3 ‘Ona ia faitau ai lea i le malae o i luma o le faitoto‘a o le vai, e āfua i le malama a‘e o le taeao ‘ua o‘o i le aoauli, i luma o tane ma fafine, ma ē atamamai; ‘ua ua‘i mai fo‘i taliga o le nu‘u uma i le tusi o le tulafono.
4 ‘Ua tu fo‘i Esera le tusi‘upu i luga i le tulaga la‘au, na latou fausia i lea lava mea; ‘ua tutū fa‘atasi fo‘i ma ia i lona itū taumatau o Matatia, ma Sema, ma Anaia, ma Uria, ma Hilikia, ma Maaseia; a o i lona itū tauagavale, o Petaia, ma Mesaelu, ma Malekia, ma Hasumu, ma Hasepatana, o Sakaria ma Mesulama.
5 ‘Ona fofola lea e Esera le tusi i luma o le nu‘u uma; (auā sa maualuga o ia i le nu‘u uma;) ‘ua ia fofola ai, ‘ona tutū lea i luga o le nu‘u uma.
6 ‘Ona fa‘afetai atu lea o Esera i le ALI‘I le Atua silisili; ‘ona tali mai lea o le nu‘u uma, “Amene, Amene,” ‘ua sisi‘i i luga o latou lima ma ‘ua latou punonou ma ifo to‘ele i le ALI‘I.
7 O Iosua fo‘i ma Pani, ma Serepeia, o Iaminu, o Akupa, o Sapetai, o Hotia, o Maaseia, o Kelita, o Asaria, o Iosapata, o Hanana, o Pelaia, ma sa Levī, ‘ua latou fa‘amatalaina atu le tulafono i le nu‘u, o lo‘o tutū mai fo‘i le nu‘u.
8 ‘Ua latou faitau māe‘a i le tusi i le tulafono a le Atua, ma ‘ua latou folafola atu le uiga, ma fa‘amatalaina atu ‘iā te i latou le mea ‘ua faitauina.
9 O Neemia, o le ali‘i e pule lea, ma Esera le ositaulaga, le tusi‘upu, ma sa Levī o ē na a‘oa‘o i le nu‘u, ‘ua latou fai atu i le nu‘u uma, “O le aso pa‘ia lenei i le ALI‘I lo ‘outou Atua, ‘aua ne‘i ‘outou fa‘anoanoa, ‘aua fo‘i le fētāgisi.” Auā ‘ua fētāgisi le nu‘u uma, ‘ina ‘ua latou fa‘alogologo i ‘upu o le tulafono.