1 E maua lava i tusi a le perofeta o Ieremia, na ia poloa‘i ‘iā i latou ‘ua fa‘aaunu‘ua ‘ia latou tago i le afi, e pei ‘ona mua‘i fa‘aalia, e pei fo‘i ‘ona ia poloa‘i atu ai i ē ‘ua fa‘aaunu‘ua.
2 Ma ‘ua tu‘u atu ‘iā te i latou le tulafono, ‘ina ne‘i galo ‘iā i latou poloa‘iga a le Ali‘i, ‘ina ‘ia lē fa‘asesēina fo‘i o latou loto pe a va‘ava‘ai atu i tupua auro ma tupua ario ma o latou teuga;
3 ma ‘ua fai atu ‘iā te i latou ni isi ‘upu fa‘apenā, o apoapoa‘i atu ‘ia ‘aua le ‘ave‘esea le tulafono i o latou loto.
4 O le tusi fo‘i lea ‘ua tusia ai na poloa‘i e le perofeta, e tusa ma le fa‘aaliga na ia maua mai i le Atua, ‘ia la‘uina le fale fetāfa‘i ma le ‘atola‘au o le feagaiga i le mea e alu ai o ia, se‘ia o‘o atu i le mauga na a‘e ai o Mose ma ‘ua na iloa atu ai le tofi o le Atua.
5 Ma ‘ua o‘o Ieremia i lea mea, ‘ua na maua ai le ana i le papa; ma ‘ua tu‘uina i ai le fale fetāfa‘i ma le ‘ato la‘au ma le fatafaitaulaga o le mea manogi ma ‘ua na punitia le gutu o le ana.
6 A o ni isi o ē na mulimuli atu ‘iā te ia, na ō atu fa‘atasi i le fia fa‘ailogaina lea mea, a ‘ua latou le āu maua.
7 A ‘ua iloa e Ieremia, ‘ona ia a‘oa‘i lea ‘iā te i latou, o fai atu: “E lilo lenā mea se‘ia o‘o ‘ina fa‘apotopotoina e le Atua le nu‘u ‘ua ta‘ape‘ape ma fa‘amāgalo ‘iā te i latou.
8 ‘Ona fa‘aalia lea e le Atua o mea ia, e aliali mai ai fo‘i le mamalu o le Ali‘i, e i ai fo‘i le ao e pei ‘ona fa‘aalia ‘iā Mose, e pei fo‘i ‘ona aliali ‘ina ‘ua tagi atu Solomona ‘ia fa‘apa‘iaina le malumalu i le Atua mamalu.”
9 Auā sa ofoofogia le poto o ana fa‘amatalaga; ‘ona ‘ua ‘iā te ia fo‘i le poto, ‘ua na osia le taulaga o le fa‘aulufalega ma le fa‘aumaina o le malumalu.
10 E pei ‘ona tatalo o Mose i le Ali‘i, ‘ona alu ifo ai lea le afi mai le lagi ma ‘ua susunu ai le taulaga mū; e fa‘apea fo‘i ‘ona tatalo o Solomona ma ‘ua alu ifo le afi mai le lagi ma ‘ua susunu ai le taulaga mū.
11 Ma ‘ua fai ane o Mose, “‘Ona ‘ua lē ‘aina le taulaga mo le agasala, o lea ‘ua susunuina ai.”
12 E fa‘apea fo‘i ‘ona fa‘amamaluina e Solomona le fa‘aulufalega i aso e valu.
13 O mea lava ia ‘ua fa‘amaonia i tusiga ma fa‘amatalaga a Neemia; pe fa‘apefea fo‘i ‘ona fa‘atū e ia ni fata tusi ma teu ai o tusi i tupu ma le ‘au perofeta, o tusi fo‘i a Tavita ma tusi a tupu e uiga ‘iā latou mea alofa.
14 E fa‘apea fo‘i o Iuta, ‘ua na tu‘ufa‘atasi o tusi uma sa ta‘ape‘ape ‘ina ‘ua matou tau le tau‘a ma ‘ua i ai lava ‘iā te i matou.
15 ‘Āfai la ‘ua ‘outou manana‘o i ai, ‘ia ‘outou ‘auina mai nisi latou te avatua ‘iā te ‘outou.
16 O le a matou faia le aso o le fa‘amamāga, o lea fo‘i ‘ua matou tusi atu ai; e lelei lava pe a ‘outou faia fo‘i o ia aso.
17 A o le Atua ‘ua na lavea‘iina lona nu‘u ma ‘ua na toe tu‘u mai ‘iā te i matou uma lo matou tofi ma le mālō ma le faiva o ositaulaga ma le mea pa‘ia,
18 e pei ‘ona ia folafolaina i le tulafono; matou te fa‘amoemoe na te vave alofa mai ‘iā te i tatou ma fa‘apotopotoina i tatou mai le lalolagi uma i le mea pa‘ia.
19 Auā ‘ua na lavea‘iina i matou ai puapuagā tetele ma ‘ua na fa‘amamāina le malumalu.
20 A o mea e uiga ‘iā Iuta Makapaio mōna uso, ma le fa‘amamāga o le malumalu pa‘ia ma le fa‘apa‘iaga o le fatafaitaulaga,
21 ‘atoa fo‘i ma tau‘a ‘ua fa‘asaga atu ai ‘iā Atioko le mamalu ma lona atali‘i o Eupato;
22 ma ni fa‘aaliga malamalama mai le lagi ‘iā te i latou sa tau ma le lototele mo tagata Iutaia, na latou toe maua ai le lau‘ele‘ele uma lava, e ui i le to‘aitiiti o i latou ma ‘ua latou tuliloaina ai le vao tagata lautua;
23 ‘ua latou toe maua ai le malumalu aupito tāua i le lalolagi uma ma ‘ua lavea‘iina le ‘a‘ai ma ‘ua toe fa‘atūiina o tulafono sa tau tineia, ‘ona ‘ua alofa mai ‘iā te i latou le Ali‘i i lona matuā agalelei.
24 E fa‘apea fo‘i ma le tusi a Iasona le Kurene, ‘ua talaina ai o mea ia i tusi e lima, ‘ua matou taumafaia e fa‘apu‘upu‘uina i le tusi lava e tasi.
25 Auā ‘ua manatu i le tele o tusi ma le faigatā ‘ua i ai te i latou e fia sā‘ili‘ili i tala o aso ‘ua mavae atu, ‘ona o le tele o mea ‘ua i ai;
26 o lea, ‘ua matou taumafai ‘ia ‘avea ma fa‘afiafiaga i le loto o ē ‘ua fia faitau ai; ‘ia faigofie fo‘i ‘ona tauloto e i latou ‘ua fia a‘oa‘oina ma ‘ia aogā lava ‘iā te i latou uma latou te faitau ai.
27 A o i matou nei ‘ua tago i lenei galuega o le fa‘apu‘upu‘u, ‘ua matou le tago i se fe‘au faigofie, a o le galuega lava e faia i le tele o le afu ma le mataala.
28 E pei o i latou ‘ua sauniuni se faigā‘ai ma ‘ua latou fia fa‘amalie loto o isi tagata ‘ina ‘ia aogā i latou i le to‘atele, e fa‘apea ‘ona matou tago ma le fiafia i le fe‘au,
29 o tu‘u atu i tusitala ta‘ito‘atasi le fa‘amaonia o ana tala ‘ae taumafai e i matou ‘ona fa‘asa‘asa‘aina e tusa ma le faiga e tatau ai.
30 Auā e pei ‘ona tatau i le tufuga ‘ua fai le fale fou, ‘ona ia mata‘u i mea uma e tusa ma le atiina a‘e o le fale, a o lē ‘ua na fia valia, e tatau ‘ona ia sā‘ili i mea e aogā i le teuteuina; e fa‘apea lava le fa‘atatau ‘iā te i matou.
31 Auā, o le aoina o tala, o le teuteuina o fa‘amatalaga, ma le sā‘ili ma le matuā filigā i itū uma o mea ta‘itasi, o le galuega lea e tusa ma lē tusitala;
32 ‘ae tatau ‘ona tu‘u mai i lē na te fa‘apu‘upu‘uina, ‘ia tuliaina pea le fa‘asa‘asa‘a o tala, ‘ia ‘alo ‘ese i fa‘amatalaga felefele i mea ‘ua tutupu.
33 O lea, o le a amata ‘i‘inei la matou tala; ‘ia lava o mea ia e fai ma ‘upu tomua; auā o le fa‘avalea le fa‘afaula‘i o ‘upu a o le‘i faia le tala, ‘ae fa‘asa‘asa‘a le tala lava ia.