28 O i latou fo‘i ‘ua totoe o le nu‘u, o ositaulaga, o sa Levī, o leoleo faitoto‘a, o ē pepese, o ‘au‘auna o le malumalu, ma i latou uma na vavae‘eseina i tagata o nu‘u ‘ese i le tulafono a le Atua, o a latou avā, o latou atali‘i, ma o latou afafine, o i latou uma ‘ua iloa, ma ‘ua lagona;
29 ‘ua latou pipi‘i atu i o latou uso, o latou ali‘i, ma ‘ua latou augani, ma tautō, latou te sāvavali i le tulafono a le Atua, na tu‘uina mai e Mose le ‘au‘auna a le Atua, e tausi fo‘i ma fai i poloa‘iga uma a le ALI‘I lo tatou Ali‘i, ma ana fa‘amasinoga, ma ana sauniga.
30 ‘Ina ‘ia matou le avatu fo‘i o matou afafine i tagata o le nu‘u, ma ‘ia lē fai avā o matou atali‘i i o latou afafine.
31 A ‘aumai fo‘i e tagata o le nu‘u o ‘oloa po o se mea e ‘ai i le aso sapati e fa‘atau ai, matou te lē fa‘atau ma i latou i le sapati, po o se aso pa‘ia; matou te tu‘ua fo‘i le tausaga e fitu, ma le taui fa‘asili uma.
32 Na matou faia fo‘i mo i matou o tulafono e avatu e i matou i lea tausaga ma lea tausaga o lona vaetolugālemū o le sekeli mo le galuega o le fale o lo tatou Atua,
33 ma le areto e laulauina i luma, ma le taulaga i mea e ‘ai e lē aunoa, ma le taulaga mū e lē aunoa, o sapati, o masina fa‘ato‘ā va‘aia, ma tausamiga, ma mea pa‘ia, ma taulaga mo agasala e faia le togiola mo Isaraelu, ma sauniga uma o le fale o lo tatou Atua.
34 Na faia fo‘i e i matou le vili o ositaulaga, ma sa Levī, ma le nu‘u, i taulaga o fafie, a ‘aumai ai i le fale o lo tatou Atua, e āu i ‘āiga o tatou tamā, i aso ‘ua tofia i lea tausaga ma lea tausaga, e mū ai i le fatafaitaulaga o le ALI‘I lo tatou Atua e pei ‘ona tusia i le tulafono;