1 ‘Ua fo‘i mai le agelu na ma tautala, ‘ua ia fafagu mai ‘iā te a‘u, e pei o le tagata ‘ua fāgua na moe.
2 ‘Ona fai mai lea o ia ‘iā te a‘u,“O le a ‘ea ‘ua e va‘aia?” ‘Ona ‘ou fai atu lea, “‘Ua ‘ou iloa, fa‘auta, o le lamepa ‘ua auro ‘ato‘atoa, ma lona tu‘ugāsuāu‘u i ona luga, mōna tu‘ugālamepa e fitu i ona luga, ma ala e ta‘ifitu i tu‘ugālamepa o lo‘o i ona luga;
3 ma olive e lua i ona tafatafa, o le tasi i le itū taumatau o le tu‘ugāsuāu‘u, ma le tasi i lona itū tauagavale.”
4 ‘Ua ‘ou toe fai atu i le agelu na ma tautala, ‘ua fa‘apea atu, “Le ali‘i e, o a ‘ea ia mea?”
5 ‘Ona tali mai lea o le agelu na ma tautala, ‘ua fa‘apea mai ‘iā te a‘u, “‘E te lē iloa ‘ea po o a mea nei?”‘Ona ‘ou fai atu lea, “Le ali‘i e, ‘ou te lē iloa.”
6 ‘Ua tali mai o ia, ‘ua fai mai ‘iā te a‘u, o lo‘o fa‘apea mai: “O le afioga lenei a le ALI‘I ‘iā Serupapelu, o lo‘o fa‘apea mai: E lē o le fitafita, e lē o le malosi, a o lo‘u Agaga, ‘ua fetalai mai ai le ALI‘I o ‘au.
7 O ai ‘ea oe le mauga tele e, e fa‘alaugatasia oe i luma o Serupapelu; na te ‘aumaia fo‘i le ma‘a tulimanu aupitoaluga, o lo‘o ‘alalaga, ‘Le alofa tunoa e! ia ‘iā te ia le alofa tunoa.’”
8 ‘Ua o‘o mai fo‘i ‘iā te a‘u le afioga a le ALI‘I, o lo‘o fa‘apea mai,
9 “O lima o Serupapelu na fa‘avaeina ai le fale nei o ona lima fo‘i e fa‘auma a‘i, ‘e te iloa ai fo‘i, na ‘auina mai a‘u ‘iā te ‘outou o le ALI‘I o ‘au.
10 Auā po o ai ‘ea ‘ua ‘ino‘ino i le aso o mea iti? Latou te fiafia ‘ina ‘ua latou va‘ai i le fua fa‘atautau i le lima o Serupapelu;“O i latou nei e fitu, o fofoga o le ALI‘I i latou, e fetaufetulia‘i i le lalolagi uma.”
11 ‘Ua ‘ou fai atu fo‘i ‘iā te ia, o lo‘o fa‘apea, “O a ‘ea na olive e lua i le itū taumatau o le lamepa, ma lona itū tauagavale.”
12 ‘Ona ‘ou fai atu fa‘alua lea ‘iā te ia, o lo‘o fa‘apea atu, “O a ‘ea magaolive e lua, o lo‘o liligi nai ‘iā te i lā‘ua lava le u‘u auro i ala auro e lua?”
13 ‘Ona fai mai lea o ia ‘iā te a‘u, o lo‘o fa‘apea mai, “‘E te lē iloa ‘ea po o a ia mea?”‘Ona ‘ou fai atu lea, “Le ali‘i e, ‘ou te lē iloa.”
14 ‘Ona fai mai lea o ia. “O tagata fa‘au‘uina i lā‘ua nei, o lo‘o tutū i luma o le Ali‘i o le lalolagi uma.”