o ‘ina uma a latou ‘upu, ‘ua matuā tigā le loto o Holofene ma ‘ua fai atu ‘iā Akiora:
2 ‘Ua e vavalo ‘iā te i matou o fa‘apea mai, e puipuia le nu‘u o Isaraelu e lo latou Atua; o lenei, ‘ina ‘ia ‘ou fa‘ailoa atu ai ‘iā te oe ‘ua leai se tasi atua, ‘ua na o Nepukanesa lava,
3 a o‘o ‘ina matou taia i latou e pei o se tagata e to‘atasi, ‘ona e oti fo‘i lea o oe fa‘atasi ma i latou i le pelu a tagata Asuria, i le e fa‘aumatia lava o Isaraelu uma fa‘atasi ma oe.
4 ‘Ona e mautinoa ai lea o Nepukanesa o le ali‘i lava ia o le lau‘ele‘ele uma; ‘ona tuia lea o lou tino i le pelu e la‘u ‘au, e tuia lou tino ‘ona e pa‘ū ai lea i ē manunu‘a o Isaraelu, ‘ona e lē toe mānava ai lea, se‘ia fa‘aumatia o oe fa‘atasi ma i latou.
5 Peita‘i ane, ‘āfai ‘ua e tāofi ifo e moni lau valo‘aga, ‘aua ‘e te fa‘aū‘ū ou mata, ‘iā te‘a ‘ese fo‘i ‘iā te oe le tētēvale e aliali ou mata, pe ‘āfai ‘ua e manatu ifo e lē mafai ‘ona taunu‘u o a‘u nei ‘upu.
6 ‘Ae ‘ina ‘ia e iloa ai e o‘o mea ia ‘iā te oe ‘atoa ma i latou, fa‘auta e āfua mai i lenei itūlā o le a fa‘atasia oe ma lo latou nu‘u, ‘ina ‘ia e nofosala fo‘i oe fa‘atasi ma i latou pe a latou talia i la‘u lava pelu o fa‘asalaga e tatau ai.
7 ‘Ona poloa‘i lea e Holofene i ana ‘au‘auna ‘ia latou pupu‘e ‘iā Akiora ma ta‘ita‘i ‘iā te ia i Paitulia ma tu‘uina atu i lima o le fānauga a Isaraelu.
8 ‘Ua tago ‘iā te ia o ‘au‘auna a Holofene, ‘ona latou ō ai lea i le lau‘ele‘ele laugatasi; a ‘ua latou fa‘alata atu i le atumauga, ‘ona oso mai lea le ‘au a ma‘atā a Isaraelu e tete‘e atu ‘iā i latou.
9 A ‘ua ‘alo i latou i le ‘auvae o le mauga ma ‘ua latou nonoa ‘iā Akiora i le tasi la‘au i ona vae mōna lima ma ‘ua latou tu‘ua fa‘apea o noatia i maea ma ‘ua latou toe fo‘i atu i lo latou matai.
10 A o le fānauga a Isaraelu na ō ifo mai Paitulia ‘ua ō mai ‘iā te ia; ‘ua latou tatala ‘iā te ia ma ta‘ita‘i i Paitulia; ‘ua latou fa‘atūina o ia i totonu o le nu‘u ma ‘ua latou su‘esu‘e ‘iā te ia po o le a le ala na tu‘uina ai o ia o noatia e tagata Asuria.
11 O ona po ia sa fai ma ta‘imua o le ‘a‘ai o Usia, le atali‘i o Mika, a‘i le itū‘āiga o Simeona ma Karame, o Otinielu fo‘i lea.
12 O lenei ‘ua tala mai e Akiora, i luma o le ‘au toeaina ma le nu‘u ‘atoa, o ‘upu uma na fai lava e ia e tali atu ai i fesili a Holofene; pe fa‘apefea fo‘i ‘ona fia fasioti ‘iā te ia e le ‘au a Holofene ‘ona o le matā‘upu lea;
13 pe fa‘apefea fo‘i ‘ona poloa‘i e Holofene, i lona ita, ‘ia tu‘uina o ia i tagata Isaraelu; a o‘o fo‘i ‘ina ‘ia fa‘ato‘ilaloina le fānauga a Isaraelu, ‘ona poloa‘i lea ‘ia fasiotia o Akiora fo‘i ia i sauāga ‘ese‘ese, ‘ona o lana fai atu: O le Atua o le lagi, o lo latou puipui lava ia.
14 ‘Ua uma fo‘i ‘ona tala mai e Akiora mea uma ia, ‘ona pa‘ū faō lea o le nu‘u ‘atoa, ō ifo atu i luma o le Ali‘i, ma ‘ua latou fa‘apa‘ūina atu la latou tagi i luma o le Ali‘i, o fētāgisi ma feoi ma le lotogatasitasi,
15 o fai atu: Le Ali‘i e, le Atua o le lagi ma le lalolagi, ‘ia e silasila i lo latou fa‘amaualuga, ‘ia e silasila fo‘i i lo matou nei fa‘atauva‘a, ma liliu mai ou fofoga i mata o ou tagata pa‘ia; ‘ia e fa‘aalitino mai ‘ua e le tu‘ulafoa‘i i ē fa‘alagolago ‘iā te oe, a ‘ua e fa‘amaulaloina o ē fa‘alagolago ‘iā te i latou lava, o ē mitamita i lo latou malosi.
16 ‘Ua tāofia la latou tagi ma ‘ua māe‘a le tatalo a le nu‘u na faia i le aso ‘atoa, ‘ona latou fa‘amafanafana lea ‘iā Akiora,
17 o fai atu: O le Atua o matou tamā, ‘ua e tala‘iina lona mana, o ia na te tu‘u mai ‘iā te oe lenei taui, o le a e va‘ava‘ai lava oe i le fa‘aumatia o i latou.
18 ‘Ae a o‘o ‘ina foa‘i mai e le Ali‘i lo matou Atua lenei sa‘olotoga i ana ‘au‘auna, ‘ia i ai fo‘i le Atua ‘iā te oe i totonu o i matou, ‘ina ‘ia e mau ai lava oe ma lou ‘āiga uma fa‘atasi ma i matou, pe a malie i ai o lou loto.
19 ‘Ua uma le filifiliga, ‘ona talia lea o ia e Usia i lona fale ma ‘ua saunia ai le talisuaga tele mo ia.
20 Ma ‘ua vala‘auina i ai le ‘au toeaina ‘atoa uma; ‘ua mavae le itū aso o le anapogi, ‘ona latou ‘a‘ai fa‘atasi ai lea.
21 Mulimuli ane ‘ua fa‘apotopotoina le nu‘u ‘atoa, ‘ona latou saga tatalo lea i lenā mea i le po ‘atoa, o tagi atu i le fesoasoani mai a le Atua o Isaraelu.