1 O le avega o le afioga a le ALI‘I ‘iā Isaraelu; o lo‘o fetalai mai le ALI‘I le ‘ua fa‘amafolafola le lagi, ma fa‘avaeina le lalolagi, na ia faia fo‘i le agaga o le tagata i totonu ‘iā te ia:
2 Fa‘auta, o a‘u lava ‘ou te faia Ierusalema ma ipu e tautevateva ai nu‘u uma o vagavagai; e i ai fo‘i ‘iā Iuta pe a vagaia Ierusalema.
3 O lea aso fo‘i ‘ou te fai ai Ierusalema ma ma‘a mamafa i nu‘u uma; ‘atoa uma o ē si‘i i ai, e matuā manunu‘a ai i latou; a o fa‘apotopotoina nu‘u uma lava o le lalolagi latou te tau.
4 ‘Ua fetalai mai le ALI‘I, o le aso lava lea ‘ou te taia ai solofanua uma i le atuatuvale ma o ē ti‘eti‘e ai i le fa‘avalemalosi; a o le ‘āiga o Iuta, ‘ou te va‘ava‘ai lava i ai; o solofanua uma a nu‘u ‘ou te taia ia i le tauaso.
5 O ali‘i o Iuta latou te fa‘apea i o latou loto, “E fai mo‘u malosi o ē nonofo i Ierusalema i le ALI‘I o ‘au lo latou Atua.”
6 O le aso lea ‘ou te faia ai o ali‘i o Iuta e pei o le ta‘igaafi i la‘au, e pei o le sulu fo‘i ‘ua mū i le fusi saito; latou te fa‘aumatia nu‘u uma e si‘osi‘o mai i le itū taumatau ma le itū tauagavale; e toe mau fo‘i Ierusalema i lona lava nu‘u o Ierusalema.
7 E fa‘aolaina fo‘i e le ALI‘I o fale ‘ie o Iuta, e muamua lava, ‘ina ‘ia lē fa‘asilisili le vi‘iga o le ‘āiga o Tavita, ma le vi‘iga o ē nonofo i Ierusalema ‘iā Iuta.
8 O lea aso e fa‘amamalu mai ai le ALI‘I i ē o nonofo i Ierusalema; o so latou ‘ua vaivai i lea aso e pei o Tavita ia; o le ‘āiga o Tavita, e pei o le Atua ia, e pei o le agelu a le ALI‘I i o latou luma.
9 O lea aso fo‘i ‘ou te sā‘ili ai ‘ia fa‘aumatia nu‘u uma lava o ē ō mai e tau ma Ierusalema.
10 ‘Ou te liligi ifo i luga o le ‘āiga o Tavita ma luga o ē nonofo i Ierusalema le agaga o le alofa tunoa ma talosaga, latou te va‘ava‘ai mai ‘iā te a‘u ma latou tu‘ia; latou te tagitu‘i fo‘i ‘iā te ia, e pei ‘ona tagitu‘i i le atali‘i e to‘atasi ma latou fa‘anoanoa ‘iā te ia, e pei ‘ona fa‘anoanoa i le ulumatua.
11 O lea aso e tele ai le taufaitagitu‘i i Ierusalema, o ē pei o le tagitu‘i i Atatarimoni i le vanu o Mekito.
12 E taufaitagitu‘i le nu‘u e tagi a ‘āiga; o le ‘āiga o sa Tavitā, na o i latou ma a latou avā, ‘ua na o i latou o le ‘āiga o sa Natanā, na o i latou ma a latou avā, na o i latou.
13 O le ‘āiga o sa Levī, ‘ua na o i latou ma a latou avā, na o i latou; o le ‘āiga o Semi, na o i latou ma a latou avā, na o latou.
14 O ‘āiga uma o ē totoe, o ‘āiga ta‘itasi na o i latou ma a latou avā na o i latou.