1 Ka selemo sa boraro sa Osea, mora Ela, morena wa Iseraele, Esekiase, mora Akase, morena wa Juda, a qala ho busa.
2 O ne a le dilemo tse mashome a mabedi a metso e mahlano, ha a qala ho busa; a busa ka dilemo tse mashome a mabedi a metso e robileng mono o le mong Jerusalema. Lebitso la mmae e ne e le Abi, moradi wa Sakaria.
3 A etsa ho leng hotle mahlong a Jehova, le ka tsohle tse entsweng ke Davida ntatae.
4 A tlosa dinqalo tse diphahameng, a robaka ditshwantsho, a poma diashera, a robaka le noha ya koporo e entsweng ke Moshe, kahobane ho fihlela mehleng eo, bana ba Iseraele ba ne ba ntse ba e tjhesetsa dibano; a e rea Nehushtane (ntho ya koporo).
5 A itshepela Jehova, Modimo wa Iseraele; hara marena wohle a Juda a bileng teng kamorao ho yena leha e le kapele ho yena, ha ho a ka ha eba ya tshwanang le yena.
6 A kgomarela Jehova, a se ke a lesa ho mo latella; a nna a boloka taelo tsa hae, tseo Jehova a di laetseng Moshe.
7 Jehova a ba le yena; ebile moo a qhomehang nthong tsohle tseo a di etsang. A fetohela morena wa Assiria a se ke a hlola a mo sebeletsa.
8 A hlola Bafilesta ho fihlela Gasa le mathoko a teng, ho tloha ditoreng tsa dibohodi ho fihlela metseng e marako.
9 Ka selemo sa bone sa ho busa ha Esekiase, e leng selemo sa bosupa sa Osea, mora Ela, morena wa Iseraele, Salmanasare, morena wa Assiria, a futuhela Samaria, a o thibella.
10 Ha dilemo tse tharo di fetile, a o hapa; ka selemo sa botshelela sa Esekiase, e leng selemo sa boroba mono o le mong sa Osea, morena wa Iseraele, Samaria wa hapuwa.
11 Morena wa Assiria a isa Baiseraele Assiria kgolehong, a ba bea Hala, le Habore, le pela noka ya Gosane, le metseng ya Bamede,
12 e le kahobane ba sa ka ba utlwa lentswe le Jehova, Modimo wa bona, ba mpa ba tlola selekane sa hae sa tsohle tseo Moshe, mohlanka wa hae a neng a di laetse, ba se ke ba utlwa, ba se ke ba etsa.
13 Ka selemo sa leshome le metso e mene sa ho busa ha Esekiase, Sankeribe, morena wa Assiria, a futuhela metse yohle ya Juda e marako, mme a e kena.
14 Jwale Esekiase, morena wa Juda, a romela ho morena wa Assiria, Lakishe, a re: Ke sitilwe; kgutla ho nna; seo o tla ntjarisa sona ke tla se jara. Morena wa Assiria a lefisa Esekiase, morena wa Juda, ditalenta tse makgolo a mararo tsa silefera, le talenta tse mashome a mararo tsa kgauta.
15 Esekiase a mo nea silefera yohle e fumanweng tlung ya Jehova le bobolokelong ba ntlo ya morena.
16 Mohlang oo, Esekiase a manamolla kgauta e mamating a tempele ya Jehova, le e difateng tsa menyako, tseo Esekiase, morena wa Juda, a neng a di manehile, a e nea morena wa Assiria.
17 Leha ho le jwalo, morena wa Assiria, ha a le Lakishe, a romela Tharthane, le Rabe-Sarise, le Rabshake, ka makgotla a mangata, ho Esekiase, Jerusalema. Ba tla, ba fihla pela Jerusalema; ha ba fihlile, ba tla, ba ema moeding wa letsha le kahodimo, mmileng o pela tshimo ya mohlatswi.
18 Ba howeletsa morena; yaba ho tswela ho bona Eliakime, mora Hilkia, molotolotsi wa ntlo ya borena, le Shebna, mongodi, le Jowa, mora Asafe, mmoloki wa mangolo a mmuso.
19 Rabshake a re ho bona: Ereng ho Esekiase: Ho itswe ke morena e moholo, morena wa Assiria. Seo o se tshepileng keng?
20 O re — empa ke mantswe a molomo feela — o re, morero le matla a teng a ho lwana; empa o tshepile mang, ha o mphetohetse?
21 Ke fela ke bona hobane o tshepile Egepeta, lehlaka leno le tenyetsehileng, leo, ekareng motho ha a ikokotlela ka lona, le ya mo hlaba seatla, le se phunye. Faro, morena wa Egepeta, o ka lona ho bohle ba mo tshepang.
22 Leha le re ho nna, le tshepile Jehova, Modimo wa lona, hleka hase yena eo Esekiase a tlositseng nqalo tsa hae tse diphahameng le dialetare tsa hae, a re ho Juda le ho Jerusalema: Le tla kgumama pela aletare ena feela e Jerusalema?
23 Jwale, o ke o etse tumellano le monga ka, morena wa Assiria, ke o nee dipere tse dikete tse pedi, ha ekaba o ka ntsha bakalli ba di kallang!
24 O tla leleka jwang tona e le nngwe hara bahlanka ba banyenyane ba monga ka? Empa eka o tshepile hore o tla bona makoloi le bapalami Egepeta!
25 Hleka o re, ke tlile jwale kantle ho Jehova hore ke lwantshe setsha sena, ke se fedise? Jehova ke yena ya itseng ho nna: Ya lwantsha fatshe leo, o le fedise.
26 Ebile Eliakime, mora Hilkia, le Shebna le Jowa ba re ho Rabshake: O ke o bue le rona bahlanka ba hao ka Sesiria, hobane re a se utlwa; o se ke wa bua le rona ka Sejuda, tsebeng tsa batho ba hodima lerako.
27 Rabshake a re ho bona: Ana o re, monga ka o nthometse ho wena le ho monga hao feela ho bua taba tsena na? Na hase le ho banna ba dutseng hodima lerako, hore ba tsebe hoba ba tla be ba je masepa a bona, mme ba nwe moroto wa bona hammoho le lona na?
28 Ebile moo Rabshake a emang, a howeletsa ka lentswe le leholo ka Sejuda, a bolela, a re: Utlwang taba ya morena e moholo, morena wa Assiria.
29 Morena o re: Le se ke la thetswa ke Esekiase, hobane a ke ke a le namolela matsohong a ka.
30 Esekiase a se ke a le tshepisa Jehova, ka ho re, Jehova o tla le namolela ruri, mme motse oo o ke ke wa neelwa matsohong a morena wa Assiria.
31 Le se ke la kgolwa ke Esekiase, hobane ho itswe ke morena wa Assiria: Etsang kgotso le nna, le tswele ho nna, le tle le je e mong le e mong morara wa hae, e mong le e mong a je feiye ya hae, e mong le e mong a nwe metsi a sediba sa hae;
32 ke be ke tle, ke le nkele fatsheng le kang fatshe la lona, fatshe la koro le la veine, fatshe la bohobe le la masimo a merara, fatshe la ole ya mehlwaare le la dinotshi, le tle le phele, le se ke la shwa. Le se ke la nna la utlwa Esekiase, ha a le eletsa, a re: Jehova o tla re namolela.
33 Haele ho namolela, hleka o mong o teng wa medimo ya ditjhaba o namoletseng lefatshe la wona matsohong a morena wa Assiria na?
34 E kae medimo ya Hamathe le ya Arpade? E kae medimo ya Sefarvaime, ya Hena le ya Ivva? Na le wona Samaria o namoletswe matsohong a ka na?
35 Ke efe ho medimo yohle ya mafatshe ao e namoletseng mafatshe a yona matsohong a ka, ha ho thwe, Jehova a ka namolela Jerusalema matsohong a ka?
36 Setjhaba sa mpa sa nna sa kgutsa, se se ke sa fetola letho, hobane taelo ya morena e be e itse: Le se ke la mo fetola.
37 Ebile Eliakime, mora Hilkia, molotolotsi wa ntlo ya borena, le Shebna mongodi, le Jowa, mora Asafe, mmoloki wa mangolo a mmuso, ba tla ho Esekiase, ba hahotse diaparo tsa bona, ba mo tsebisa mantswe a Rabshake.