1 Elisha a re: Utlwang lentswe la Jehova: Jehova o re: Hosasane, ha ho le jwale, tekanyo ya phofo e ntle e tla reka shelele e le nngwe, mme tekanyo tse pedi tsa harese di tla reka shelele e le nngwe, kgorong ya Samaria.
2 Tona ya morena eo a ikokotlelang ka letsoho la yona ya fetola monna wa Modimo, ya re: Na o re, le hoja Jehova a ka phunya masoba lehodimong, taba e jwalo e ka etsahala na? Elisha a re: O tla e bona ka mahlo a hao, empa o ke ke wa ja tsa teng.
3 Ha bo ho le banna ba balepera ba le bane pela kgoro ya motse; ba bolellana, ba re: Na re tla dula moo, re be re shwe na?
4 Ha re ka re, re tla kena motseng, tlala e kgolo e teng motseng, mme re tla shwela teng; leha re ka itulela mona, le teng re tla shwa; a re ke re yeng, re itahleleng diahelong tsa Basiria; ha ba re tlohela re phela, re tla phela; leha ba ka re bolaya, re tla shwa.
5 Ebile ba tloha ka shwalane, ba ya diahelong tsa Basiria; ha ba fihla qalong ya diahelo tsa Basiria, ba bona ho se motho teng.
6 Hobane Morena o ne a utlwisitse makgotla a Siria modumo wa makoloi, le modumo wa dipere, le modumo wa bahlabani ba bangata, ba ba ba bolellana, ba re: Bonang, morena wa Iseraele o re memetse marena a Bahethe le marena a Baegepeta.
7 Ebile ba tloha, ba baleha ka shwalane, ba siya ditente tsa bona, le mapere a bona, le maesele a bona, kamoo diahelo di neng di le kateng, ba baleha ba re, ba pholosa bophelo ba bona.
8 Balepera bao ha ba fihla qalong ya diahelo, ba kena tenteng e nngwe, ba eja, ba enwa, ba nka teng silefera le kgauta le diaparo, ba ya di pata; ba boya, ba kena tenteng e nngwe, ba nka tsa teng, ba ya di pata.
9 Yaba ba bolellana, ba re: Ha re etse hantle; letsatsi lena ke tsatsi la thabo, re mpa re kgutsitse; ha re dieha e ba e eba hosasa, kotlo e nngwe e tla re hlahela; ha re tloheng hle, re ye, re tsebise ba ntlo ya morena.
10 Ba ya, ba memetsa balebedi ba kgoro ya motse, ba re: Re be re ile diahelong tsa Basiria; ra fumana ho se motho teng, ho se lentswe la motho, empa e le dipere tse holehilweng, le diesele tse holehilweng, le ditente jwalokaha di be di dutse.
11 Balebedi ba bitsa, mme ba tsebisa ba ka tlung ya morena.
12 Yaba morena o tsoha hara bosiu, a re ho bahlanka ba hae: Ha nke ke le tsebise seo Basiria ba re etseditseng sona; ba tsebile hobane re na le tlala; jwale ba tswile diahelong ho ya ipata naheng, ka ho re: Ha ba tswa motseng, re tla ba tshwara ba sa phela, re ntoo kena motseng.
13 E mong wa bahlanka ba hae a mo fetola, a re: Ho nkwe pere tse hlano ho tse setseng, tse siilweng motseng, leha di fokotse jwaloka bongata bohle jwa Baiseraele ba setseng motseng; di fokotse jwaloka bongata jwa Baiseraele ba timelang. A re romeleng, re tle re bone.
14 Ebile ba nka makoloi a mabedi le dipere tsa wona, mme morena a romela ho latela makgotla a Basiria, a re: Eyang, le bone.
15 Ba ya, ba ba latela ho ya fihla Jordane, ba bona tsela yohle e tletse diaparo le mesebetsi eo Basiria ba neng ba e lahlile ke ho potlaka. Mme manqosa a kgutla, a tsebisa morena.
16 Setjhaba sa tswa, sa phahla diahelo tsa Basiria. Ya eba moo tekanyo e le nngwe ya phofo e ntle e rekang shekele e le nngwe, le tekanyo tse pedi tsa harese di rekang shekele, jwalokaha Jehova a ne a boletse.
17 Morena a bea tona ya hae, eo a ikokotlelang ka letsoho la yona, ho lebela kgoro; empa setjhaba sa mo hatakela kgorong a shwa ka polelo eo monna wa Modimo a neng a e boletse, mohla morena a theohetseng ka ha hae.
18 Monna wa Modimo o ne a boleletse morena, a re: Hosasane, ha ho le jwalo, tekanyo tse pedi tsa harese di tla reka shekele, le tekanyo ya phofo e ntle e tla reka shekele kgorong ya Samaria.
19 Tona eo e ne e fetotse monna wa Modimo, ya re: Le hoja Jehova a ka phunya masoba lehodimong, taba e jwalo na e ne e ka etsahala na? Elisha a re: Bona, o tla bona ka mahlo a hao, empa o ke ke wa ja tsa teng.
20 Ha fela ha eba jwalo ho yena, hobane setjhaba sa mo hatakela kgorong, a shwa.