1 ‘Ua mavae atu o tausaga e tolu, ‘ona logo ai lea ‘iā Iuta ma i latou ‘ua fa‘atasi ma ia, ‘ua ui atu o Temetiu, le atali‘i o Seluko, i le taulaga o Teripoli, fa‘atasi ma le itūtau‘a malosi ma le fuāva‘a ma ‘ua savali atu ai i se tulaga lelei.
2 Ma ‘ua maua e ia le lau‘ele‘ele ma ‘ua manumālō ‘iā Atioko ma lona ta‘ita‘i ‘au o Lusia.
3 A o Alekimo, na mua‘i tofia ma ositaulaga sili, a ‘ua fa‘aleagaina o ia e ia lava ma lona loto i ai, i ona po o le fa‘atasiga ma nu‘u ‘ese, ‘ua manatu ifo ‘ua leai se ala e saogalemū ai o ia pe toe tofia o ia i le fatafaitaulaga,
4 ‘ona alu lea o ia i le tupu o Temetiu, i le tausaga e tasi le selau ma le limagafulu ma le tasi, o momoli atu ‘iā te ia le pale auro ma le laupama, ‘ae maise ma ni nai lauolive sa foliga i lauolive o le malumalu ma ‘ua lē fai e ia sana ‘upu i lenā lava aso.
5 A ‘ua maua e ia le ala e tusa i lona fa‘avalea, ‘ina ‘ua vala‘auina o ia e Temetiu i lana ‘aufono ma ‘ua fesiligia ai o ia po o a ni manatu ma ni fa‘amoemoe sa lagolago i ai tagata Iutaia.
6 ‘Ua tali e ia:“O tagata Iutaia ia ‘ua ta‘ua o Hasitaio, ‘ua ta‘ita‘iina e Iuta Makapaio, ‘ua latou fa‘atupu tau‘a ma fa‘aoso tagata i le fouvale ma ‘ua latou fa‘alavelave pea i le filemū o le mālō.
7 ‘Ua ‘ave‘esea fo‘i ‘iā te a‘u nei le tulaga mamalu o o‘u tua‘ā, o le tofiga lea o ositaulaga sili, o lea ‘ua ‘ou sau ai ‘i‘inei,
8 ‘ona o lo‘u fia fa‘amaoni pea lava i mea e aogā mo le tupu, ‘ona o lo‘u fia aogā fo‘i i tagata o lo‘u nu‘u; auā o le osovale o tagata ia e matuā tigā tele ai lo matou nu‘u ‘atoa.
9 ‘Ae ‘ou te ole atu ‘iā te oe, le tupu e, ‘ia e su‘esu‘e i mea uma ia, ‘ona e tagolima lea i le fa‘aolataga o lo matou lau‘ele‘ele ma lo matou nu‘u, e tusa ma lou agalelei o lo‘o lauiloa e tagata uma.
10 Auā, a o ola pea o Iuta, o le a lē mafai lava ‘ona maua se lelei i mea tau le mālō.”
11 ‘Ua uma ana ‘upu ia, ‘ona fa‘aoso fo‘i lea o Temetiu e ana uō uma sa latou ‘ino‘ino ‘iā Iuta.
12 ‘Ona ia ‘auina atu loa lea o Nikanora, sa pule i le vaega ‘au o elefane, na te ta‘ita‘i le ‘au i Iuta,
13 ma le poloa‘iga ‘ia pu‘eina o Iuta lava ia ma fa‘ata‘ape‘ape i latou sa fa‘atasi ma ia, a ‘ia tofia o Alekimo ma ositaulaga sili o le malumalu e sili lona pa‘ia.
14 ‘Ona fa‘apotopoto fa‘atasi ai lea ma Nikanora o tagata nu‘u ‘ese na sōsōla i latou nai Iuta i luma o Iuta, o manatu ifo i latou o puapuagā ma tigāina o tagata Iutaia o le a ‘avea ma fa‘amanuiaga ‘iā te i latou lava.
15 A ‘ua logo i tagata Iutaia le sau a Nikanora ma le fa‘apotopotoina o nu‘u ‘ese, ‘ona latou lu‘ulu‘u lea le efuefu i o latou ulu ma tagi atu i lē ‘ua na tofia i latou mōna nu‘u ma ‘ua na puipui i lona tofi i ni fa‘ailoga ofoofogia, ‘ina ‘ia tausi lava i ai e o‘o i le fa‘avavau.
16 ‘Ua poloa‘i atu ai lo latou ta‘ita‘i, ‘ona latou ō atu loa lea nai lenā mea ma ‘ua latou fetaia‘i ma le fili i le ‘a‘ai o Tesau.
17 A o Simona, le uso o Iuta, sa tau le tau‘a ma Nikanora, a ‘ua fa‘ate‘ia i le oso fa‘afuase‘i mai o le fili.
18 A ‘ua logo ‘ia Nikanora le malosi o soa o Iuta, ma lo latou loto tele i le tau le tau‘a mo lo latou nu‘u moni, ‘ona fefe ai lea o ia ona fa‘ai‘u le mea i le masa‘a o le toto.
19 O le mea lea ‘ua na ‘auina atu ai o Positoniu ma Teototu ma Matia latou te feu‘ua‘i lima ma tagata Iutaia.
20 ‘Ua fa‘aloaloa la latou felafolafoa‘i i matā‘upu o le fa‘alelei, ‘ona talatala ai lea o le ta‘ita‘i ‘au ma le itūtau‘a, ‘ona lotogatasitasi uma lea ‘ia talia le feagaiga o le fa‘auō.
21 O le mea lea ‘ua tu‘upoina ai se aso la te faia ai se talatalaga na o lā‘ua; ‘ua ‘aumaia ni nofoa ma ‘ua tu‘uina ai mo i lā‘ua.
22 A ‘ua poloa‘i e Iuta ‘ia tu‘uina o fitafita ma o latou ‘au‘upega i ni tulaga lelei, ‘ina ne‘i fa‘atupuina fa‘afuase‘i se fa‘alavelave e le fili; ‘ona latou talatala fa‘alelei ai lea.
23 A ‘ua nofo pea o Nikanora i Ierusalema ma ‘ua leai sana mea leaga ‘ua fai ai ma ‘ua ia fa‘ata‘ape‘ape o le vao tagata ‘ese sa fa‘apotopotoina ai.
24 Sa la fa‘auō pea lava ma Iuta, auā sa mutimuti alofa ‘iā te ia lona loto.
25 Ma ‘ua u‘una‘i atu ‘iā te ia ‘ia fa‘aipoipo lava ia ma ‘ia fai lana fānau. ‘Ua fa‘aipoipo Iuta, ‘ua nofo ma le filemū, ‘ua latou manuia fa‘atasi.
26 A ‘ua iloa e Alekimo lo la fealofani ma le feagaiga ‘ua faia, ‘ona alu atu lea o ia ‘iā Temetiu, ma ‘ua ta‘u atu ‘iā te ia ‘ua ‘auai Nikanora i mea a le fili ma ‘ua na tofia e fai mōna sui o Iuta, le tagata ‘ua loto leaga i le mālō.
27 O le mea lea na ita tele ai le tupu ma ‘ua tigā lona loto ‘ona o tu‘ua‘ipepelo matuā leaga a lea tagata, ‘ona tusi atu lea ‘iā Nikanora, o fai atu ‘ua tigā lona loto i le feagaiga o le fa‘auō ma poloa‘i atu ‘ia saisaitia o Iuta ma ‘auina mai loa i Anetioka.
28 ‘Ua iloa lea mea e Nikanora, ‘ona fa‘anoanoa ai lea ma ‘ua lē malie lava lona loto i le fa‘aleagaina le feagaiga na osia, ‘ae leai lava se mea leaga e tasi na fai e Iuta.
29 ‘Ae ui i lea, ‘ua lē mafai lava ‘iā te ia ‘ona tete‘e atu i le tupu ma ‘ua lamalama o ia i se itū aso e faigofie ai ‘ona fa‘ataunu‘u le poloa‘iga.
30 A o Makapaio, ‘ua iloa ‘ua fa‘afaigatā o Nikanora ‘iā te ia ma ‘ua mata sauā o ia ‘iā la feiloa‘iga ‘ua masani ai, ‘ua lagona ifo e ia e lē tua mai i se lelei o lenā fa‘afaigatā, ‘ona ia fa‘apotopotoina lea ni isi o ona tagata ma ‘ua ia lafi ‘iā Nikanora.
31 ‘Ua iloa e Nikanora e lē taulau lona manatu ‘ona ‘ua lave malosi i ai o Iuta, ‘ona alu atu lea i le malumalu e sili lona mamalu ma lona pa‘ia, i le itūlā sa momoli ai o taulaga e le ‘au ositaulaga, e tusa ma le masani ma ‘ua poloa‘i atu ‘ia latou tu‘u mai o Iuta ‘iā te ia.
32 A ‘ua latou ta‘u atu ma le tautō latou te lē iloa le mea e i ai lea tagata sa ia sā‘ili i ai, ‘ona ia si‘i ai lea o lona lima i le malumalu,
33 ma ‘ua ia tautō, o fai atu, “‘Āfai ‘ua ‘outou le tu‘u mai ‘iā te a‘u Iuta o noanoatia, ‘ona ‘ou fa‘alaugatasi lea ma le lau‘ele‘ele o lenei malumalu o le Atua, ‘ou te lepetia le fatafaitaulaga ‘ae fa‘asā lenei malumalu i le tupua o Taionuso.”
34 ‘Ua uma ana ‘upu ia, ‘ona alu ai lea. A ‘ua fa‘aloaloa o latou lima i le lagi e le ‘au ositaulaga ma ‘ua latou vala‘au i lē na ‘avea pea ma puipui o lo latou nu‘u, o fai ane,
35 “O oe le Ali‘i e pule i mea uma, ‘ua leai se mea e tasi e lē o ‘iā te oe, na e fa‘atūina i totonu o i matou le malumalu o lou afio‘aga;
36 a o lenei, le Pa‘ia e o pa‘ia, le Ali‘i o mea uma lava, ‘ia e tausi mamā e o‘o i le fa‘avavau o lou afio‘aga lenei na se‘i fa‘amamāina.”
37 A ‘ua tu‘ua‘ipepeloina e ni isi i luma o Nikanora o Rasi, o le tasi o le ‘au toeaina o Ierusalema, o le tagata matuā ta‘uleleia, sa alofa fa‘amaoni i lona nu‘u, sa ta‘ua o ia o le tamā o tagata Iutaia ‘ona o lona agaalofa.
38 Na tāofia e ia i tausaga e tele lona loto mau i le ‘alo ‘ese ma tagata fa‘apaupau ma le fa‘amaoni i tu fa‘a-Iutaia, sa nofo sauni e mautū pea i ai ma le foa‘iina atu ai o lona tino ma lona ola.
39 ‘Ua fia fa‘aali e Nikanora lona ‘ino‘ino i tagata Iutaia, ‘ona ‘auina atu ai lea o fitafita e lima selau latou te pupu‘e ‘iā te ia.
40 Auā sa fa‘apea ifo a ia, a mafai ‘ona mailei i lea tagata, ‘ona matuā faia‘ina ai lea o tagata Iutaia.
41 A ‘ua feosofi lenā ‘au i lona fale, ‘ua latou fa‘asaga e lepeti le faitoto‘a ma susunu, ‘ua lata ‘ona pu‘eolaina o ia, ‘ona tui lea o ia ‘iā te ia i lana lava pelu,
42 ‘ona ‘ua fa‘asili e ia le oti fa‘amamalu i le fa‘apologaina o ia i tagata agasala ma le tali o tauemuga e lē tusa ma le mamalu o lona tupu‘aga.
43 A o lona fa‘atopetope na ala ai ‘ona fa‘alētonu le tu‘i i lona tino; ‘ua feosofi mai o le ‘au i le ala o faitoto‘a, ‘ona ia momo‘e lea ma le loto malosi i luga o le pavali ma ‘ua titō ifo ma le loto tele i luga o le ‘au;
44 a ‘ua latou sōsō ‘ese fa‘avave mai le mea a pa‘ū ai o ia, ‘ona ia pa‘ū tonu ai lea i lea tulaga ‘ua tu‘ufua.
45 A ‘ua mānava pea o ia, ‘ona fa‘aosofia lea o ia i lona loto tele ma ‘ua ia tu i luga; ‘ua tafetotoi o ia, ‘ua manu‘a i manu‘aga tetele, a ‘ua tamo‘e lava ia i totonu o le motu o tagata,
46 ma ‘ua a‘e o ia i luga o le tasi papa mato; ‘ua lē o totoe sona toto, a ‘ua tago o ia i ona lava ga‘au, i ona lima e lua ma ‘ua togi atu i luga o le motu o tagata, o tatalo atu ai i lē ‘ua pule i le ola ma le agaga: ‘ina ‘ia toe fa‘afo‘i mai ‘iā te ia o mea ia i se aso; ‘ua fa‘apea lava ‘ona te‘a o ia ma lenei olaga. #