1 O ona aso fo‘i ia na sauniuni ai e Atioko lona lua o oso i le mālō o Aikupito.
2 ‘Ona o‘o ai lea ‘ina iloa i le ‘a‘ai ‘atoa o Ierusalema, i aso e fagafulu, o ni tagata ‘ua ti‘eti‘e i solofanua o taufetuli i le vateatea, o ‘o‘ofu i ‘ofu auro, o i ai fo‘i o latou tao, e pei ‘ona masani ai o tagata tau;
3 ma vaega ‘au ti‘eti‘e i solofanua ‘ua fa‘afoleni ma feosofi i le tau‘a ma fa‘afetaia‘i; o talitā ‘ua luelueina ma le motu o tagata ‘ua i ai pulou tau, ma ‘ua u‘u a latou pelu; o ū fo‘i ‘ua fanaina ma le pupula o le ‘au‘upega auro ma ‘ofu tau itū‘āiga ‘ese‘ese.
4 O le mea lea sa tatalo ai tagata uma ‘ina ‘ia tua mai i se manuia o fa‘ailoga lava ia.
5 A ‘ua salalau le tala sesē, e fa‘apea ‘ua oti o Atioko, ‘ona fa‘apotopoto lea e Iasona o fitafita e itiiti le to‘aafe, ‘ona oso ai lea fa‘afuase‘i i le ‘a‘ai; ‘ua taufetuli o tagata o le ‘a‘ai i le pavali, a ‘ua i‘u ‘ina maua le ‘a‘ai, ‘ona sola ai lea o Menelao i le ‘olo.
6 A ‘ua lē poipoi a Iasona ia, ‘ua so‘ona fasia ona uso Iutaia; ‘ua lē matau e ia o le manumālō i ona lava ‘āiga, o le to‘ilalo aupito leaga lava lea; ‘ae fā te ia o le fili ‘ua na fasia, ‘ae lē o ona uso.
7 ‘Ua lē maua lava e ia le tofiga sili, ‘ae peita‘i ‘ua ‘avea le māsiasi ma fa‘ai‘uga o ana togafiti leaga ma ‘ua toe sola atu fo‘i o ia i le nu‘u o tagata Amoni.
8 Mulimuli ane, ‘ua i‘u ‘ina tuliloaina e Areta, le tupu o tagata Arapi, ‘ua sola i lea ‘a‘ai ma lea ‘a‘ai, o ‘inosia e tagata uma e tusa i le solitulafono ma le amio leaga, o le fili o lona nu‘u mōna uso, ‘ua tulia lava ia i Aikupito.
9 O ia sa na fa‘aaunu‘ua o ni isi e to‘atele, ‘ua oti lava ia i le fanua ‘ese; auā ‘ua alu atu ia i Laketaimoni e sā‘ili ai se sulufa‘iga ‘ona o le ‘upu ‘āiga.
10 O ia sa na lafoa‘iina nisi e to‘atele ma le lē tanumia, ‘ua lafoa‘iina fo‘i o ia, ‘ua lē tagisia ma ‘ua lē tanumia; ‘ua lē teuina o ia i le nu‘u ‘ese, ‘ua lē fai fo‘i sona tu‘ugamau i le nu‘u moni.
11 ‘Ua mavae atu mea ia, ‘ona māsalosalo ai lea le tupu o le a soli e tagata Iutaia la latou feagaiga, o le mea lea na ia sau ai mai Aikupito ma le ita matuā tele ma ‘ua na pu‘e fa‘amalosi le ‘a‘ai.
12 Ma ‘ua poloa‘i atu i ana fitafita ‘ia latou fasiotia, ma le lē poipoi, o lē latou te maua, ‘ia fasia fo‘i i latou e fe‘ā‘ei i luga o latou fale.
13 E fa‘apea ‘ona fasia o taulele‘a ma toeaina, fasiotia o fafine ma tamaiti, tuia i le pelu o teine ma tama meamea.
14 O aso ia e tolu na fa‘aumatia ai o tagata e valu sefulu afe, ‘ae fa‘apologaina le fasefulu afe ma fa‘atauina fo‘i le fasefulu afe, pe itiiti lea.
15 A ‘ua lē lava fo‘i lea, ‘ua lē fefe o ia ‘ona ulu i le malumalu aupito pa‘ia o le lalolagi uma, o ta‘ita‘iina ia e Menelao, o lē na ‘avea ma fa‘alata i le tulafono ‘atoa ma lona lava nu‘u.
16 ‘Ua na tago i ona lima agasala i ipu pa‘ia sa tu‘uina ai e nisi tupu ma nisi ‘a‘ai e fai ma teuga ma mamalu o lenā afio‘aga; ma ‘ua so‘ona loto leaga i ai ma fa‘a‘ele‘elea.
17 ‘Ua lē manatu o Atioko, i le fa‘avalea o lona mafaufau, o le to‘asā lava o le Ali‘i mo ni nai aso, ‘ona o agasala a tagata o le ‘a‘ai, na ala ai ‘ona o‘o mai le fa‘aleaga i le malumalu.
18 ‘Ana lē seanoa o lea mea, ‘ana lē nofosala i latou i ni soligātulafono e tele, po ‘ua sasaina fo‘i o ia i lona fa‘ato‘ā taunu‘u mai, ‘ia lē mafai ai ‘iā te ia ‘ona fa‘ataunu‘u lona manatu fa‘amaualuga, e pei o Heliotoro, o lē na ‘auina mai e le tupu o Seluko na te vetea le potu e teu ai tupe.
19 ‘Ae peita‘i, e le‘i filifilia le nu‘u e le Atua ‘ona o le malumalu, ‘ae na ia filifilia le malumalu ‘ona o le nu‘u.
20 O le mea fo‘i lea na lavea ai le malumalu i mala ‘ua o‘o i le nu‘u, a o aso o lumana‘i o le a mautufa‘aga fo‘i i lo latou manuia; na tu‘ulafoa‘iina ‘ona o le to‘asā o le Atua e ona le mana uma, ‘ae o le a toe fa‘amamaluina i le mamalu tele pe a toe fa‘alelei le Ali‘i mamana ma lona nu‘u.
21 O lenei, ‘ua ‘avea e Atioko o taleni e afe ma le valu selau nai le malumalu ma ‘ua toe fo‘i atu i Anetioka ma le telelise, i lona manatu fa‘asausili ma le fa‘afefeteina o lona loto, na te mafaia lava ‘ona fa‘afolau ona va‘a i le ‘ele‘ele matūtū ma fa‘asavali ana ‘au i le fogātai.
22 A ‘ua na tu‘uina ona tagata tofia latou te fa‘asauā i le nu‘u; o Ierusalema ‘ua tofia i ai Filipo, le tagata Foinie, ‘ua sili lona sauā i lo lē ‘ua na tofia o ia.
23 A o Keresema ‘ua tofia i ai o Aneroniko ma Menelao, sa silimusa lo la fia fa‘atigā i o lā‘ua lava uso.
24 ‘Ona o le ‘ino‘ino fo‘i o Atioko i tagata Iutaia, ‘ua ‘auina ai e ia le ta‘ita‘i ‘au sauā o Apoloni ma le itūtau‘a, o tagata e luasefulu ma le lua afe, o poloa‘i atu ‘iā te ia ‘ia fasiotia o tagata malolosi uma lava, ‘ae fa‘atau fa‘apologa o fafine ma tamaiti.
25 Na sau o ia i Ierusalema, o fa‘atagā filemū lava ia ma ‘ua nofonofo ai se‘ia o‘o i le aso pa‘ia o le sapati; a ‘ua sagai o Iutaia i sauniga pa‘ia, ‘ona ia poloa‘i atu lea i ana ‘au ‘ia tago i o latou ‘au‘upega.
26 ‘Ua na fasiotia i latou uma na potopoto mo le sauniga; ‘ona fealua‘i lea i le ‘a‘ai mana fitafita, ‘ua latou fafasi ai le motu o tagata e to‘atele lava.
27 A o Iuta Makapaio ma ni isi e to‘aiva, na sōsōla i le nu‘u tu‘ufua; sa nofo ai mōna tagata i le mauga fa‘atasi ma manu fe‘ai; sa latou mau ai, o ‘a‘ai na o fuāla‘au ‘ina ne‘i leaga fo‘i i latou. #