33 بنی مراری کے خاندانوں کو جو کُچھ خِدمت خَیمۂِ اِجتماع میں ہارُون کاہِن کے بیٹے اِتمر کے ماتحت کرنا ہے وہ یِہی ہے۔
34 چُنانچہ مُوسیٰ اور ہارُون اور جماعت کے سرداروں نے قہاتیوں کی اَولاد میں سے اُن کے گھرانوں اور آبائی خاندانوں کے مُطابِق۔
35 تِیس برس کی عُمر سے لے کر پچاس برس کی عُمر تک کے جِتنے خَیمۂِ اِجتماع میں کام کرنے کے لِئے مَقدِس کی خِدمت میں شامِل تھے اُن سبھوں کو گِن لِیا۔
36 اور اُن میں سے جِتنے اپنے گھرانوں کے مُوافِق گِنے گئے وہ دو ہزار سات سَو پچاس تھے۔
37 قہاتیوں کے خاندانوں میں سے جِتنے خَیمۂِ اِجتماع میں خِدمت کرتے تھے اُن سبھوں کا شُمار اِتنا ہی ہے ۔ جو حُکم خُداوند نے مُوسیٰ کی معرفت دِیا تھا اُس کے مُطابِق مُوسیٰ اور ہارُون نے اُن کو گِنا۔
38 اور بنی جیرسون میں سے اپنے گھرانوں اور آبائی خاندانوں کے مُطابِق۔
39 تِیس برس سے لے کر پچاس برس کی عُمر تک کے جِتنے خَیمۂِ اِجتماع میں کام کرنے کے لِئے مَقدِس کی خِدمت میں شامِل تھے وہ سب گِنے گئے۔