1 Yaba moporofeta Elisha o bitsa e mong wa bara ba baporofeta, a re ho yena: Itlame letheka, o nke lenaka la ole letsohong la hao, o ye Ramothe-Gileade.
2 Etlere ha o fihla teng, o batle Jehu, mora Josafate, mora Nimshi; o ntano kena, o mo tlose hara banababo, o be o mo kenye kamoreng e kathoko.
3 Jwale o nke lenaka la ole, o mo tshele yona hloohong, o re: Ho itswe ke Jehova: Ke o tlotsitse ho ba morena wa Iseraele. O ntoo bula lemati, o balehe, o se ke wa dieha.
4 Ebile mohlankana eo wa moporofeta o ya Ramothe-Gileade.
5 Ha a fihla, a bona balaodi ba makgotla ba dutse, a re: Ke na le taba le wena, monghadi. Jehu a re: Le mang ho rona moo? A re: Le wena, monghadi.
6 Jehu a tloha, a kena ka tlung, mme moporofeta a mo tshela ka ole hloohong, a re ho yena: Ho itswe ke Jehova, Modimo wa Iseraele: Ke o tlotsitse ho ba morena wa setjhaba sa Jehova, sa Iseraele.
7 O tla timetsa ba ntlo ya Akabe, monga hao, ke tle ke phetetse ho Jesebele madi a baporofeta, bahlanka ba ka, le madi a bahlanka bohle ba Jehova.
8 Ntlo yohle ya Akabe e tla timela, ke timetse ba Akabe ba batona bohle, ba ruilweng le ba sa ruwang ba Iseraeleng.
9 Ke tla etsa ntlo ya Akabe jwalokaha ke entse ntlo ya Jeroboame, mora Nebathe, le ntlo ya Baesha, mora Akija.
10 Haele Jesebele, dintja di tla mo ja naheng ya Jisreele, ho se ya mo patang. Yaba o bula lemati, a baleha.
11 Jehu a tswela ho bahlanka ba monga hae. Ba re ho yena: Na ke kgotso na? Lehlanya leno le ne le tletseng ho wena? A re ho bona: Le a mo tseba monna eo le puo tsa hae.
12 Ba mpa ba re: O leshano; re bolelle. A re: O mpoleletse ka hore le hore, o itse: Jehova o re: Ke o tlotsitse ho ba morena wa Iseraele.
13 Yaba ba phakisa ba nka e mong le e mong kobo ya hae, ba di bea tlasa hae methating; ba letsa diterompeta, ba re: Jehu ke morena.
14 Jehu, mora Josafate, mora Nimshi, a fetohela Jorame jwalo. Yena o ba a ile le Baiseraele bohle ho sireletsa Ramothe-Gileade, ka baka la Hasaele, morena wa Siria.
15 Morena Jorame o ne a kgutletse Jisreele, a ile ho phekoloa teng maqeba ao Basiria ba neng ba mo hlabile wona, mohla a lwantshang Hasaele, morena wa Syria. Jehu a re: Ha le hopola jwalo, ho se ke ha eba le a mong ya tswang motseng, leha e le ho thoba, ho ya tsebisa ba Jisreele.
16 Ebile Jehu o kena koloing, a ya Jisreele, hobane Jorame o ne a sekame diphateng teng, mme Akasia, morena wa Juda, o ne a tlile ho bona Jorame.
17 Ho bo ho eme sebohodi hodima tora ya Jisreele; sa bona sehlopha sa Jehu se etla, sa re: Ke bona sehlopha. Jorame a re: Ho nkwe mokalli e mong, a romelwe ho ba kgahlanyetsa, a re: Na ke kgotso na?
18 Yaba mokalli o tloha, a ya kgahlanyetsa Jehu, a re: Ho itswe ke morena: Na ke kgotso na?
19 Jehu a re: O na le taba efe le kgotso? Fetela kamorao ho nna. Sebohodi sa howa, sa re: Lenqosa le fihlile ho bona, empa ha le boye.
20 A boela a roma mokalli e mong, a tla ho bona, a re: Ho itswe ke morena: Na ke kgotso na? Jehu a re: O na le taba efe le kgotso? Fetela kamorao ho nna.
21 Sebohodi sa pheta sa re: O fihlile ho bona, empa ha a boye; ho kgemisa ha bona eka ho kgemisa ha Jehu, mora Nimshi, hobane o kgemisa ka bohale.
22 Ebile Jorame o re: Bofang. Ba bofa koloi ya hae. Jorame morena wa Iseraele, le Akasia morena wa Juda, ba tloha, e mong le e mong koloing ya hae, ba ya kgahlanyetsa Jehu, ba mo fihlela tshimong ya Nabothe wa Jisreele.
23 Jorame, ha a bona Jehu, a re ho yena: Na ke kgotso na, Jehu? Yena a re: Kgotso e ka ba e jwang, ha bofebe ba Jesebele, mmao, le boloi ba hae bo bongata bo ntse bo le teng? Jorame a reteletsa koloi ya hae, a baleha, mme a re ho Akasia: Oho, Akasia, re ekilwe.
24 Empa Jehu a fula ka seqha, a hlaba Jorame pakeng tsa mahetla, motsu wa ba wa tla tswa pelong ya hae; mme a wela koloing ya hae.
25 Jehu a re ho Bidkare, tona ya hae: Mo nke, o mo lahlele tshimong ya Nabothe wa Jisreele; hopola hobane, mohla re neng re kaletse hammoho le wena, re latetse Akabe ntatae, Jehova o boletse tsuo hodima hae,
26 kamoo Jehova a itseng kateng: Kannete maobane ke bone madi a Nabothe le madi a bara ba hae. Ke tla iphetetsa ho wena hona tshimong eo. Ho itswalo ke Jehova. Mo nke ke hona, o mo lahlele tshimong, jwalokaha Jehova a boletse.
27 Eitse Akasia, morena wa Juda, ha a bona hoo, a baleha ka tsela e yang tlung e ka tshimong. Jehu a mo phallela, a re: Le yena le mmolaele koloing. Ba mo hlabela moepeng wa Gure, o pela Jibleame; a ba a balehela Megiddo, a shwela teng.
28 Bahlanka ba hae ba mo isa Jerusalema ka koloi, ba mo pata lebitleng la hae ho bontatae, motseng wa Davida.
29 Ke ka selemo sa leshome le motso o mong sa Jorame, mora Akabe, Akasia a neng a qadile ho busa Juda.
30 Ha Jehu a fihla Jisreele, Jesebele a utlwa; yaba o itaka mahlo ka pilo, a ikgabisa hlooho, a nyarela ka sefensetere.
31 Jehu, ha a kena ka kgoro, Jesebele a re: Na ke kgotso, wena Simri, mmolai wa monga hao?
32 Jehu a lelaletsa mahlo a hae sefensetereng, a re: Ke mang ya nkemelang, ke mang? Balebedi ba babedi, kapa ba bararo, ba mo sheba.
33 A re: Mo diheleng. Ba mo dihela, madi a mang a hae a qatohela lerakong le dipereng; mme a mo hatakela ka maoto.
34 A ntoo kena, a ja, a nwa; a ba a re: Nkang mosadi yane ya soto, le mo epele, hobane ke moradi wa morena.
35 Ba ya, ba re ba mo epela; ba mpa ba se ke ba fumana letho, haese lehata, le maoto le diatla tsa matsoho a hae.
36 Ebile ba kgutla, ba mo tsebisa. A re: Ke yona taba eo Jehova a neng a e boletse ka Elia wa Thishba, mohlanka wa hae, a re: Naheng ya Jisreele, dintja di tla ja nama ya Jesebele;
37 mme setopo sa Jesebele se tla ba jwaloka kgapane hodima lefatshe, naheng ya Jisreele, ho tle ho se ke ha thwe: Ke yena Jesebele.