1 Kur dolën nga tempulli, njëri prej dishepujve i tha: «Mësues, shiko ç’gurë e ç’ndërtesa!».
2 Jezui i tha: «A i sheh këto ndërtesa të mëdha? Nuk do të mbesë gur mbi gur pa u rrëzuar».
3 Kur u ul në Malin e Ullinjve përballë tempullit, Pjetri, Jakobi, Gjoni dhe Andrea e pyetën Jezuin veçmas:
4 «Na thuaj, kur do të ndodhin këto gjëra dhe cila do të jetë shenja se të gjitha ato do të përmbushen?».
5 Atëherë Jezui filloi t’u thoshte:«Hapni sytë se mos ju mashtron njeri.
6 Shumë veta do të vijnë në emrin tim e do të thonë: “Unë jam Krishti” dhe do të mashtrojnë shumë njerëz.
7 Kur të dëgjoni për luftëra e lajme luftërash, mos u tronditni. Këto duhet të ndodhin, por ky nuk do të jetë ende fundi.
8 Një komb do të ngrihet kundër një kombi tjetër dhe një mbretëri kundër një mbretërie tjetër. Në disa vende do të ketë tërmete e zi buke. Ky do të jetë fillimi i dhimbjeve të lindjes.
9 Por kini kujdes për veten, se do t’ju dorëzojnë nëpër sinedra dhe do t’ju rrahin nëpër sinagoga. Për shkakun tim do t’ju nxjerrin që të dëshmoni para princërve e mbretërve.
10 Por më parë ungjilli duhet t’u predikohet të gjitha kombeve.
11 Kur t’ju dorëzojnë, mos u shqetësoni se çfarë do të thoni, por thoni çfarë t’ju jepet në atë çast, sepse nuk do të jeni ju ata që flisni, por Shpirti i Shenjtë.
12 Vëllai do ta dorëzojë vëllanë, që ta dënojnë me vdekje e babai të birin. Bijtë do të ngrihen kundër prindërve dhe do t’i çojnë drejt vdekjes.
13 Të gjithë do t’ju urrejnë për shkak të emrit tim, por ai që do të qëndrojë deri në fund, do të shpëtohet.»
14 «Po kur të shihni tmerrin e shkretimit, që qëndron atje ku nuk i takon - kush lexon le ta kuptojë - atëherë ata që janë në Jude le të arratisen maleve.
15 Ai që do të ndodhet mbi çati, të mos zbresë e të mos hyjë brenda për të marrë gjë nga shtëpia e tij!
16 Ai që do të jetë në arë, të mos kthehet prapa për të marrë mantelin!
17 Mjerë gratë shtatzëna dhe ato që mëkojnë fëmijë në ato ditë!
18 Lutuni që kjo të mos ndodhë në dimër,
19 sepse në ato ditë do të bjerë një mjerim i paparë ndonjëherë deri më sot, që kur Perëndia krijoi gjithçka, dhe të tillë mjerim nuk do të ketë më kurrë.
20 Po të mos i kishte shkurtuar Zoti ato ditë, nuk do të shpëtonte asnjeri, po për hir të atyre që ka zgjedhur, ai i shkurtoi ato ditë.
21 Nëse dikush ju thotë “ja ku është Krishti!”, ose “ja, është këtu!”, mos i besoni.
22 Do të dalin krishtë të rremë e profetë të rremë, që do të bëjnë mrekulli e shenja, që mundësisht të mashtrojnë edhe të zgjedhurit.
23 Por kini kujdes! Unë ju paralajmërova për të gjitha.»
24 «Në ato ditë, pas pikëllimit,dielli do të errësohetdhe hëna nuk do të ndriçojë.
25 Yjet do të bien nga qiellidhe pushtetet që janë në qielldo të tronditen.
26 Pastaj do të shohin Birin e njeriut duke ardhur mbi re me pushtet të madh e me lavdi.
27 Atëherë ai do të dërgojë engjëjt dhe do të mbledhë të zgjedhurit e tij nga të katër anët, prej skajeve të dheut deri te skajet e qiellit.»
28 «Mësoni nga shëmbëlltyra e fikut. Sapo dega e tij bëhet e njomë dhe nxjerr gjethe, ju e dini se po afrohet vera.
29 Kështu edhe ju, kur të shihni se po ndodhin këto gjëra, ta dini se fundi është afër, te dera.
30 Me të vërtetë po ju them se kjo brezni nuk do të kalojë pa ndodhur të gjitha këto gjëra.
31 Qielli e toka do të shkojnë, por fjalët e mia jo.»
32 «Askush nuk e di atë ditë apo atë orë. As engjëjt në qiell, as Biri, por vetëm Ati.
33 Kini kujdes dhe rrini zgjuar, se nuk e dini kur do të vijë koha.
34 Kjo është si puna e atij njeriut që niset për rrugë. Ai largohet nga shtëpia, i cakton secilit shërbëtor punën e vet dhe e urdhëron rojtarin e derës që të rrijë zgjuar.
35 Prandaj rrini zgjuar se nuk e dini kur do të vijë i zoti i shtëpisë, në mbrëmje a në mesnatë, në agim a në mëngjes,
36 që nëse vjen befasisht, të mos ju gjejë në gjumë.
37 Atë që ju them juve, ua them të gjithëve: rrini zgjuar!».