1 Elisha a ntoo bolella mosadi eo a pholositseng mora hae, a re: Tloha, o ikele le ba ntlo ya hao, o ye ho jaka moo o ka jakang teng; hobane Jehova o laelitse tlala, mme e fela e tla wa lefatsheng ka dilemo tse supileng.
2 Mosadi a tloha, a etsa ka polelo ya monna wa Modimo, a ikela le ba ntlo ya hae, a jaka naheng ya Bafilesta ka dilemo tse supileng.
3 Ha dilemo tse supileng di fetile, mosadi eo a kgutla naheng ya Bafilesta, a ya rapela morena ka baka la ntlo ya hae le la masimo a hae.
4 Morena o ne a buisana le Gehasi, mohlanka wa monna wa Modimo, a re ho yena: Ako mphetele tsohle tse kgolo tse entsweng ke Elisha.
5 Yare a sa phetela morena kamoo a neng a tsositse mofu kateng, ha hlaha mosadi eo mora hae a tsositsweng, a tla rapela morena ka baka la ntlo ya hae le la masimo a hae. Gehasi a re: Oho, morena, monga ka, ke yena enwa mosadi le mora hae, eo Elisha a mo tsositseng.
6 Morena a botsa mosadi, mme yena a mo phetela. Ebile morena o mo nea tona, a re: Eya, o busetse tsohle tsa hae ho yena le tsohle tse beilweng ke masimo a hae, haesale a tloha hae, ho fihlela la kajeno.
7 Yaba Elisha o ikela Damaseka. Ben-Hadade, morena wa Siria, o ne a kula, mme a bolellwa, ha thwe: Monna wa Modimo o tlile kwano.
8 Morena a re ho Hasaele: Nka mpho, o ye, o kgahlanyetse monna wa Modimo, o botse Jehova ka yena, o re: Ana ke tla fola lefung lena na?
9 Hasaele a ya, a mo kgahlanyetsa, a tshwere mpho eo, e le tsohle tse molemo tsa Damaseka, tse belesitsweng dikameleng tse mashome a mane; a ya, a ema pela hae, a re: Ben-Hadade, mora hao, morena wa Siria, o nthometse ho wena, a re: Ana ke tla fola lefung lena na?
10 Elisha a re ho yena: Eya, o mmolelle, o re: Ho fola o tla fola; empa Jehova o mpontshitse hobane o tla shwa ruri.
11 Monna wa Modimo a ba a mo hlaba ka mahlo, a mo tjamela halelele; a ba a lla.
12 Hasaele a re: O llelang, monga ka? A re: Ke kahobane ke tseba tse mpe tseo o tla di etsetsa bana ba Iseraele; o tla tjhesa diqhobosheane tsa bona; bahlankana ba bona o tla ba harinya ka sabole, bana ba bona o ba batanye majweng, o petsole le basadi ba bona bao e leng baimana.
13 Hasaele a re: Mohlanka wa hao keng haele moo ke le ntja feela, hore ke etse tse kalo? Elisha a re: Jehova o mpontshitse hobane o tla ba morena wa Siria.
14 Ebile o tloha ho Elisha, a ikela ho monga hae; yena a re: Elisha o itseng ho wena? A re: O mpoleletse hobane, haele ho fola, o tla fola.
15 Empa eitse ka hosasa, a tloha, a nka lesela le letenya, a le ina metsing, a mo pupetsa sefahleho ka lona; yaba o a shwa; mme Hasaele ya eba morena tulong tsa hae.
16 Ka selemo sa bohlano sa Jorame, mora Akabe, morena wa Iseraele, [Josafate e le morena wa Juda,] Jorame, mora Josafate, morena wa Juda, a qala ho busa.
17 O ne a le dilemo tse mashome a mararo a metso e mmedi, ha a qala ho busa, a busa ka dilemo tse robileng meno e le mmedi Jerusalema.
18 A tsamaya ka mehlala ya marena a Iseraele, kamoo ntlo ya Akabe e entseng kateng, hobane a ne a nyetse moradi wa Akabe; a etsa ho leng hobe mahlong a Jehova.
19 Leha ho le jwalo, Jehova ha a ka a rata ho timetsa Juda, ka baka la Davida, mohlanka wa hae, jwalokaha a ne a mmoleletse, a re, o tla mo nea lebone la kamehla hara bara ba hae.
20 Mehleng ya hae, Baedomo ba fetohela Juda, ba ipehela morena.
21 Jorame a ya Tsaire ka makoloi a hae wohle; bosiu a tsoha, a qhala Baedomo ba mo teetseng hare, le balaodi ba makoloi, ba ba ba balehela tenteng tsa bona.
22 Leha ho le jwalo, Baedomo ba nna ba fetohela Juda, ho fihlela kajeno; le motse wa Libna wa fetohela Juda mohlang oo.
23 Haele taba tse ding tsa Jorame, le tsohle tseo a di entseng, ha ke re, di ngodilwe bukeng ya ditaba tsa ho phela ha marena a Juda?
24 Jorame a orohela ho bontatae, a patwa ho bontatae motseng wa Davida, mme Akasia, mora hae, ya eba morena tulong tsa hae.
25 Ka selemo sa leshome sa Jorame, mora Akabe, morena wa Iseraele, Akasia, mora Jorame, morena wa Juda, a qala ho busa.
26 Akasia o ne a le dilemo tse mashome a mabedi a metso e mmedi, ha a qala ho busa; a busa selemo se le seng Jerusalema; lebitso la mmae e ne e le Athalia, moradi wa Omri, morena wa Iseraele.
27 A ya ka mehlala ya ba ntlo ya Akabe, a etsa tse leng mpe mahlong a Jehova, jwaloka ntlo ya Akabe, hobane a ne a nyallane le ba ntlo ya Akabe.
28 Mohlomong, ba ya Ramothe-Gileade le Jorame, mora Akabe, ho lwantsha Hasaele, morena wa Siria; empa Basiria ba hlaba Jorame.
29 Ebile morena Jorame o kgutlela Jisreele ho phekolwa maqeba ao Basiria ba mo hlabileng wona Rama, mohla a lwanang le Hasaele, morena wa Siria, mme Akasia, mora Jorame, morena wa Juda, a theohela Jisreele, ho ya bona Jorame, mora Akabe, kahobane a ne a kula.