1 Lepanona e,‘inā tō mai ia ou puipui, e susunuina ai i le afi ou arasi.
2 ‘Inā uiō ia le perosi e,auā ‘ua pa‘ū le arasi,auā ‘ua fanoia la‘au sili.Uiō ia, aluna o Vasana e,auā ‘ua pāū le vao na lē masaofia.
3 O i ai le leo o lē uiō o leoleo mamoe,auā ‘ua fa‘aumatia lo latou matagofie.O i ai le leo o le fētāgisi o leona ta‘anoa,auā ‘ua fa‘aumatia le matagofie o Ioritana.
4 O lo‘o fa‘apea ‘ona fetalai mai o le ALI‘I lo‘u Atua: ‘Ia e leoleo i le lafu mamoe o le a fasia.
5 O ē o latou le lafu, latou te fafasi ‘iā te i latou, ‘ae lē nofo sala ai i latou; o ē fa‘atau fo‘i ‘iā te i latou, ‘ua ta‘itasi o i latou ma fai ane “Fa‘afetai i le ALI‘I, auā ‘ua fa‘atamao‘āigaina a‘u;” o latou leoleo mamoe fo‘i, latou te lē alolofa ‘iā te i latou.
6 Auā ‘ou te lē toe alofa i ē nonofo i le nu‘u na, ‘ua fetalai mai ai le ALI‘I; fa‘auta fo‘i, ‘ou te tu‘uina atu tagata o le tasi i le lima o le tasi ma le lima o lona tupu; latou te tu‘ipalaina le nu‘u, ‘ae ‘ou te lē lavea‘i ‘iā te i latou a‘i o latou lima.
7 ‘Ua ‘ou leoleoina le lafu mamoe o le a fasia, o le lafu mamoe e matuā malaia; ‘ua ‘ou ‘ave fo‘i ma a‘u to‘oto‘o e lua; ‘ua ‘ou fa‘aigoaina le tasi, o Matagofie; a o le tasi ‘ua ‘ou fa‘aigoaina o Noataga; ‘ona ‘ou leoleo ai lea i le lafu mamoe.
8 ‘Ua ‘ou fa‘aumatia leoleo mamoe e to‘atolu i le masina e tasi; ‘ua tigā lo‘u loto ‘iā i latou, ‘ua ‘ino‘ino fo‘i o latou loto ‘iā te a‘u.
9 ‘Ona ‘ou fai atu ai lea, “‘Ou te lē leoleo ‘iā te ‘outou; o lē a mate ‘inā mate ia; o lē a fa‘aumatia, ‘ia fa‘aumatia lava ia, a o ē ‘ua totoe ‘ia ta‘itasi ma ‘ai le tino o le tasi.”
10 ‘Ona ‘ou tago ai lea i lo‘u to‘oto‘o, o Matagofie lea, ma ‘ou gausia; ‘ina ‘ia tatala la‘u feagaiga na matou osia ma nu‘u uma;
11 ‘ona tatalaina ai lea i lea aso; ‘ona iloa lelei ai lea e lafu mamoe malaia, o ē na usiusita‘i mai ‘iā te a‘u, o le afioga lava lea a le ALI‘I.
12 ‘Ona ‘ou fai atu lea ‘iā te i latou, “‘Āfai e lelei ‘iā te ‘outou, ‘aumaia o lo‘u taui; ‘ae ‘āfai e leai, sōia; ‘ona latou fua mai ai lea o lo‘u taui, o tupe e fuatolu.”
13 ‘Ona fetalai mai lea o le ALI‘I ‘iā te a‘u, “‘Inā lafo atu ia i lē fai ipu ‘omea se tau e lelei na‘uā,” ‘ua fa‘atusaina ai a‘u e i latou! ‘Ona ‘ou tago ai lea i tupe e fuatolu ma ‘ou lafoia atu i le fale o le ALI‘I i lē fai ipu ‘omea.
14 ‘Ona ‘ou gausia lea o le tasi ‘ou to‘oto‘o, o Noataga lea, ‘ina ‘ia ‘ou motusia le tau‘usoga o Iuta ma Isaraelu.
15 ‘Ua fetalai mai fo‘i le ALI‘I ‘iā te a‘u: ‘Inā e toe ‘ave ia o mea a le leoleo mamoe valea.
16 Auā fa‘auta, o a‘u ‘ou te fa‘atūina se leoleo mamoe i le nu‘u, na te lē asiasi i ē a fano; na te lē sā‘ilia lē ‘ua sē; na te lē fō‘ia le ‘ua gau; o lē ‘ua tu na te lē fagaina; a o le tino o lē ‘ua peti na te ‘aina lava lea mo latou atigivae na te tafa‘i‘eseina.
17 ‘Oi talofa i le leoleo mamoe le aogā,na te tu‘ua le lafu mamoe.E i ai le pelu i lona lima ‘atoa ma lona mata taumatau.E matuā gase lava lona lima,ma lona mata taumatau e matuā puaoa lava lea.#