1 O le tausaga e tasi le selau ma le fagafulu ma le iva, na logo ai ‘iā Iuta le sau o Atioko ma le itūtau‘a e to‘atele lava, e tau ma Iuta,
2 ‘ua fa‘atasi fo‘i ma o Lusia, lona fa‘atamā ma lana failautusi sili, ‘ae fa‘atasi ma i lā‘ua le selau afe ma le sefulu o afe o fitafita sāvavali ma le lima afe o ē ti‘eti‘e i solofanua ma elefane e luafulu ma le lua, ma le tolu selau o ta‘avale ‘ua puipuia i sele saito ma‘ama‘ai.
3 Sa fa‘atasi fo‘i ma i latou o Menelao; sa ia fa‘aoso ‘iā Atioko ma le fa‘a‘ole‘ole, e lē ‘ona o le fia fa‘aola i lona nu‘u, ‘ae ‘ona o le fa‘amoemoe e toe maua ai e ia lona tofiga sili.
4 A o le Tupu o tupu ‘ua na fa‘aoso le ita o Atioko i lea tagata amio leaga; ‘ua ta‘ulemū ‘iā te ia e Lusia o ia lea o le pogai o mea leaga uma na tutupu; ‘ona ia poloa‘i lea ‘ia pu‘eina Menelao ma ia fasia i le ala sa masani ai i lea lava nu‘u.
5 Sa i ai i lea mea le ‘olo e limagafulu tulilima lona maualuga, ‘ua si‘omia i ona itū uma i se faupuega lefulefu, ‘ua i ai fo‘i le tofē i ona lalo ifo.
6 O le ‘olo lenā na ia poloa‘i ‘ia lafoia ai i le lefulefu lea tagata soli mea pa‘ia ma ‘ia tuleia i lona oti e i latou uma.
7 O le ala lea na o‘o atu ai le oti i le tagata ‘ua na soli le tulafono ma ‘ua lē tanumia ai o Menelao i le ‘ele‘ele.
8 ‘Ua matuā tatau fo‘i lea: auā e tele ana agasala na ia faia i le fatafaitaulaga o le Atua ‘ua pa‘ia lona afi mōna lefulefu; o lea ‘ua nofosala ai o ia i le oti i le lefulefu.
9 A o le tupu ia ‘ua sau lava ma le ita fa‘avalea o lona loto, ‘ua fia fa‘aali atu i tagata Iutaia le sauā e sili i lo lona tamā.
10 ‘Ua iloa mea ia e Iuta, ‘ona ia poloa‘i atu lea i le nu‘u, ‘ia latou saga vala‘au atu, i le ao ma le po, i le suafa o le Ali‘i, ‘ina ‘ia fesoasoani mai o ia ‘iā te i latou i aso nei, e pei lava ‘ona ia faia pea i aso ‘ua mavae atu.
11 Auā sa fefefe ne‘i ‘ave‘esea ‘iā te i latou le tulafono ma le nu‘u moni ma le malumalu pa‘ia; ‘ia ‘aua ne‘i tu‘uina e ia lona nu‘u, ‘ua fa‘ato‘ā maua nei sina mapusaga, e toe fa‘apologaina i mālō o tagata ia ‘ua fāifai i le Atua.
12 ‘Ua fa‘apea lava ‘ona faia fa‘atasi uma ma ‘ua latou tagi atu i le agaalofa o le Ali‘i ma le fētāgisi ma le anapopogi, o punonou to‘ele i aso fa‘asoso‘o e tolu; ‘ona apoapoa‘i atu lea o Iuta ‘iā te i latou ‘ia latou nofo sauniuni.
13 A ‘ua manatu lava ia, fa‘atasi ma le ‘au toeaina, ‘ia alu ‘ese o ia a o le‘i taunu‘u mai i Iuta le itūtau‘a a le tupu ma maua le ‘a‘ai, a ‘ia tu‘u atu lava le fa‘ai‘uga o le mea i le fa‘amasinoga a le Ali‘i.
14 O lea ‘ua na lafoa‘i atu i le Atua, le Tupu‘aga o le lalolagi, le tausiga o mea uma ma ‘ua ia tomatau i ona tagata ‘ia latou tau le tau‘a ma le loto tele ma ‘ia latou fa‘amaoni e o‘o i le oti i le tulafono ma le malumalu ma le ‘a‘ai ma le nu‘u moni; ‘ona ia fa‘apotopotoina lea lana itūtau‘a i Motei.
15 ‘Ua tu‘u atu ‘iā te i latou le ‘alagātau: “O le manumālō mai le Atua”; ‘ona ia filifili ai lea o taulele‘a ‘ua sili le loto tele ma ‘ua oso i le po i le fale ‘ie o le tupu ma ‘ua na fasia i le togālauapi o fitafita e fa afe, ‘atoa fo‘i ma le elefane aupito maualuga ma fitafita sa ti‘eti‘e i ai;
16 ma ‘ua latou fa‘atumuina le togālauapi o le fili i le mata‘u tele lava ma le atuatuvale; ‘ua i‘u manuia la latou taumafai, ‘ona latou ō ai lea.
17 A ‘ua faia mea ia i le tafa mai o ata, ‘ona o le fa‘amalumalu ifo ‘iā Iuta le fesoasoani mai a le Ali‘i.
18 A ‘ua tofotofo e le tupu le loto tele o tagata Iutaia, ‘ona ia taumafai ai lea i ni togafiti ‘ina ‘ia maua ai o ‘olo.
19 Ma ‘ua ia tolauapi i luma o Petesura, o le ‘olo malosi lea o tagata Iutaia; a ‘ua lafoia lana ‘au, ‘ua faia‘ina, ‘ua taufa‘aumatia.
20 ‘Ae sa ‘auina atu e Iuta ‘iā te i latou ‘ua i le ‘olo o mea uma e tusa ai.
21 A ‘ua fa‘aalia i le fili o ala lilo o le ‘olo e Rotoku, o le tasi o le ‘au o tagata Iutaia, ‘ona su‘esu‘eina ai lea o ia ma ‘ua pu‘eina ma tu‘uina i le fale puipui.
22 ‘Ona toe talatala ai lea o le tupu ma tagata ‘ua i Petesura; ‘ua tu‘u atu ‘iā te i latou lona lima taumatau, ‘ua latou talia, ‘ona alu lea o ia.
23 ‘Ua ia tau le tau‘a ma Iuta ma ‘ua faia‘ina lava ia. A ‘ua logo ‘iā te ia ‘ua fouvale Filipo, lē na ia tu‘uina e pule i le mālō i Anetioka, ‘ona atuatuvale ai lea o lona loto, ‘ua ia fa‘amolemole atu i tagata Iutaia, ‘ua ifo ‘iā te i latou ma ‘ua tautō i mea uma ‘ua mata e tatau ai; ‘ua uma lenā fa‘alelei, ‘ona momoli lea e ia le taulaga, ‘ua ia fa‘aaloalo fo‘i i le malumalu ma momoli i ai ana mea alofa.
24 ‘Ua la feasogi ma Makapaio ma ‘ua na tofia o ia e fai ma ta‘ita‘i ma pule e pau mai i Tulomai, pau mai i le nu‘u o tagata Kira.
25 A ‘ua o‘o atu i Tulomai, ‘ona ita ai lea o tagata Tulomai i le feagaiga o le fa‘auō ma Iuta ma ‘ua tigā ai o latou loto ma le manatu o le a leaga ai la latou fa‘afeagai.
26 ‘Ona a‘e lea o Lusia i le tulagalauga ma ‘ua fa‘amatala ai o ala tatau o le feagaiga ma ‘ua na fa‘afilemū le nu‘u, ‘ona fo‘i atu lea o ia i Anetioka; e fa‘apenā lava ‘ona alu le tupu ma toe fo‘i atu i lona nu‘u.