1 A o Simona, lē ‘ua mua‘i ta‘ua, o le fa‘alata o lona nu‘u ma tupe o le malumalu, sa na fai tala leaga e uiga ‘iā Onia, e peiseaī lava o ia ‘ua na fa‘aoso ‘iā Heliotoro i lenā mea ma ‘ua na fa‘atupu o mea leaga;
2 ‘ua ia lē fefe ‘ona fa‘aigoa ‘iā fa‘alata i le mālō lē ‘ua ‘avea ma malu o le ‘a‘ai ma puipui o lona nu‘u, o le tagata filigā i le tulafono a le Atua.
3 A ‘ua fa‘apea ‘ona tele le feitaga‘i, ‘ua o‘o ‘ina fasiotia ai ni isi e uō a Simona.
4 ‘Ona mafaufau lea o Onia i le leaga ‘ua mata e tupu i nei māseiga ma le fa‘avalea o Apoloni, le ta‘ita‘i o Koile-Suria ma Foinie, sa fa‘ateleina a‘i le loto leaga o Simona, ‘ona ia alu atu lea i le tupu.
5 E lē o le fia momoli ona uso Iutaia, ‘ae ‘ona ‘ua manatu i lona loto i le mea e aogā tasi mo le nu‘u ‘ato‘atoa.
6 Auā sa na iloa e fa‘ato‘ā mafai lava se toe fa‘aleleia o ia mea, pe ‘āfai ‘ua fa‘atonutonuina e le tupu; e fa‘ato‘ā mafai ai fo‘i ‘ona tu‘u e Simona lona fa‘avalea.
7 A ‘ua mavae Seluko ma le olaga nei, ‘ua maua le mālō e Atioko Epifano, ‘ona faitogafiti ai lea o Iasona, le uso o Onia, i le fia maua le tofiga o ositaulaga sili;
8 na alu atu i le tupu, o folafola atu ‘iā te ia o taleni ario e tolu selau ma le onogafulu ma taleni e valugafulu e maua i ni isi alātupe;
9 ‘ua fa‘aopoopo i ai ma le folafolaga o nisi taleni e selau ma le limagafulu, pe ‘āfai e tu‘u mai i lana pule le fa‘atūina o lona fale e fai ai ta‘aloga ma se fale mo taulele‘a; ma ‘ia tusia fo‘i i tagata Anetioka o i latou ‘ua i Ierusalema.
10 ‘Ua fa‘ataga e le tupu lea mea ma ‘ua maua e ia le tofiga sili; ‘ona amata loa lea ‘ona ia tōsina ona uso Isaraelu i masani fa‘anu‘u ‘ese.
11 ‘Ua sōloia e ia o tulafono na tu‘uina mai e tupu, i lo latou agaalofa i tagata Iutaia, ‘iā Ioane, le tamā o Eupolemo, lē na fai ma savali i le fa‘auō ma le feso‘ota‘iga ma tagata Roma; ‘ua na tineia o le tulaga o tagata ‘ua tusa ma le tulafono ma ‘ua na fa‘atūina o masaniga leaga.
12 Auā e le‘i fefe lava ia ‘ona atia‘e, i lalo tonu o le ‘olo, o se fale e fai ai ta‘aloga a tama talavou ma ta‘ita‘i atu o taulele‘a Iutaia e aupito lelei i fale leaga.
13 E lē o le amataga lea, a o le fa‘atuputeleina lava o masaniga fa‘anu‘u ‘ese ma le fa‘afeagai fa‘atagata ‘ese, ‘ua ala mai i le agasala leaga lava, ma le fou i taliga a Iasona le amio leaga, ‘ae lē se ositaulaga o ia.
14 ‘Ua o‘o lava ‘ina lē toe to‘aga o ositaulaga i le ‘au‘aunaga i le fatafaitaulaga, a ‘ua latou tauemu i le malumalu, tu‘ulafoa‘i i taulaga, ‘ae taufetuli i latou i le fia ‘auai i ta‘aloga a taulele‘a mōna taui ‘ua fa‘atatau i ai, ‘atoa ma le togi o le lafo u‘amea.
15 Sa latou ta‘ufa‘atauva‘a fo‘i i fa‘ailoga mamalu a lo latou nu‘u, ‘ae sa latou matuā ta‘uleleia o fa‘ailoga e maua mai i tagata Eleni.
16 O le mea lava lea na o‘otia ai i latou i puapuagā; sa latou fa‘ata‘ita‘i i masaniga a tagata Eleni, sa naunau ‘ia fa‘atusaina ‘iā te i latou i mea uma, a ‘ua ‘avea ia lava tagata ma o latou fili na fasiotia ai i latou.
17 Auā e lē aunoa ma se sala le soli leaga o poloa‘iga a le Atua; ‘ae o le a aliali tino lea mea i aso amulī.
18 O aso ia na faia ai i Turo faigāmea sa fai i tausaga e ta‘ilima ma ‘ua i ai ma le tupu,
19 ‘ua ‘auina atu e Iasona, le tagata amio leaga, ni isi tagata solitulafono mai Ierusalema e momoli ai o tupe ario e tolu selau e fai ai taulaga ‘iā Herakelu; a ‘ua fa‘atonuina e i latou na momoli le tupe, ‘ia ‘aua le fa‘aaogāina i ni taulaga, auā e lē tatau lava lea, a ‘ia fa‘aalu i le fa‘atau o nisi mea aogā.
20 A ‘ua loto lava o lē ‘ua na avatu tupe ‘ia faitaulaga a‘i ‘iā Herakelu; a o ē na momoli o tupe, ‘ua latou tu‘uina ‘ia fau ai ni va‘a e ta‘itolu fogāva‘a.
21 A ‘ua ‘auina atu i Aikupito o Apoloni, le atali‘i o Moneseu, ‘ona o failautusi sili a le tupu o Tulomaio Filometo ma ‘ua iloa ai e Atioko ‘ua fa‘ate‘a‘eseina o ia i mea tau le mālō, ‘ona manatu lea i mea e saogalemū ai o ia; ‘ua tula‘i o ia ma alu i Iopa, ‘ona sau ai lea i Ierusalema.
22 Ma ‘ua talia fa‘amamalu e Iasona ma le ‘a‘ai, ‘ua ulu atu ai i le malamalama o sulu ma le ‘alaga fiafia o le nu‘u; ‘ona sagai atu lea ma lana itūtau‘a i Foinie.
23 Ma ‘ua mavae atu o tausaga e tolu, ‘ona ‘auina atu lea e Iasona o Menelao, le uso o Simona na se‘i ta‘ua nei, e momoli atu o tupe i le tupu ma ‘aumai ai lana tali i ni isi matā‘upu faigatā.
24 A o Menelao ‘ua fa‘afialelei i le tupu, o vivi‘i atu i le mamalu o lana pulega ma ‘ua maua mai ai mo ia lava le tofiga o ositaulaga sili, ‘ona ‘ua fa‘aopoopo e ia le tolu selau taleni ario i tupe a Iasona.
25 Ma ‘ua maua tusi tofiga a le tupu, ‘ona fo‘i mai lea o ia, e lē o ‘iā te ia se itū e tasi e tusa ma le ositaulaga, ‘ua na o manatu o le pule fa‘asauā ma le ita fa‘amanu fe‘ai.
26 A o Iasona ia, na maileia e ia lona lava uso, ‘ua ‘ole‘olegia fo‘i o ia, ‘ua fa‘aaunu‘ua ma ‘ua sola o ia i le fanua o tagata Amoni.
27 A o Menelao, ‘ua ia maua lava le tofiga sili; a ‘ua lē fa‘ataunu‘u atu i le tupu o tupe sa folafolaina i ai, e ui ‘ina u‘una‘i pea ‘iā te ia e Soterato, sa pule o ia i le ‘olo,
28 auā o ia lea sa tofia e ao lafoga; o le mea lea na ‘a‘amia ai i lā‘ua e le tupu.
29 Ma ‘ua fa‘ate‘a‘eseina o Menelao i le tofiga o ositaulaga, o soloa‘i ane i ai lona uso o Lusimako; a ‘ua ‘avea Soterato ma kovana o tagata Kuperu.
30 O aso lava ia na fouvale ai tagata Taso ma tagata Malota ‘ona ‘ua ‘avea o ‘a‘ai ia e lua ma mea alofa ‘iā Atioki, le tasi avā a le tupu.
31 O lea ‘ua alu fa‘ata‘alise ai le tupu e fa‘afilemū ai i latou ma ‘ua fa‘amuli o Aneroniko, le tasi o ona tagata tofia, e fai mōna sui.
32 ‘Ona manatu lea o Menelao ‘ua o‘o i ona aso e taugalemū ai ma ‘ua gaoi e ia nisi ipu auro o le malumalu ma ‘ua foa‘i atu ‘iā Aneroniko, a ‘ua fa‘atau atu fo‘i nisi i Turo ma ‘a‘ai vagavagai.
33 ‘Ua matuā iloatino e Onia lenā mea, ‘ona a‘oa‘i atu lea ‘iā te ia, a o nofo Onia i le ‘a‘ai o le sulufa‘iga o Tafenē e lata ane i Anetioka.
34 O le mea lea na alu atu ai Menelao ‘iā Aneroniko, o tagi atu i ai ‘ia fasiotia o Onia. Na alu Aneroniko ‘iā Onia ma ‘ua tu‘u atu i ai lona lima taumatau ma le tautoga; e ui fo‘i ‘ina māsalosalo Onia, a ‘ua ‘ole‘olegia o ia ‘ina ‘ia alu ‘ese ai i le ‘a‘ai o le sulufa‘iga, ‘ona fasiotia loa lea o ia e Aneroniko, ‘ua lē mata‘u i le solitulafono.
35 O le mea lea sa ita ai, e lē na o tagata Iutaia, ‘ae fa‘apea fo‘i mai nisi tagata nu‘u ‘ese, sa tigā o latou loto ‘ona ‘ua fasia ma le lē tatau o lea tagata mamalu.
36 ‘Ua toe fo‘i le tupu a‘i le lau‘ele‘ele o Kilikia, ‘ona ō atu lea ‘iā te ia i Anetioka o tagata Iutaia fa‘atasi ma tagata Eleni; o tagi atu ‘iā te ia ‘ona o le fasia o Onia ma le lē tatau.
37 ‘Ua fa‘anoanoa lava le loto o Atioko ‘ona o Onia, ‘ua o‘otia i le mutimuti alofa i ai ma ‘ua liligi ona loimata, o manatu i le fa‘autauta ma le amiotonu o lē ‘ua maliu.
38 ‘Ua tigā lava lona loto ma ‘ua poloa‘i ‘ia ‘ave‘esea le ‘ofu pāuli ‘iā Aneroniko ma ‘ia ta‘ita‘iina o ia i ala uma o le ‘a‘ai, ma ‘ia fasiotia lē na soli mea pa‘ia, i le mea tonu na faia ai e ia lana amio leaga ‘iā Onia; o lana sala tatau lea na ia maua mai i le Ali‘i.
39 ‘Ua solia fo‘i le pa‘ia o le malumalu e Lusimako, ‘ua fa‘aosoina i ai e Menelao; ‘ua salalau lenā tala, ‘ona fou ai lea le motu o tagata ‘ia Lusimako ‘ona ‘ua ‘avea solo e ia ipu auro e tele.
40 ‘Ua vāvāō le motu o tagata, o tumu o latou loto i le ita, ‘ona tufatufa lea e Lusimako le ‘au‘upega i tagata pe ‘atoa le tolu afe, ‘ua ta‘ita‘iina i latou e le tasi tagata sauā, ‘ua tele ona tausaga, tele fo‘i ma lona valea, ‘ona amata ai lea ‘ona fa‘ataugā i le motu o tagata ma le lē tatau lava.
41 A ‘ua latou lagona le fa‘aoso a Lusimako, ‘ona fetāgofi lea ni isi i ma‘a, a o ni isi i to‘oto‘o malolosi; a o nisi ‘ua latou togi atu se lefulefu ‘iā Lusimako.
42 Ma ‘ua manunu‘a nisi e to‘atele o ona tagata, ma ‘ua fasiotia ni isi ma ‘ua tulia uma lava i latou; ‘ua fasiotia fo‘i o ia, o le tagata ‘ua na solia mea pa‘ia, e lata ane i le potu e teu ai tupe o le malumalu.
43 O mea lava ia na amata ‘ona saunia ai le fa‘amasinoga o Menelao.
44 ‘Ua malaga le tupu i Turo, ‘ona ‘auina lea o tagata e to‘atolu e le ‘au toeaina, ‘ua latou fa‘amatala ‘iā te ia la latou tagi.
45 ‘Ua taufaiā‘ina ai o Menelao, ‘ona ia folafola atu lea ni tupe e tele ‘iā Tulomaio pe ‘āfai na te fa‘aliliuina le manatu o le tupu.
46 O le mea lea na ta‘ita‘iina ai le tupu e Tulomaio i le fa‘apaologa, e peiseaī o le a fa‘asavili ai, ‘ona liliu lea e ia le tāofi o le tupu;
47 ‘ua fa‘amāgaloina Menelao, sa nofosala i soligātulafono uma lava ma le loto leaga, a o nai tagata e lē taumate ‘ona ta‘uamiotonuina i latou pe ana fa‘amasinoina e tagata Sekutai, ‘ua na fa‘asalaina i latou i le oti.
48 Ma ‘ua lē pine ‘ona fa‘ao‘o o lenā fa‘asalaga matuā lē tatau lava i tagata na latou tūtūla‘i e puipui i le ‘a‘ai ma le nu‘u ma ipu pa‘ia o le malumalu.
49 O le mea fo‘i lea na tigā ai o loto o tagata Turo ma ‘ua latou falelauasi ‘iā te i latou ma le mamalu tele lava.
50 A o Menelao ‘ua tumau pea ia i lona tofiga sili, ‘ona o le loto manumanu o ē pule i le mālō ma ‘ua saga tupu pea lona loto leaga, ma lona fia faimailei i tagata o lona nu‘u.