1 ‘Ona ‘ou toe tepa a‘e lea ma ‘ou iloa, fa‘auta, o le tusi tā‘ai ‘ua lele.
2 ‘Ua ia fai mai ‘iā te a‘u, “O le a ‘ea ‘ua e iloa?” ‘Ona ‘ou fai atu lea, “‘Ua ‘ou iloa le tusi tā‘ai ‘ua lele; o lona umi, o kupita e luafulu, o lona lau e sefulu kupita ia.”
3 ‘Ua fai mai o ia ‘iā te a‘u, “O le fa‘afanoga lenei o le a alu atu i le fogā‘ele‘ele uma lava; auā e ta‘itasi uma o ē gaoi ma tafia o ia a‘i lenei mea, e pei o le tusi; e ta‘itasi uma fo‘i o ē tautō ma tafia o ia a‘i le mea nei, e pei o le tusi.
4 ‘Ua fetalai mai le ALI‘I o ‘au: ‘Ou te ‘aumaia; e o‘o atu lava ia i le fale o le gaoi ma le fale o lē ‘ua tautō pepelo i lo‘u igoa; e tumau ai i totonu o lona fale ma fa‘aumatia ai ona la‘au ma ona ma‘a.”
5 ‘Ua alu ane fo‘i le agelu na ma tautala, ‘ua fai mai o ia ‘iā te a‘u, “‘Ia e tepa i luga ma e va‘ai, po o le a lenā o lo‘o alu atu.”
6 ‘Ua ‘ou fai atu, “O le a lenā?”‘Ua fai mai o ia, “O le efa lenā o lo‘o alu atu.” ‘Ua fai mai fo‘i o ia, “O lona tino mai lenā i le nu‘u uma.”
7 Fa‘auta fo‘i, o le taleni o pulu ‘ua si‘itia; o le fafine fo‘i lenei o lo‘o nofo i totonu o le efa.
8 ‘Ua ia fai mai fo‘i, “O le amio leaga lenei.” ‘Ona ia lafotūina lea o ia i totonu o le efa ma na lafo le fua pulu i le gutu o le efa.
9 ‘Ua ‘ou tepa fo‘i i luga, ‘ona ‘ou iloa lea, fa‘auta, o fafine e to‘alua na ō atu; ‘ua i ai fo‘i le matagi i o la ‘apa‘au; auā sa ‘iā te i lā‘ua o ‘apa‘au, pei o ‘apa‘au o le kasita; ‘ua la si‘itia le efa i le vā o le lalolagi ma le lagi.
10 ‘Ona ‘ou fai atu lea i le agelu na ma tautala, “Po o fea la te ‘ave i ai le efa?”
11 ‘Ona fai mai lea o ia ‘iā te a‘u, “O le a ‘ave ‘ina ‘ia fai se fale mōna i le nu‘u o Senara; e fa‘atū ai ma fa‘amau ai i lona lava tā‘ele.”#