1 ‘Ua ‘ou tepa a‘e fo‘i i luga, ‘ua ‘ou va‘ai, fa‘auta, o le tagata ma le maea e fua a‘i i lona lima.
2 ‘Ona ‘ou fai atu ai lea, “Po o fea ‘e te alu i ai?”‘Ua fai mai o ia ‘iā te a‘u, “‘Ou te alu, ‘ou te fuatia Ierusalema, ‘ia iloa pe fa‘apefea lona lautele, pe fa‘apefea fo‘i lona umi.”
3 Fa‘auta fo‘i, ‘ua alu atu le agelu na ma tautala; o le tasi agelu fo‘i ‘ua alu ane e fa‘afetaia‘i ‘iā te ia.
4 ‘Ua ia fai ane ‘iā te ia, “Momo‘e ia, ‘inā fai atu i lenā taule‘ale‘a, ‘ia fa‘apea atu: E ‘ainā Ierusalema e o‘o i faoa ‘a‘ai, ‘ona o le tele o tagata ma manu e i ai.
5 O a‘u fo‘i, ‘ua fetalai mai le ALI‘I, e fai a‘u ma pā afi e si‘osi‘o a‘i, e fai fo‘i a‘u ma pupula i totonu ‘iā te ia.”
6 Sole e, sole e, sōsōla mai ia ‘outou, fai le nu‘u i le itū i matū, ‘ua fetalai mai ai le ALI‘I: Auā na ‘ou fa‘ata‘ape‘ape ‘iā te ‘outou, e pei o matāmatagi e fa, ‘ua fetalai mai ai le ALI‘I.
7 E Siona e, ‘ia e lavea‘i oe ‘iā te oe, o lē nofo fa‘atasi ma le tama fafine a Papelonia.
8 Auā o lo‘o fa‘apea ‘ona fetalai mai o le ALI‘I o ‘au, E mulimuli ane i le mamalu, ‘ua ia ‘auina mai o a‘u i nu‘u ‘ese na vetea a ‘outou mea; auā o lē pa‘i atu ‘iā te ‘outou, ‘ua pa‘ia e ia le tamatama‘i mata o lona fofoga.
9 Auā fa‘auta, ‘ou te si‘isi‘i atu lo‘u lima i luga ‘iā te i latou; e fai fo‘i i latou ma vete i o latou pologa.‘Ona ‘outou iloa lea, ‘ua ‘auina mai a‘u e le ALI‘I o ‘au.
10 Le tama fafine a Siona e, ‘ia e ‘alaga ma ‘ia ‘oli‘oli; auā fa‘auta, ‘ou te alu atu ma ‘ou nofo i totonu ‘iā te oe, ‘ua fetalai mai ai le ALI‘I.
11 E fa‘aopoopoina atu nu‘u ‘ese e tele i le ALI‘I i lea aso; e fai i latou mo‘u nu‘u ‘ou te nofo fo‘i i totonu ‘iā te oe ‘ona e iloa ai lea ‘ua ‘auina a‘u ‘iā te oe e le ALI‘I o ‘au.
12 E maua e le ALI‘I o Iuta, o lona tofi i le lau‘ele‘ele pa‘ia; e toe filifilia fo‘i e ia o Ierusalema.
13 Fa‘alologo ia o tagata uma i luma o le ALI‘I; auā ‘ua tula‘i mai o ia nai lona malumalu pa‘ia.#